تۇركىستاندا ىسكەر ايەلدەر فورۋمى ءوتتى

ايماقتار • 19 قاراشا، 2019

تۇركىستاندا ىسكەر ايەلدەر فورۋمى ءوتتى

تۇركىستان وبلىستىق كاسىپكەرلەر پالاتاسىنىڭ ىسكەر ايەلدەر كەڭەسى ۇيىمداستىرعان «ايەل جانە بيزنەس» تاقىرىبىنداعى فورۋمعا وڭىردەگى قالالار مەن اۋدانداردان 200-گە جۋىق نازىك جاندى بيزنەس وكىلدەرى قاتىستى.

عالىمجان ەلشىباي

قازىرگى كۇنگە دەيىن ايەلدەر باسقاراتىن ورتا جانە شاعىن بيزنەستىڭ 43 پايىزى تۇركىستان وبلىسىنا تيەسىلى. ال ايەلدەر باسقاراتىن كاسىپكەرلىكتىڭ سانى 62 مىڭعا جەتكەن. كاسىپكەرلىك قۇندىلىقتاردى قالىپتاستىرۋدى قولعا العان «باستاۋ-بيزنەس» باعدارلاماسى بويىنشا وقۋدى اياقتاعان 5623 ادامنىڭ 2700-ءى قىز-كەلىنشەكتەر. گرانتتار مەن نەسيەلەردى جەڭىپ العان ايەل-كاسىپكەرلەردىڭ سانى 600-گە جەتكەن. ال «جاس كاسىپكەر» باعدارلاماسى اياسىندا ارنايى وقىتۋدان وتكەن 710 ايەلدىڭ 400-ءى ءوز بيزنەسىن باستاۋ مەن دامىتۋ ءۇشىن قارجىلاندىرۋعا قول جەتكىزگەن. بۇل دەرەكتەر تۇركىستان وبلىسىنىڭ بيزنەس حانىمدارى باس قوسقان فورۋمدا كەلتىرىلدى.

ءىس-شارانى ۇيىمداستىرۋشىلاردىڭ ايتۋىنشا، باستى ماقسات – كاسىپكەر قىز-كەلىنشەكتەرگە ماسەلەنى تالقىلاۋ ايماعىن قالىپتاستىرۋ جانە بيزنەستىڭ جۇيەلى دامۋىنا جول اشۋ. فورۋمنىڭ جۇمىسى جەرگىلىكتى ايەل-كاسىپكەرلەردىڭ ءتول ونىمدەرىن حالىققا ۇسىنعان كورمەدەن باستالدى. ولاردىڭ قاتارىندا ەكولوگيالىق تازا كوسمەتيكا، قولونەر بۇيىمدارى، ۇلتتىق كيىمدەر مەن ءتاتتى تاعامداردىڭ ءتۇر-ءتۇرى بار. كەلۋشى قوناقتارعا ۇسىنىلعان بۇيىمداردى تەك تاماشالاپ قانا قويماي، ۇناعانىن الۋعا دا مۇمكىندىك جاسالدى. تۇركىستان وبلىسى كاسىپكەرلەر پالاتاسىنىڭ ديرەكتورى دىنمۇحامەد ءابساتتاروۆتىڭ ايتۋىنشا، وڭىردە بيزنەسپەن اينالىسۋعا نيەتتى ايەلدەر سانى كۇننەن كۇنگە ءوسىپ، بۇكىل سالانىڭ دامۋىنا سەپتىگىن تيگىزۋدە. «بۇگىنگى فورۋم –جاڭا كوپتەگەن پايدالى جاڭالىقتار الماسۋ ءۇشىن اشىق سويلەسۋ الاڭى بولا الادى. ءبىز وبلىستىق كاسىپكەرلەر پالاتاسى ايەلدەر قاۋىمىن بارلىق جاعىنان قولداۋعا دايىنبىز، ەسىگىمىز بارلىعىنا اشىق»، دەدى وبلىستىق پالاتانىڭ باسشىسى.

فورۋم اياسىندا قاتىسۋشىلار ءوز بيزنەستەرىنىڭ شىڭىنا شىعۋ جولىندا جەتكەن جەتىستىكتەرىمەن، تاجىريبەلەرىمەن ءبولىستى. ماماندار تاقىرىپتىق شەبەرلىك ساعاتتارىن وتكىزىپ، بيزنەس باستاۋدىڭ جولىندا كەزدەسەتىن ءتۇرلى كەدەرگىلەر مەن قانداي جاعدايدا وعان قارجى الۋعا بولاتىنىن ءتۇسىندىردى. ال «اسىل ارمان» كورپوراتسياسىنىڭ باسشىسى الما ارحاباەۆا ءوز تاجىريبەسىمەن ءبولىسىپ، وتباسىلىق ءومىر مەن بيزنەستى قاتار الىپ ءجۇرۋدىڭ جولدارىن ايتىپ بەردى. ءبىر جىلدا اتقارىلعان جۇمىستارعا ەسەپ بەرىپ وتكەن تۇركىستان وبلىسى ىسكەر ايەلدەر كەڭەسىنىڭ ءتورايىمى سالتانات تولەگەنوۆانىڭ ايتۋىنشا، كەڭەستىڭ قۇرامىندا 500 بەلسەندى ايەل بار. كەلەسى جىلى قاراي بۇل ساندى 2 مىڭعا كوبەيتۋدى جوسپارلانىپ وتىر.

فورۋم سوڭىندا وبلىستىق كاسىپكەرلىكتىڭ دامۋىنا ۇلەس قوسقان بىرقاتار ىسكەر قىز-كەلىنشەكتەر «بيزنەس ماقتانىشى»، «ۇزدىك كاسىپكەر»، «ايەل كاسىپكەرلىگىنە قولداۋ كورسەتكەنى ءۇشىن» نوميناتسيالارى بويىنشا ماراپاتتالدى.