كوكشەنىڭ زيالى قاۋىمى باتىر مالىكتىڭ ەسكەرتكىشى جانىندا وتتى جىلدارى وتان ءۇشىن وت كەشكەن ازاماتتىڭ ەل ەسىندە جۇرەر ەرەن ەرلىگى, ازاماتتىق تۇلعاسى, كىسىلىك كەلبەتى تۋرالى تەبىرەنە ەسكە الدى. باتىردىڭ ونەگەسى كەيىنگى ۇرپاق ءۇشىن ماڭگى وشپەس ۇلگى. اقمولا وبلىستىق ارداگەرلەر كەڭەسىنىڭ توراعاسى عوسمان تولەعۇل ەر مالىكتىڭ عيبراتتى عۇمىرى تۋرالى تەرەڭنەن تولعاي ايتا كەلىپ, كەيىنگى تولقىن الدىڭعى اعالاردىڭ ونەگەسىن جاس جۇرەكتەرىمەن ۇعىپ, ۇقساپ باعۋعا تىرىسۋ كەرەكتىگىن لەبىزىنىڭ وزەگىنە اينالدىردى.
كوكشەتاۋ تەحنيكالىق ينستيتۋتىنىڭ باسشىسى سىرىم ءشارىپحانوۆ وتكەن جىلدان باستاپ مالىك عابدۋلليننىڭ باتىرلىق جولىنا ارنالعان عىلىمي-تاجىريبەلىك كونفەرەنتسيا ۇيىمداستىرۋ جۇمىستارى قولعا الىنىپ, بۇگىنگى تاڭدا بۇل يگى شارا جاقسى ۇردىسكە اينالعاندىعىن ايتىپ ءوتتى.
باتىر ەسكەرتكىشىنە گۇل شوعىن قويۋ راسىمىنەن كەيىن ش.قۇسايىنوۆ اتىنداعى قازاق مۋزىكالىق-دراما تەاترىندا كوكشەتاۋ قالاسىنداعى مالىك عابدۋللين مۋزەيى مەن كوكشەتاۋ تەحنيكالىق ينستيتۋتىنىڭ ۇجىمى ۇيىمداستىرعان «عالىم مالىك عابدۋللين جانە جاڭا قازاقستاندىق پاتريوتيزم» تاقىرىبىندا ءىى رەسپۋبليكالىق عىلىمي-تەوريالىق كونفەرەنتسيا بولىپ ءوتتى. كونفەرەنتسيا جۇمىسىندا سان قىرلى تالانت يەسىنىڭ ەلگە سىڭىرگەن ەلەۋلى ەڭبەگى جان-جاقتى سارالاندى. ەرلىكپەن بىرگە ادەبيەت سالاسىنداعى مول تابىسى تۋرالى عالىمدار مەن قالامگەرلەر جان-جاقتى تالداپ, ءتالىمىن ۇقتىردى. سىرىم ءشارىپحانوۆ جاستارعا ەرلىگى ءماندى مىسال بولۋى ءۇشىن كوكشەتاۋ تەحنيكالىق ينستيتۋتىنا باتىردىڭ اتى بەرىلسە دەگەن ۇسىنىسىن ورتاعا سالدى. زيالى قاۋىم بۇل ۇسىنىستى ءبىراۋىزدان قولداپ, اقجارىلقاپ كۇن تەزىرەك تۋسا ەكەن دەگەن ىزگى نيەتتەرىن جەتكىزدى.
كوكشەتاۋ
