جيىنعا قازاقستان رەسپۋبليكاسىنىڭ مەملەكەتتىك حاتشىسى قىرىمبەك كوشەرباەۆ, قازاقستان حالقى اسسامبلەياسى توراعاسىنىڭ ورىنباسارى –حاتشىلىق مەڭگەرۋشىسى جانسەيىت تۇيمەباەۆ, اقپارات جانە قوعامدىق دامۋ ءمينيسترى داۋرەن اباەۆ, پارلامەنت دەپۋتاتتارى, مەملەكەتتىك ورگانداردىڭ باسشىلارى, قحا مۇشەلەرى, رەسپۋبليكالىق جانە وڭىرلىك ەتنومادەني بىرلەستىكتەردىڭ وكىلدەرى, وڭىرلىك اسسامبلەيالار حاتشىلىقتارىنىڭ مەڭگەرۋشىلەرى, قحا عىلىمي-ساراپتامالىق كەڭەسىنىڭ مۇشەلەرى, عىلىمي-شىعارماشىلىق زيالى قاۋىم, جاستار, باق وكىلدەرى قاتىستى.
وتىرىس بارىسىندا قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ قازاقستان حالقى اسسامبلەياسىنىڭ XXVII سەسسياسىندا بەرگەن تاپسىرمالارىنىڭ ورىندالۋ بارىسى, اسسامبلەيانىڭ ەتنومادەني بىرلەستىكتەرىن قوعامدىق اككرەديتتەۋدىڭ قورىتىندىلارى, الماتى وبلىستىق اسسامبلەياسىنىڭ جۇمىس تاجىريبەسى, سونداي-اق «رۋحاني جاڭعىرۋ» باعدارلاماسىنىڭ ىسكە اسىرىلۋى, شىمكەنت قالاسى قحا-نىڭ جۇمىس تاجىريبەسى جانە بىرقاتار ۇيىمدىق ماسەلەلەر قاراستىرىلدى.
– قازاقستان حالقى اسسامبلەياسى كەڭەسىنىڭ كەڭەيتىلگەن وتىرىسىنا جىل سوڭىندا جينالىپ وتىرمىز. بۇل – اتقارىلعان جۇمىستى قورىتىندىلاپ, الدا تۇرعان مىندەتتەردى ايقىندايتىن كەزەڭ. 2019 جىلى اسسامبلەيا قوعامدا بەلسەندى جۇمىس اتقارعانىن اتاپ ءوتۋىمىز كەرەك. بيىل وتكەن كەزەكتەن تىس پرەزيدەنتتىك سايلاۋعا قاتىسىپ, جۇرگىزىلىپ جاتقان ساياسي باعىتقا قولداۋ ءبىلدىرىلدى. ارىستا بولعان وقيعاعا بايلانىستى گۋمانيتارلىق كومەك اكتسياسى ۇيىمداستىرىلىپ, اسسامبلەيا ءوزىنىڭ ازاماتتىق ۇستانىمىن تانىتتى, – دەدى قىرىمبەك كوشەرباەۆ.
مەملەكەتتىك حاتشى ءوز سوزىندە حالىق بىرلىگىن قامتاماسىز ەتۋ ءىسى ارقاشان مەملەكەتتىك ساياساتتىڭ ماڭىزدى باسىمدىعى ەكەنىن جانە سولاي بولىپ قالا بەرەتىنىن جەتكىزدى. قازاقستان حالقى اسسامبلەياسى بىرلىكتى نىعايتۋ جولىندا ماڭىزدى ءرول اتقارادى. اسسامبلەيانى, ونىڭ قوعامداعى ءرولى مەن بەدەلىن نىعايتۋ ءۇشىن قاجەتتى تۇجىرىمدامالىق, قۇقىقتىق نەگىزدەر جاسالعان.
ق.كوشەرباەۆ اسسامبلەيانىڭ الداعى ۋاقىتتا اتقاراتىن بىرقاتار باسىم مىندەتتەرىن, اتاپ ايتقاندا, 2020 جىلى قحا-نىڭ 25 جىلدىعىنا جانە مەملەكەت باسشىسىنىڭ «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى جولداۋىن ىسكە اسىرۋعا ارنالعان ءىس-شارالاردى جوعارى دەڭگەيدە وتكىزۋ, سونداي-اق جۇمىستىڭ عىلىمي-تالدامالىق باعىتىن كۇشەيتۋ قاجەتتىگىن اتاپ ءوتتى.
قازاقستاننىڭ تۇڭعىش پرەزيدەنتى - ەلباسى نۇرسۇلتان نازارباەۆ قازاقستان حالقى اسسامبلەياسىنىڭ XXVII سەسسياسىندا اقپارات جانە قوعامدىق دامۋ مينيسترلىگى مەن سىرتقى ىستەر مينيسترلىگىنە بىرقاتار تاپسىرما بەرگەن بولاتىن. مەدياتسيا ينستيتۋتى ارقىلى داۋلى ماسەلەلەردىڭ شەشىمىن تابۋ, قوعامدىق كەڭەس ينستيتۋتتارىن جەتىلدىرۋ, قازاقستان حالقى اسسامبلەياسىنىڭ 25 جىلدىعىنا ازىرلىك جۇمىستارى تۋرالى داۋرەن اباەۆ باياندادى.
– داۋ-دامايدى سوتقا جەتكىزبەي شەشۋ ينستيتۋتتارىنىڭ دامۋى – ادامدار اراسىندا پايدا بولعان داۋ-دامايدىڭ الدىن الۋدىڭ ءتيىمدى جولى ەكەنى داۋسىز. بۇل رەتتە, ءبىزدىڭ تاراپتان مەملەكەت پەن قوعامنىڭ ءوزىن-ءوزى رەتتەۋگە دەگەن مۇمكىندىگىن ارتتىرۋعا قاتىستى جوبالار ەنگىزىلۋدە. «مەدياتسيا تۋرالى» زاڭ مەدياتسيانى جۇيەلى ۇيىمداستىرۋ كەزىندە قوعامدىق قارىم-قاتىناستى رەتتەۋگە نەگىزدەلگەن. وسى كۇنى پارلامەنت دەپۋتاتتارىنىڭ باستاماسى بويىنشا اتالعان زاڭعا وزگەرىستەر مەن تۇزەتۋلەر ەنگىزۋ جوسپارلانۋدا. ناتيجەسىندە, مەدياتسيانى قولدانۋ اياسى كەڭەيتىلەدى, – دەدى داۋرەن اباەۆ.
اقپارات جانە قوعامدىق دامۋ ءمينيسترى ەلباسى بەرگەن تاپسىرمالار بويىنشا اتقارىلىپ جاتقان جۇمىستارعا توقتالىپ, قازاقستان حالقى اسسامبلەياسىنىڭ 25 جىلدىعىن ۇيىمداستىرۋ جانە وتكىزۋگە قاتىستى ۇلتتىق ءىس-شارالار جوسپارى ازىرلەنگەنىن العا تارتتى.
