ايماقتار • 04 جەلتوقسان، 2019

تۇركىستاندا 20 تۇرعىن ءۇي مەملەكەتتىك قىزمەتكەرلەرگە بەرىلەدى

772 رەت كورسەتىلدى

تۇركىستاندا جىل سوڭىنا دەيىن «نۇرلى جەر» مەملەكەتتىك باعدارلاماسى اياسىندا 1200 پاتەرلى 20 تۇرعىن ءۇي مەملەكەتتىك قىزمەتكەرلەرگە بەرىلەدى. ونىڭ ىشىندە ارەندالىق 11 ءۇيدىڭ قابىلداۋ اكتىسى جۇرگىزىلىپ، قازىر ءۇي كەزەگىندە تۇرعان ازاماتتارعا زاڭ تالاپتارىنا سايكەس ۇيلەستىرىلۋدە. بۇل جونىندە تۇركىستان وبلىسى اكىمدىگىنىڭ جاڭا عيماراتىندا العاش وتكەن اپپارات ماجىلىسىندە ءمالىم ەتىلدى. 

وڭىردەگى قۇرىلىس سالاسى مەن تۇركىستان قالاسىنىڭ دامۋى، تۇرعىن ءۇي قۇرىلىسى جانە ەكولوگيالىق ماسەلەلەر قارالعان ماجىلىستە مەملەكەتتىك-جەكەمەنشىك ارىپتەستىك اياسىندا جۇزەگە اسىپ جاتقان جوبالار بويىنشا تۇركىستان وبلىسى ەلىمىزدە كوش باستاپ كەلە جاتقانى ايتىلدى. وبلىستىق ەكونوميكا جانە بيۋدجەتتىك جوسپارلاۋ باسقارماسىنىڭ مالىمەتىنشە، تۇركيا كاسىپكەرلەرى حالىقارالىق اۋەجاي قۇرىلىسى مەن دەنساۋلىق ساقتاۋ سالاسىنا تيەسىلى كەشەندەردى جۇزەگە اسىرماق.

جيىن بارىسىندا باسقارما تاراپىنان وبلىستا مەملەكەتتىك - جەكەمەنشىك ارىپتەستىكتى داتىمۋ ماقساتىندا تابيعي گاز نىساندارىن سەنىمگەرلىك باسقارۋعا بەرۋ، تۇركىستان قالاسىندا تۇرعىن ءۇي سالۋ، جەكە ارىپتەس انىقتالماعان جوبالاردىڭ ەسەپتەۋلەرىن قايتا قاراۋ، اۋداندىق ماڭىزى بار اۆتوموبيل جولدارى مەن ىشكى كوشەلەردى سەرىكتەستىككە سەنىپ تاپسىرۋ، ەلدى مەكەندەردەگى سانيتارلىق-تازالاۋ جۇمىستارىن سەرۆيستىك قىزمەتكە بەرۋ ۇسىنىلدى. وبلىس اكىمى ومىرزاق شوكەەۆ بيۋدجەت شىعىندارىن جەڭىلدەتۋ ءۇشىن مەملەكەتتىك - جەكەمەنشىك ارىپتەستىك تەتىگىن ءتيىمدى ءارى بەلسەندىرەك قولدانۋ قاجەت ەكەنىن اتاپ ءوتتى. ينۆەستورلارعا قولايلى ۇسىنىس جاساپ، الەۋمەتتىك ماڭىزى بار سالالارعا باسىمدىق بەرۋ كەرەكتىگىن تالاپ ەتتى. 

 

 

تۇركىستان وبلىسى

 

 

سوڭعى جاڭالىقتار

ۇقساس جاڭالىقتار