باتىس قازاقستان وبلىسىنىڭ كاسىپكەرلىك جانە يندۋستريالىق-يننوۆاتسيالىق دامۋ باسقارماسى مەن باتىس قازاقستان وبلىسىنىڭ ءبىلىم باسقارماسى ۇيىمداستىرعان بۇل ءىس-شارانىڭ ماقساتى – ەلىمىزدەگى بالالار مەن جاسوسپىرىمدەر ءتۋريزمى كلاستەرىنىڭ قىزمەتىن ناسيحاتتاۋ ارقىلى ىشكى جانە سىرتتان كەلەتىن ءتۋريزمدى دامىتۋ.
فورۋمعا ەلىمىزدەن مەملەكەتتىك مەكەمەلەر مەن قوعامدىق ۇيىمدار, بالالار تۋريستىك ۇيىمدارى, قوسىمشا ءبىلىم بەرۋ مەكەمەلەرىنىڭ باسشىلارى مەن وكىلدەرى, جوعارى وقۋ ورىندارىنىڭ باسشىلارى, عالىمدار, باق جانە بالالار ءتۋريزمى پروبلەمالارىمەن اينالىساتىن قوعامدىق ۇيىم وكىلدەرى قاتىستى. سونداي-اق رەسەي فەدەراتسياسىنان قوسىمشا ءبىلىم بەرۋ ۇيىمىنىڭ وكىلدەرى مەن جوو عالىمدارى ارنايى كەلگەن.
فورۋمنىڭ العاشقى كۇنىندە پلەنارلىق وتىرىس تEDx فورماتىندا وتسە, ەكىنشى كۇن تانىمدىق-ەكسكۋرسيالىق باعدارلاما مەن تەوريالىق-پراكتيكالىق جانە كوشپەلى سەمينار-پراكتيكۋمگە ارنالدى.
حالىقارالىق جيىن اياسىندا «تۋريستىك كلاستەر – بالالار ءتۋريزمى: ماسەلەلەرى مەن پەرسپەكتيۆالارى» تاقىرىبىندا ۇيىمداستىرىلعان كورمە كوپ ماعلۇمات بەردى. مۇندا باتىس قازاقستان وبلىسىنىڭ ءار اۋدانىنداعى تۋريستىك رەسۋرستاردىڭ ەرەكشەلىگى, بالالار ءتۋريزمىنىڭ جەتىستىكتەرى, «حرۋستالدى شوقىر» بايقاۋى, بقو ينتەراكتيۆتىك ولكەتانۋ كارتاسى, بقو ساكرالدى ورىندارىنىڭ 3D كارتاسى, وبلىستىق تاريحي-ولكەتانۋ مۋزەيىنىڭ, بالالار ءتۋريزمىنىڭ فوتوكورمەلەرى قويىلسا, ساحنادان «ورال وڭىرىندەگى بالالار ءتۋريزمى سىر شەرتەدى» اتتى فيلم كورسەتىلدى. «تۋريستىك-ولكەتانۋ قىزمەتىنىڭ ادىستەمەسى» كىتابىنىڭ تۇساۋكەسەر ءراسىمى ءوتتى.
– سانالى ۇرپاقتى تاربيەلەۋدە قازاقستاندىقتاردىڭ بىرلىگى مەن دوستىعىنا, قوعامداعى كەلىسىم مەن تۇراقتىلىقتىڭ ماڭىزدىلىعىنا, تۋعان جەرگە, وتانعا سۇيىسپەنشىلىك پەن ولكەتانۋعا ەرەكشە ءمان بەرىلەدى. ورال وڭىرىندەگى حالىقارالىق فورۋم بالالار مەن جاسوسپىرىمدەر, جاستار تاربيەسىندە تۋريزم مەن ولكەتانۋدىڭ ءرولى جايىندا ءسوز قوزعايدى. سونىمەن قاتار وقۋشىلار مەن جاستارعا ءبىلىمىن, پاتريوتتىق سەزىمىن, بەلسەندى ازاماتتىق پوزيتسياسىن جانە ىنتىماقتاستىعىن كورسەتۋگە مۇمكىندىك بەرەدى. ءبىزدىڭ وبلىسىمىزدىڭ بالالار ءتۋريزمى رەسپۋبليكا بويىنشا ۇزدىكتەر قاتارىندا بولسا, تمد ەلدەرى اراسىندا العاشقى ۇشتىكتەن ورىن الىپ وتىر. سونىمەن قاتار قازاقستانداعى توپ-50 تۋريستىك نىسانداردىڭ ىشىندەگى توپ-10 (وندىققا) تۋريستىك كلاستەر رەتىندە ەنگىزىلدى. ورال ءوڭىرىنىڭ بالالار ءتۋريزمى – قازاقستانداعى تۋريستىك-ولكەتانۋ, ەكولوگيالىق, سپورتتىق باعدارلاۋ, ەكسكۋرسيا باعىتتارىن جەتىك مەڭگەرگەن ءىرى كەشەن بولىپ ەسەپتەلەدى. ىشكى ءتۋريزمدى دامىتۋ ماسەلەسىندە بالالار ءتۋريزمى كلاستەرلىك ءتاسىل رەتىندە قاراستىرىلادى. تۋريستىك-ولكەتانۋ قىزمەتى ۇلتتىق مادەنيەتتەردى ءوزارا بايىتۋعا, تمد ەلدەرى اراسىنداعى بايلانىستى دامىتۋ جانە نىعايتۋعا جاڭا مۇمكىندىك بەرەرى ءسوزسىز, – دەدى وسى جيىننىڭ اشىلۋىندا ءسوز سويلەگەن باتىس قازاقستان وبلىسى اكىمىنىڭ ورىنباسارى سەرىك ەگىزباەۆ.
فورۋمنىڭ پلەنارلىق ماجىلىسىندە ا.وستاپەتس-سۆەشنيكوۆ اتىنداعى بالالار-جاسوسپىرىمدەر ءتۋريزمى جانە ولكەتانۋ حالىقارالىق اكادەمياسىنىڭ پرەزيدەنتى, پەداگوگيكا عىلىمدارىنىڭ دوكتورى دميتري سميرنوۆ, «تۇران – استانا» ۋنيۆەرسيتەتىنىڭ پروفەسسورى, پەداگوگيكا عىلىمدارىنىڭ دوكتورى ەۆگەني نيكيتينسكي, ورىنبور قالالىق كەڭەسىنىڭ دەپۋتاتى ەلەنا يۆانوۆا, قازاقستان رەسپۋبليكاسى بالالار-جاسوسپىرىمدەر ءتۋريزمىن دامىتۋ جونىندەگى رەسپۋبليكالىق قاۋىمداستىعىنىڭ توراعاسى قايرات سۇلتانوۆ, قىرىم ينجەنەرلىك-پەداگوگيكالىق ۋنيۆەرسيتەتىنىڭ الەۋمەتتىك-گۋمانيتارلىق پاندەر كافەدراسىنىڭ دوتسەنتى, پەداگوگيكا عىلىمدارىنىڭ كانديداتى ابجەميل ابدۋلحايروۆ, «تۇران» ۋنيۆەرسيتەتى تۋريزم عىلىمي-زەرتتەۋ ينستيتۋتىنىڭ ديرەكتورى, پەداگوگيكا عىلىمدارىنىڭ دوكتورى, پروفەسسور, حالىقارالىق دارەجەدەگى سپورت شەبەرى ۆلاديمير ۆۋكولوۆ, تاتارستان رەسپۋبليكاسىنىڭ مەكتەپتەن تىس جۇمىس جونىندەگى رەسپۋبليكالىق ورتالىعىنىڭ ديرەكتورى رانيس يدريسوۆ, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى, گەوگرافيا عىلىمدارىنىڭ دوكتورى, «قازاق ساق» كومپانياسىنىڭ ديرەكتورى وردەنبەك مازباەۆ سىندى سپيكەرلەر ءسوز الىپ, وتاندىق ءتۋريزمدى دامىتۋ, بالالار مەن جاسوسپىرىمدەر ءتۋريزمى كلاستەرىنىڭ قىزمەتىن ناسيحاتتاۋ باعىتىندا ويلارىن ورتاعا سالدى. وسى فورۋمنىڭ قۇرمەتتى قوناقتارىنىڭ قاتارىندا قازاقستان رەسپۋبليكاسىنىڭ پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا توراعاسىنىڭ ورىنباسارى ەلەنا تاراسەنكو, قازاقستان رەسپۋبليكاسى پارلامەنتى سەناتىنىڭ دەپۋتاتى دينار نوكەتاەۆا, قازاقستان رەسپۋبليكاسى پارلامەنتى ءماجىلىسىنىڭ دەپۋتاتى شافحات وتەمىسوۆ جانە رەسەيدەن كەلگەن ولكەتانۋشى-عالىمدار بولدى.
بيىلعى 24 تامىزدا « ۇلىتاۋ» ۇلتتىق تاريحي-مادەني جانە تابيعي مۇراجاي قورىعىندا وتكەن « ۇلىتاۋ – 2019» حالىقارالىق تۋريستىك فورۋمىندا پرەزيدەنت قاسىم-جومارت توقاەۆ قازاقستان جىلىنا 9 ميلليون ادامعا دەيىن تۋريست قابىلداي الاتىنىن مالىمدەگەن بولاتىن. ءيا, قازاقستاننىڭ الەمگە ۇسىناتىن بىرەگەي ورىندارى كوپ. مۇنداي كوركەم ءارى تاريحي مۇيىستەردى بالالار مەن جاسوسپىرىمدەرگە تانىستىرىپ, ناسيحاتتاۋ – ولاردى وتانشىلدىققا تاربيەلەۋدە ماڭىزدى ءرول اتقاراتىنى ءسوزسىز.
حالىقارالىق فورۋمدى ۇيىمداستىرۋشىلار قازاقستاندا تۋريزم سالاسىن دامىتۋ, بəسەكەگە قابىلەتتى, زاماناۋي تۋريستىك كەشەن قالىپتاستىرۋ ماسەلەلەرىن تالقىلاۋدى كوزدەگەن. اسىرەسە ىشكى تۋريزم سالاسىندا تۋريستىك كلاستەردىڭ ساپالى قىزمەتى قالىپتاسۋى – بالالار ءتۋريزمىنىڭ دامۋىمەن بىرگە جۇرمەك. سونداي-اق قازاقستاندىق ءتۋريزمدى دامىتۋعا ارنالعان توپ-50 تۋريستىك نىساننىڭ قۇرامىنا ەنگەن باتىس قازاقستان وبلىسى بالالار جانە جاسوسپىرىمدەر ءتۋريزمى كلاستەرىنىڭ قىزمەتىن ناسيحاتتاپ, تاجىريبەسىن تاراتۋ دا نەگىزگى ماقساتتىڭ ءبىرى ەدى.
قازىرگى تاڭدا باتىس قازاقستان وبلىسىندا بالالار-جاسوسپىرىمدەر تۋريزمىمەن شۇعىلداناتىن 14 ورتالىق پەن ستانسا جۇمىس ىستەپ تۇر. بۇل ورتالىقتار وبلىستاعى بارلىق وقۋشىنىڭ 12%-ىنا قىزمەت كورسەتەدى. وڭىردە بالالارعا تۋريستىك-ولكەتانۋ قىزمەتى ارقىلى ۇزدىكسىز ءبىلىم مەن تاربيە بەرۋدىڭ تولىققاندى جۇيەسى قۇرىلعان. رەسەي فەدەراتسياسى جانە باسقا دا شەتەلدىك بالالار ۇيىمدارىمەن حالىقارالىق كونفەرەنتسيالار مەن ءىس-شارالار وتكىزۋدە تاجىريبە جيناقتالىپ, حالىقارالىق بايلانىس قالىپتاستى. باتىس قازاقستان وبلىسىنداعى تۋريزم ورتالىقتارىنىڭ ءىس-تاجىريبەسى وسى فورۋمدا ەكسكۋرسيالىق-تانىمدىق باعدارلامالار ارقىلى كەڭىنەن تانىستىرىلدى. ورال قالاسىندا بالالار ءتۋريزمىنىڭ دامۋى مەكتەپكە دەيىنگى ۇيىمداردا شەبەرلىك سىنىپتار ارقىلى كورسەتىلەدى. شارا اياسىندا بايتەرەك اۋدانىندا جاس تۋريستەر ستانساسىنا ەكسكۋرسيا جاسالىپ, فورۋم قوناقتارى اۋداننىڭ كورىكتى جەرلەرىمەن جانە تۋريستىك رەسۋرستارىمەن تانىسادى.
فورۋم اياسىندا تۋريزم سالاسىن رەسپۋبليكالىق دەڭگەيدە دامىتۋ ماسەلەلەرىن تالقىلاعان شەبەرلىك-سىنىپتار ديسكۋسسيالىق الاڭ تۇرىندە باسقوسۋلار ءوتىپ, وعان فورۋم قوناقتارى تىكەلەي اتسالىستى.
باتىس قازاقستان وبلىسى
