سۋرەتتى تۇسىرگەن مەيىربەك تاجقۇرانوۆ
جاڭا ءۇيدىڭ قۇرىلىسىنا 112 ملن تەڭگە قارجى جۇمسالعان. قۇرىلىس جۇمىسىن مەردىگەر «باتىس كوتلومونتاج» جشس ساپالى جانە ۋاقتىلى جۇرگىزگەن. جاڭا باسپاناعا يە بولعان 12 وتباسىنىڭ 8-ءى – كوپ بالالى وتباسىلار. پرەزيدەنت كۇنىمەن ورايلاس كەلگەن قونىستويعا باتىس قازاقستان وبلىسىنىڭ اكىمى عالي ەسقاليەۆ قاتىسىپ, قۇتتىقتاۋ ءسوز سويلەدى.
- قۇرمەتتى اۋدان تۇرعىندارى! «نۇرلى جەر», «نۇرلى جول» باعدارلامالارى اياسىندا حالىق يگىلى ءۇشىن بىرقاتار جۇمىس اتقارىلدى. بۇگىنگى قۋانىش سونىڭ ءبىر ناتيجەسى. وسىنداي كۇن اۋدانىمىزدا كوپ بولسىن. قونىستارىڭىز قۇتتى بولسىن! - دەدى وبلىس اكىمى.
جاڭا پاتەرلەردىڭ ساپاسى جاقسى. ء«بىز كوپ جىل پاتەر جالداپ كەلدىك. ونىڭ اقىسىن تولەۋ ءبىراز قيىندىق كەلتىرەتىن. باسپانالى بولۋىمىزعا كومەكتەسكەن جاندارعا العىسىمىز شەكسىز. بۇل كۇندى ەشقاشان ۇمىتپاسپىز, شەكسىز قۋانىپ تۇرمىز. ەندى جاڭا, ساپالى جانە جايلى ۇيدە تۇراتىن بولدىق» دەيدى رىمگۇل ساكەتوۆا.
ءدال وسىنداي قۋانىش قازتالوۆ اۋدانىنا قاراستى جالپاقتال اۋىلىندا دا بولدى. «نۇرلى جەر» باعدارلاماسى اياسىندا كوپ بالالى وتباسىلار, الەۋمەتتىك جاعىنان قورعالۋعا جاتاتىن توپ مۇشەلەرى, اتا-اناسىنىڭ قامقورلىعىنسىز قالعان بالالار وزدەرىنە ارناپ سالىنعان ساپالى باسپاناعا يە بولدى. قۇرىلىستى «Kazakhstan GIGA Trade» جشس ماماندارى ۋاقىتىندا ءساتتى اياقتادى. ايتا كەتەيىك, وتكەن جىلى دا جالپاقتال اۋىلىنان ءدال وسىنداي ون ەكى پاتەرلىك تۇرعىن ءۇي پايدالانۋعا بەرىلگەن بولاتىن.
- كەزىندە ەلباسىمىز نۇرسۇلتان نازارباەۆ جىل سايىن كەمىندە التى ميلليون شارشى مەتر تۇرعىن ءۇيدى پايدالانۋعا بەرۋ تۋرالى تاپسىرما بەرگەن ەدى. ول تاپسىرما بۇگىندە «نۇرلى جەر» باعدارلاماسى بويىنشا جۇزەگە اسىرىلىپ كەلەدى. سوڭعى جىلدارى مەملەكەتىمىزدىڭ بەرەكە-بىرلىگىنىڭ ارقاسىندا كوپتەگەن يگى شارالاردىڭ ناتيجەسىن اۋىل تۇرعىندارى كورىپ جاتقانىنا قۋانىشتىمىز, - دەيدى ءوڭىر باسشىسى.
