جاستار جىلى اياسىندا ەل ايماقتارىندا سان الۋان ءىس-شارالار قانات قاعۋدا. بۇل رەتتە جاس سۋرەتشىلەر قاۋىمى دا ءوز تاراپىنان بەلسەندىلىك تانىتىپ, قازاق ونەرىن جوعارى دەڭگەيدە دامىتۋعا كۇش سالىپ كەلەدى. قالا اكىمدىگى جانە سۋرەتشىلەر وداعىنىڭ قولداۋىمەن, الماتى تورىندە ءوتىپ جاتقان جاس سۋرەتشىلەر كورمەسى وسىعان دالەل.
ونەر ولكەسىندە وزىنە ءتان ورنەگىن قالىپتاستىرۋعا تالاپتانعان تالانتتار شوعىرىن ءبىر ارنادا توعىستىرعان بۇل كورمەنى جاس سۋرەتشىلەر ۇيىمى ۇسىنىپ وتىر. اتالعان وداق ەلىمىزدە العاش رەت بەينەلەۋ ونەرى سالاسىنداعى شىعارماشىل جاستاردىڭ تاجىريبە الاڭى رەتىندە 2014 جىلى قۇرىلعان ەدى. سودان بەرى جاس قىلقالام شەبەرلەرىنىڭ دەنى ارتىپ, دەڭگەيى ءوستى. بۇگىندە ايرىقشا قولتاڭباسىمەن تانىلعان جاستار كوپتەگەن رەسپۋبليكالىق, حالىقارالىق كورمەلەرگە قاتىسىپ, ءتۇرلى جوبالاردا توبە كورسەتىپ ءجۇر.
«الماتى جاس سۋرەتشىلەرى» دەپ اتالعان كورمە اۆتورلاردىڭ تاقىرىپتارى مەن شىعارماشىلىق قىزىعۋشىلىقتارىن بىرىكتىرگەن كەسكىندەمە, ءمۇسىن, گرافيكا جانە ساندىك-قولدانبالى ونەر سەكىلدى ءتورت ءبولىمدى قامتىعان. مۇندا اسىرەسە پەيزاج, ناتيۋرمورت, جانرىندا جازىلعان تاقىرىپتىق كومپوزيتسيالار ويىپ ورىن العان. تابيعات كورىنىستەرى مادينا نارباەۆا, كارينا كرىلوۆا, رەنە مەرەي, ايان قابىل سىندى سۋرەتشىلەر ءۇشىن سارقىلماس شابىت كوزى دەۋگە بولاتىنداي. ولاردىڭ كەنەبىندە كوركەم كورىنىس تاپقان تاۋ مەن اسپان, سۋ مەن دالا ادام مەن تابيعات اراسىنداعى تەرەڭ بايلانىستىڭ سىرىنا ۇڭىلتەدى. ال ءابدىراحمان تۇرعىن, الماس جۇماعاليەۆ, ياروسلاۆا تيششەنكونىڭ ناتيۋرمورتتارى كۇندەلىكتى ومىردە ءبىزدى قورشاعان ادەتتەگى زاتتاردىڭ بەينەسىنە سۇيسىنە قاراۋعا شاقىراتىنداي. الماس نۇرعوجاەۆ, گافۋرا قايىربەكوۆا, داۋرەن بەكنازاروۆ, ءاليحان جاحانشا, ايات وركەن, سۇلتان امانجول, پەريزات تاينوۆا, شاحيزا قۋانىشبەكوۆا, يگور سوكولوۆ, ناتاليا ميليۋتينا, سانجار سىرعاباەۆتار زاماناۋي سيۋجەتتەرمەن قاتار, قازاقتىڭ قاسيەت-قالىبىن ۇلتتىق تاقىرىپتار ارقىلى تەرەڭنەن قاۋزاي وتىرىپ, ەسكى مەن جاڭانى ءوزارا ۇندەستىرەدى. ولاردىڭ شىعارمالارىنان ۇلتتىق مىنەز اڭقيدى.
ەكسپوزيتسيانىڭ گرافيكا بولىمىندە باسپا گرافيكانىڭ ءتۇستى لينوگراۆيۋرا جانە ليتوگرافيا تاسىلدەرىندە ورىندالعان بالقيا قوجابەكوۆا, مادينا ەرعازينا, لادا كان جانە شالقار بەردىقوجانىڭ كومپوزيتسيالارى ۇسىنىلعان. ولاردىڭ گرافيكالىق پاراقتارى تاقىرىپ تاڭداۋى مەن كوركەمدىك شەشىمدەر ارقىلى دارالانعان.
«كورمەنىڭ ساندىك-قولدانبالى ونەر ءبولىمى ءمولدىر ءابىلجان, اسەل مومبەكوۆا, نۇرحات ءداۋىتوۆ, رايىمبەك ەرمەن, گۇلناز مادي سىندى سۋرەتشىلەردىڭ گوبەلەن, كەستە, كيىز بۇيىمدارى مەن اعاشتان, مەتاللدان جاسالعان ءتۇرلى ساندىك پاننولار, مۋزىكالىق اسپاپتارىمەن تولىققان. ال, ءمۇسىن بولىمىندە شاكەن اقىلبەكتىڭ, رىسكەلديەۆ ءانۋاردىڭ جانە ازامات ۇلى ەلدوستىڭ مۇسىندىك كومپوزيتسيالارى ورىن الدى. ءار شىعارمانىڭ وزىنە ءتان ەرەكشەلىگى بار. قازاقستاننىڭ بۇگىنگى جاستارى ەلىمىزدىڭ قوعامدىق جانە مادەني ومىرىنە بەلسەنە ارالاسادى, ويتكەنى مادەنيەت پەن ونەر حالىق ومىرىندە ماڭىزدى ءرول اتقارادى», دەيدى كورمە جەتەكشىسى سامال مامىتوۆا.
