قوعام • 02 جەلتوقسان، 2019

تۇركىستان وبلىسىندا سپورت نىساندارى پايدالانۋعا بەرىلدى

63 رەت كورسەتىلدى

تۇڭعىش پرەزيدەنت كۇنىنە وراي تۇركىستاندا وليمپيادا رەزەرۆىن دايارلاۋ ورتالىعى جانە تولەبي اۋدانى قاسقاسۋ اۋىلدىق وكرۋگىندە سپورت كەشەنى اشىلدى. 

قۇنى 1 ملرد تەڭگەگە جۋىق بولاتىن تۇركىستان قالاسىنداعى نىساندى سولتۇستىك قازاقستان وبلىسى تارتۋ ەتىپ وتىر. ەكى قاباتتى عيماراتتا ويىن زالى، كۇرەس، بوكس جانە ترەناجەر زالدارى اشىلعان. ورتالىق اۋلاسىندا ۇلكەن ستاديون ورنالاسقان. سپورت نىسانىندا بۇقارالىق دەنە شىنىقتىرۋ-ساۋىقتىرۋ بويىنشا وبلىستىق ءىس-شارالار مەن رەسپۋبليكالىق، حالىقارالىق جارىستار ۇيىمداستىرىلماق. جاستار مەن جاسوسپىرىمدەر اراسىندا ەركىن كۇرەس، گرەك-ريم، دزيۋدو، بوكس،  جەكپە-جەك سپورت تۇرلەرى بويىنشا وبلىس قۇراماسىنىڭ وقۋ-جاتتىعۋ جيىندارى وتكىزىلمەك. جالپى اۋماعى 3،75  گەكتار جەردى الىپ  جاتقان  سپورت كەشەنىندە ءبىر مەزەتتە 220-دان استام سپورتشى جاتتىعا الادى. مەكتەپتىڭ سپورتشىلار رەزەرۆىن دايىندايتىن وقۋ-جاتتىعۋ بازاسى دا تالاپقا ساي جابدىقتالعان. اشىلۋ سالتاناتىندا وبلىس اكىمى ومىرزاق شوكەەۆ يگى ىسكە ۇلەس قوسقان سولتۇستىك قازاقستان وبلىسى اكىمدىگىنە، جوبالاۋشىلار مەن قۇرىلىسشىلارعا العىس ايتتى. الداعى ۋاقىتتا وسى عيماراتتىڭ جانىنان جاتاقحانا مەن ورتا مەكتەپ سالىناتىنىن جانە ول ۇلكەن كەشەنگە اينالاتىندىعىن جەتكىزدى.

ال تولە بي اۋدانى قاسقاسۋ اۋىلدىق وكرۋگىندەگى سپورت كەشەنى جەكە كاسىپكەر، پەداگوگيكا عىلىمدارىنىڭ دوكتورى مومبەك قوزىباقوۆتىڭ دەمەۋشىلىگىمەن سالىنعان. جاڭا سپورتتىق-ساۋىقتىرۋ ورتالىعىنىڭ لەنتاسىن مەملەكەت جانە قوعام قايراتكەرى، بوكستان كسرو سپورت شەبەرى، قازاقستانعا ەڭبەگى سىڭگەن جاتتىقتىرۋشى امالبەك تشانوۆ پەن اۋدان اكىمى باۋىرجان وماربەكوۆ قيدى. سپورت كەشەنىندە تۇرعىندار بوكس، ەركىن كۇرەس، گرەك-ريم، فۋتبول، شاحمات جانە دويبى سىندى سپورت تۇرلەرىنەن شۇعىلدانا الادى. قۇرىلىسى وتكەن جىلى باستالعان سپورتتىق نىساننىڭ قۇنى – 150 ملن تەڭگە. ءبىر مەزەتتە 100-گە جۋىق سپورتشى جاتتىعا الاتىن كەشەندە بارلىق جاعداي جاسالعان. «تۇڭعىش پرەزيدەنت كۇنىنە تارتۋ ەتىلىپ وتىرعان وسى الەۋمەتتىك ماڭىزى بار نىسان بۇقارالىق سپورتتىڭ دامۋىنا ءوز ۇلەسىن قوسىپ، تالاي دارىندى شاكىرتتەر مەن دارابوز تارلاندار تۇلەپ ۇشىپ، ەگەمەندى ەلىمىزدىڭ كوك بايراعىن جەڭىس تۇعىرىنا كوتەرىپ، جەلبىرەتەدى دەپ سەنەمىن»، –  دەدى اۋدان اكىمى باۋىرجان وماربەكوۆ اشىلۋ سالتاناتىندا. جەكە كاسىپكەر مومبەك قوزىباقوۆ زاماناۋي ۇلگىدە سالىنعان سپورت كەشەنىنىڭ كىلتىن اۋداندىق سپورت مەكتەبىنە سالتاناتتى تۇردە تابىس ەتتى.

 

سوڭعى جاڭالىقتار

شىرقاۋ شىڭى شوقاننىڭ

رۋحانيات • كەشە

ۇقساس جاڭالىقتار