ورتالىقتىڭ اشىلۋ سالتاناتىندا تۇركيادان كەلگەن مارتەبەلى مەيمان نەجمەتتين ەردوعان ءبىلال تۇركيا پرەزيدەنتى رەجەپ تايىپ ەردوعاننىڭ سالەمىن جەتكىزدى. ء«بىز اتاجۇرتتاعى اعايىننىڭ قۋانىشىنا قاشان دا ورتاقپىز. بارشاڭىزدى مەشىتتىڭ اشىلۋىمەن قۇتتىقتايمىن. اللا تاعالا باۋىرلاس قازاق حالقىنا جاقسىلىعىن جاۋدىرسىن», دەلىنگەن تۇركيا پرەزيدەنتىنىڭ قۇتتىقتاۋىندا. ال شەشەنستان رەسپۋبليكاسىنىڭ باسشىسى رامزان قادىروۆتىڭ قۇتتىقتاۋىن كەڭەسشىسى امرۋددين ەديلگەرەۆ وقىپ بەردى. سونداي-اق تۇركىستان وبلىسىنىڭ اكىمى ومىرزاق شوكەەۆ مۇسىلمان قاۋىمدى, ونىڭ ىشىندە سارىاعاش قالاسىنىڭ تۇرعىندارىن يسلام ورتالىعىنىڭ اشىلۋىمەن قۇتتىقتاپ, يگى تىلەگىن جولدادى. «عۇلامالاردىڭ ايتۋىنشا, ءومىر ءتورت تاعاننان تۇرادى: عالىمنىڭ ناسيحاتى, پاتشانىڭ ادىلدىگى, بايدىڭ جومارتتىعى, حالىقتىڭ دۇعا-تىلەگى. وسى ءتورت تاعان وزىندىك كوركەم ۇيلەسىمىن تاپقاندا عانا كەز كەلگەن قوعام باقىتتى بولادى», - دەدى وبلىس اكىمى ومىرزاق شوكەەۆ. ىزگى تىلەكتەرىن وزبەكستان ءمۇفتيى وسمانحان قاجى ءالىموۆ پەن قىرعىزستان ءمۇفتيى ماقساتبەك قاجى توقتامۋشوۆ تا ءبىلدىردى. ال ەلىمىزدىڭ باس ءمۇفتي سەرىكباي قاجى وراز ءاربىر ادام ومىرىندە مەشىتتىڭ الار ورنى تۋرالى ناسيحات ايتتى. ء«بىزدىڭ ءومىرىمىز مەشىتپەن بايلانىستى. ادامنىڭ جۇرەگى قۇلشىلىق ۇيىندە جاي تابادى. وندا قانشاما ۋاقىتىمىزدى قۇلشىلىقپەن وتكىزەمىز. باۋىردى ءبىر-بىرىمەن قاۋىشتىرىپ, ءوزارا يمانداساتىن مەكەنىمىز – مەشىت. ەلدىڭ يگىلىگى ءۇشىن جاسالاتىن قايىرىمدىلىق پەن ىزگى ىستەر دە اللانىڭ ۇيىندە جۇزەگە اسادى. جابىرقاعان جاننىڭ مەيىرىمگە بولەنەتىن مەكەنى دە – مەشىت. ءسابي دۇنيەگە كەلگەن ساتتە وعان ازان شاقىرىلىپ, ات قويىلادى. ول مەشىتتە ءتالىم الىپ, ەر جەتكەندە نەكەسى قيىلادى. وتباسىلىق ومىردە كەزدەسەتىن ءتۇرلى سىناقتار مەن ساۋالداردىڭ جاۋابى ءھام ءپاتۋاسى وسى مەشىت پەن يمامنىڭ ارالاسۋىمەن جۇزەگە اسادى. سوندىقتان, مەشىت سالۋ - ساۋابى مول ساۋاپتى ءىس», – دەدى سەرىكباي قاجى وراز. سونداي-اق باس ءمۇفتي شەتەلدەن كەلگەن قوناقتارعا العىس ايتىپ, يسلام ورتالىعىن سالىپ بەرگەن ازاماتتارعا جىلى لەبىزىن ءبىلدىردى.
