ماسكۇنەمدەر تىزىمىندە «ءولى جاندار» دا ءجۇر
سارسەنبى, 10 شىلدە 2013 2:54
قولداعى دەرەكتەرگە كوز جۇگىرتە وتىرىپ, اراق دەسە ارىن دا, بارىن دا ساتاتىن سولتۇستىك وڭىردەگى ماسكۇنەمدەردىڭ سانى كەمۋ قايدا دەيسىڭ. الدىن ايپار, جانىن جايپار قىزىل ءتىلى سۋماڭداعان ءورت سەكىلدى ءورشىپ بارادى. ماسەلەن, بىلتىر «اقاڭدى» كورسە بولدى توركىنىن ساعىنعان كەلىنشەكتەي ەكى كوزى بوتالاپ قويا بەرەتىن 8678 ىشكىش تىركەۋگە الىنسا, بيىلعى جىلدىڭ 5 ايىندا ولاردىڭ سانى 7 مىڭنان اسىپ جىعىلعان. ال, ۇيىنەن دە, كۇيىنەن دە ايىرىلىپ, ۇشارىن جەل, قونارىن ساي بىلەتىن 82 تازا ماسكۇنەم ناركولوگيالىق ورتالىققا توعىتىلعان.
سارسەنبى, 10 شىلدە 2013 2:54
قولداعى دەرەكتەرگە كوز جۇگىرتە وتىرىپ, اراق دەسە ارىن دا, بارىن دا ساتاتىن سولتۇستىك وڭىردەگى ماسكۇنەمدەردىڭ سانى كەمۋ قايدا دەيسىڭ. الدىن ايپار, جانىن جايپار قىزىل ءتىلى سۋماڭداعان ءورت سەكىلدى ءورشىپ بارادى. ماسەلەن, بىلتىر «اقاڭدى» كورسە بولدى توركىنىن ساعىنعان كەلىنشەكتەي ەكى كوزى بوتالاپ قويا بەرەتىن 8678 ىشكىش تىركەۋگە الىنسا, بيىلعى جىلدىڭ 5 ايىندا ولاردىڭ سانى 7 مىڭنان اسىپ جىعىلعان. ال, ۇيىنەن دە, كۇيىنەن دە ايىرىلىپ, ۇشارىن جەل, قونارىن ساي بىلەتىن 82 تازا ماسكۇنەم ناركولوگيالىق ورتالىققا توعىتىلعان. وبلىستىق قۇقىق قورعاۋ ورگاندارىنىڭ ۇيلەستىرۋ كەڭەسىنە قاتىسۋشىلار جاعدايدىڭ الاڭداتارلىق شەككە جەتكەنىن, بۇلاي جالعاسا بەرسە, ونىڭ سوڭى ۇلكەن قاسىرەتكە اينالاتىنىن جاسىرمادى. وڭىردەگى ءاربىر سەگىزىنشى قىلمىس ىشىمدىك سالدارىنان جاسالسا, 2012 جىلى بۇل كورسەتكىشتىڭ 55 پايىزعا ارتۋى ويلاندىرماي قويمايدى. ايىقتىرعىشقا تۇنەپ شىققانداردىڭ اراسىندا ءبىر قولمەن بەسىك, ءبىر قولمەن الەم تەربەتەتىن نازىك جاندار, ءتىپتى كامەلەتكە تولماعاندار دا از كەزدەسپەيدى.
كەڭەستە ادامداردى جيىركەنىشتى ازازىلدەن الاستاتىپ, سالاماتتى ءومىر سالتىنا بەيىمدەۋ ءىس-شارالارىنىڭ جەتكىلىكسىز جۇرگىزىلەتىنى, جەرگىلىكتى بيلىك ورىندارى تاراپىنان الدىن الۋ, بولدىرماۋ جۇمىستارىنىڭ پارمەنسىزدىگى سىن تەزىنە الىندى. سونداي-اق, ارنايى ەمدەۋ ۇيىمدارىنىڭ قاۋقارسىزدىعى بەلگىلى بولدى. بلاگوۆەششەنكا اۋىلىنداعى ىشىمدىك پەن ەسىرتكىدەن ماجبۇرلەپ ەمدەۋ مەكەمەسى 150 ادامدى عانا قابىلداي الادى ەكەن. سونىڭ سالدارىنان ەمدەلۋشىلەردىڭ ۇزىنسونار كەزەگى قالىپتاسقان. جوعارى ءبىلىمدى دارىگەرلەر تاپشى.
پروكۋراتۋرا قىزمەتكەرلەرى وبلىستىق ناركولوگيالىق ديسپانسەردەگى بىرقاتار كەلەڭسىز جايتتاردى اشكەرەلەگەن. تەكسەرۋ بارىسىندا ەسىرتكى مەن ىشىمدىككە قۇمارتۋشىلاردىڭ ەسەپتەن ەش سەبەپسىز شىعارىلاتىنى انىقتالعان. سوراقىسى سول, تىركەۋگە الىنسا دا, ءتيىستى مەديتسينالىق كومەكتەن مۇلدەم سىرت قالعان «ءولى جاندار» تابىلعان. وسىنداي 11 فاكتىنىڭ تابىلعانىنا قاراپ-اق جۇمىس ساپاسىنىڭ قانداي دەڭگەيدە ەكەنىن باعامداي بەرۋگە بولادى.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى.
