كورمەگە وتاندىق قىلقالام شەبەرلەرىنىڭ كەسكىندەمە, گرافيكا, ءمۇسىن, قولونەر تۋىندىلارى (گوبەلەن, كيىز پاننولار, شىم شي, كۋشكون) قويىلدى. رەسپۋبليكالىق كورمەگە الماتى, تالدىقورعان, قاراعاندى, پەتروپاۆل, اقتوبە, اتىراۋ, قىزىلوردا, وسكەمەن وڭىرىنەن 130 سۋرەتشى قاتىسىپ وتىر.
– قر سۋرەتشىلەر وداعى قر سو مۇشەلەرىنىڭ سوڭعى 2-3 جىلدا ورىنداعان جۇمىستارىنىڭ رەسپۋبليكالىق ەسەپتىك كورمەسىن تۇراقتى تۇردە وتكىزىپ كەلەدى. جۇمىستاردى ىرىكتەۋدى جۇرگىزگەن – ۇلكەن شىعارماشىلىق ستاجى بار, قوعامدا تانىلعان تاجىريبەلى مامانداردان قۇرالعان كورمە كوميتەتى بولسا, ونى بەكىتكەن – قو سو سەكرەتارياتى. وسى كورمە ءوتىپ جاتقان كەزدە قر سو بارلىق بولىمشەلەرىنىڭ توراعالارىنىڭ قاتىسۋىمەن قر سو ەسەپتىك پلەنۋمى وتەدى. وسى ەكسپوزيتسيادا اتىراۋ وبلىستىق, اقتوبە, قاراعاندى, پەتروپاۆل بولىمشەلەرى ءوز جۇمىستارىن قويادى. تۇركىستان وبلىسىنىڭ شىمكەنت بولىمشەسى, تالدىقورعان وبلىسى, سەمەي, وسكەمەن بولىمشەلەرى بۇرىنىراق الماتى-ارەنا گالەرەياسىندا تولىق قۇرامدا ءوز ەسەپتىك كورمەلەرىن وتكىزگەن بولاتىن. مۇنداي كورمەلەر ءپىسۋى جەتكەن ماسەلەلەردى شەشۋ جولىن انىقتايدى, سۋرەتشىلەرگە, ونەرتانۋشىلارعا, مادەنيەتتانۋشىلارعا پىكىر الماسۋعا, شىعارماشىلىقتىڭ تولعاقتى پروبلەمالارىن شەشۋ جولىن انىقتاۋعا مۇمكىندىك جاسايدى, – دەيدى كورمە جەتەكشىسى گۇلنار جۇبانيازوۆا.
جۇمىستاردى ىرىكتەۋ بارىسىندا كورمە كوميتەتى جۇمىستاردىڭ مىناداي پرينتسيپتەرگە سايكەس كەلۋىنە نازار اۋداردى: كاسىبي كوركەمدىك دەڭگەيى, يدەيالار مەن پلاستيكالىق-وبرازدىق شەشىمدەردىڭ جاڭاشىلدىعى, تاقىرىپتىق مازمۇننىڭ وزەكتىلىگى. قىزىقتى كومپوزيتسيالىق شەشىمدەر بولسا, قۇبا-قۇپ. ەتيۋدتىك جانە ەسكيزدىك, اياقتالماعان جۇمىستار قابىلدانباعان. ماماندار مۇنداي شىعارمالار – ۇلكەن كورمەلەرگە قويىلۋعا ءتيىس ەمەس شىعارماشىلىق جۇمىس بارىسىنداعى قۇرامداس بولىكتەر ەكەنىن ايتادى.
كورمە كوركەمدىك شىعارماشىلىقتىڭ بۇگىنگى دەڭگەيىنەن كورىنىس بەرەدى, اۆتورلىق ستيلدەر مەن تاقىرىپتىق ارتىقشىلىقتاردىڭ الۋاندىعىن كورسەتەدى. كەسكىندەمەلىك كومپوزيتسيالاردىڭ كونتسەپتۋالدىق شەشىمدەرىنىڭ شەگى كەڭەيە تۇسەدى. كەسكىندەمە بۇرىنعىسىنشا قازاقستان كوركەمسۋرەت مەكتەبىنىڭ بەينەلەۋ ونەرىندەگى باستى ءتۇر بولىپ قالا بەرەدى.
الماتى
