قاراشا ايىنىڭ 17-ءسى شالا تۋعان سابيلەرگە ارنالعان حالىقارالىق كۇن بولسا, 20-سى پەدياتر دارىگەرلەردىڭ وزدەرىنە ارنالعان مەرەكە. وسى ەكى اتاۋلى كۇنگە وراي ارنايى اكتسيا وتكىزىپ, ءار وڭىردەن كەلگەن بالالاردى تەگىن تەكسەرىپ, كەڭەس بەرگەن «UMC» كورپوراتيۆتىك قورىنىڭ پەدياتريا دەپارتامەنتى دەنساۋلىعىن جان-جاقتى قاراپ, تەرەڭ زەرتتەۋدى قاجەت ەتەتىن بالالارعا ايرىقشا نازار اۋداردى. ءسويتىپ ستاتسيونارلىق ەمدى قاجەت ەتەتىن بالالارعا تۇرعىلىقتى جەرى بويىنشا جوسپارلى ەم الۋعا ۇسىنىمدار جاساپ, ال دەرتى اۋىرلارىن «UMC» كورپوراتيۆتىك قورىنىڭ انا مەن بالا ورتالىعىندا تەگىن مەديتسينالىق كومەكتىڭ كەپىلدىك بەرىلگەن كولەمى اياسىندا ستاتسيونارلىق ەم الۋعا, ونىڭ ىشىندە وپەراتيۆتى جانە كونسەرۆاتيۆتى ەم قابىلداۋعا جولدامالار بەردى.
Nur Otan پارتياسى نۇر-سۇلتان قالالىق فيليالى «وركەنيەت» فيليالىمەن بىرلەسە «باقىتتى وتباسى» جوباسىن ىسكە اسىرۋ اياسىندا وتكىزگەن اكتسيا مۇمكىندىگىن پايدالانىپ سابيلەرىن تەگىن كورسەتىپ الۋعا كەلگەن اتا-انالاردىڭ قاتارى كوپ ەكەن.
«UMC» كورپوراتيۆتىك قورىنىڭ پەدياتريا دەپارتامەنتى ديرەكتورىنىڭ امبۋلاتوريا جونىندەگى ورىنباسارى ليليا حاسانوۆا: ء«بىزدىڭ پەدياتريا ورتالىعىنا بيىل 5 جىل تولىپ وتىر. ءبىر كەزدەرى مەديتسينالىق جوو-لاردا پەدياتريا فاكۋلتەتتەرى جابىلىپ, بالالار دارىگەرلەرىنە دەگەن قامقورلىقتىڭ ازايعان تۇسى بولعان. قازىر ءبارى ورنىنا كەلدى, نەگىزىنەن بولاشاعىن ويلاعان قاي مەملەكەت تە بالالاردىڭ دەنساۋلىعىنا زەر سالادى. ەلىمىزدە بۇگىندە جەتكىنشەكتەردىڭ دەنساۋلىعىنا نازار اۋدارىپ, تەرەڭ دياگنوستيكالىق زەرتتەۋلەر جۇرگىزىپ, ءارى قاراي ساپالى ەمدەي الاتىن مۇمكىندىگى مول ىرگەلى كلينيكالاردىڭ بولۋى مەملەكەت تاراپىنان بۇل سالاعا قانشالىقتى كوڭىل بولىنەتىنىن كورسەتەدى. 5 جىل ىشىندە 195 مىڭ بالاعا كونسۋلتاتسيا بەرىلىپ, ونىڭ 5 مىڭى كۆوتا بويىنشا تەگىن قارالىپ, ەمدەلدى. ولاردىڭ ىشىندە اسا كۇردەلى دەرتى بار بالالار مەن سيرەك كەزدەسەتىن ورفاندى اۋرۋعا ۇشىراعاندار بولدى» دەيدى.
Nur Otan پارتياسى نۇر-سۇلتان قالالىق فيليالى مەديتسينا مەكەمەلەرىنىڭ باسىن قۇرايتىن «وركەنيەت» فيليالى توراعاسىنىڭ ءبىرىنشى ورىنباسارى ءماريا وتەپباەۆانىڭ ايتۋىنشا, پارتيانىڭ باستاماسىمەن وتكەن بۇل اكتسيا مۇنداي شارالاردىڭ العاشقىسى دا, سوڭعىسى دا ەمەس. بۇعان دەيىن «25 قايىرىمدى ءىس», «مەيىرىم سىيلا», «باقىتتى بالالىق شاق», «استانا – رۋحى مىقتى جاندار قالاسى» سىندى الەۋمەتتىك جوبالار اياسىندا ەلىمىزدىڭ بارلىق وڭىرىنەن كەلگەن بالالارعا كونسۋلتاتيۆتىك-دياگنوستيكالىق تەكسەرۋلەر وتكىزىلىپ, كوپ بالالى, تۇرمىسى تومەن وتباسىلاردان شىققان بالالارعا تەگىن كومەك كورسەتىلگەن ەكەن. بيىلعى 9 ايدىڭ ىشىندە پارتياعا كەلىپ تۇسكەن 54 ءوتىنىشتىڭ بارلىعى بويىنشا وڭ شەشىم قابىلدانىپ, پاتسيەنتتەرگە كۆوتا بولىنگەنىن ايتقان ءماريا مۇحتارقىزى: «قازىر اسىرەسە الەۋمەتتىك جەلىلەردە دارىگەرلەر اتىنا جاقسى سوزدەر كەزدەستىرۋ سيرەك. ءسال ءبىر كەم سوققان جەردى جازسا, الاۋلاتىپ-جالاۋلاتىپ, بالاعاتتاپ, دارىگەر اتاۋلىدان بەزدىرەتىن تۇسىنىك قالىپتاستىرادى. ال شىن مانىندە مەديتسينا قىزمەتكەرلەرىنىڭ ەڭبەگى ۇشان-تەڭىز, كۇردەلى وپەراتسيالار جاسالىپ جاتىر, ادام ومىرىنە اراشا ءتۇسىپ, تالاي جاننىڭ تىنىسى توقتاماي, تىرشىلىگىن ءارى قاراي جالعاستىرۋدا. دارىگەر بولماسام دا, پارتيالىق قىزمەتىمدە مەديتسيناعا جاقىن جۇرگەندىكتەن اق جەلەڭدى جانداردىڭ ەڭبەگىن بىلەمىن. سوندىقتان قوعامدا دارىگەر اتاۋلىعا تەرىس پىكىر تۋدىرۋ بولاشاقتا جاستاردىڭ دارىگەر ماماندىعىن تاڭداۋدان تەرىس اينالۋىنا سەبەپ بولا ما دەپ ويلايمىن» دەگەن پىكىرىمەن ءبولىستى.
وسى تۇستا «UMC» كورپوراتيۆتىك قورىنىڭ پەدياتريا دەپارتامەنتىندە ەڭبەك ەتەتىن دارىگەرلەردىڭ پاتسيەنتتەرگە جوعارى بىلىكتى كومەك كورسەتۋدەگى جيناعان تاجىريبەلەرى مول ءارى ونى بالالار دەنساۋلىعىن دۇرىستاۋ جولىندا دياگنوستيكاداعى جانە ەمدەۋدىڭ ۇلتتىق كلينيكالىق ستاندارتتارىن ازىرلەۋگە جۇمساپ, سونىمەن بىرگە ەل ايماقتارىنداعى مەديتسينا مەكەمەلەرىنىڭ بالالار اراسىندا ءولىم-ءجىتىمدى ازايتۋعا باعىتتالعان جۇمىستارىنا ۇدايى ۇيىمداستىرۋ-ادىستەمەلىك كومەك كورسەتۋمەن كەلە جاتقانىن ايتا كەتكەن ءجون. وعان قوسا رەزيدەنتۋرا جانە قوسىمشا مەديتسينالىق ءبىلىم بەرۋ باعدارلامالارى بويىنشا جوعارى بىلىكتى ماماندار دايارلاۋ ىسىنە دە اتسالىسادى.
