«ازىرەت سۇلتان» مەملەكەتتىك تاريحي-مادەني قورىق-مۋزەيى» رمقك جانە قوجا احمەت ياساۋي اتىنداعى حقتۋ ۇيىمداستىرعان رەسپۋبليكالىق بايقاۋدا نۇر-سۇلتان, الماتى, شىمكەنت, تۇركىستان قالالارى مەن ەلىمىزدىڭ بارلىق وبلىسىنان 40-تان استام وقۋشى باق سىنادى. بيىل جيىرما ءۇشىنشى رەت ءوتىپ وتىرعان بايقاۋدىڭ اشىلۋ سالتاناتىندا «ازىرەت سۇلتان» مەملەكەتتىك تاريحي-مادەني قورىق-مۋزەيىنىڭ ديرەكتورى نۇربولات احمەتجانوۆ قالالىق دەڭگەيدە باستاۋ العان سايىس وبلىستىق, رەسپۋبليكالىق, حالىقارالىق دارەجەگە جەتكەنىن اتاپ ءوتتى. ء«وز زامانىندا-اق حالىقتىڭ ەرەكشە ءىلتيپاتىنا يە بولىپ, «اۋليەلەر سۇلتانى» اتانعان, كەيىنگى ۇرپاقتىڭ دا رۋحانيات الەمىندەگى باعدارىن ايقىنداۋدا جەتەكشى ءرول اتقارعان قوجا احمەت ياساۋي باعا جەتپەس بايلىق, وشپەس مۇرا قالدىرىپ كەتكەنى بەلگىلى. اۋليەنىڭ ءىزباسار شاكىرتتەرى تۇركىستان اتىرابىنان اسىپ, ونىڭ ءىلىمىن تورتكۇل دۇنيەگە ءماشھۇر ەتتى», دەدى نۇربولات احمەتجانوۆ.
وسكەلەڭ ۇرپاقتى ۇلى بابا مۇراسىن تەرەڭ مەڭگەرىپ, زەرتتەۋگە ىنتالاندىرۋ, ينتەللەكتۋالدى پايىم-پاراساتىن ارتتىرۋ, كەسەنەدە جەرلەنگەن تاريحي تۇلعالاردىڭ ءومىرى مەن قىزمەتىن وسكەلەڭ ۇرپاقتىڭ بويىنا ءسىڭىرۋ ماقساتىندا ۇيىمداستىرىلعان بايقاۋدىڭ ءبىرىنشى كەزەڭىندە ۇمىتكەرلەر «بابا مۇراسى – بالاعا امانات» تاقىرىبى اياسىندا قوجا احمەت ءياساۋيدىڭ حيكمەتتەرىن جاتقا ايتۋدان سىنعا تۇسسە, ء«بىلىم مىڭدى جىعار الىسقاندا» دەپ اتالعان كەلەسى كەزەڭدە سۇراقتارعا جاۋاپ بەردى. قازىلار القاسىنىڭ شەشىمىمەن الما قوساباي (تۇركىستان وبلىسى) باس جۇلدەنى جەڭىپ الدى. ال 1-ورىندى ومىرزاق تۇلەنوۆ (تۇركىستان وبلىسى), 2-ورىندى ۇلجان امانجولوۆا (شىمكەنت قالاسى) مەن مەدەۋ نۇرمولدا (الماتى وبلىسى) يەلەندى. ءۇش 3-ورىندى سىمبات بەيبىتشىلىك (قىزىلوردا وبلىسى), توعجان نۇعمان (الماتى وبلىسى) مەن ديلناز ۇسەنباەۆا (جامبىل وبلىسى) ەنشىلەدى. «ياساۋي حيكمەتتەرىن جاتتاۋ ارقىلى شىدامدى بولۋدى, قاناعات ەتۋدى ۇيرەنىپ, تاريحى تەرەڭ تۇركىستان جايلى كوپتەگەن دەرەك ءبىلدىم», دەيدى باس جۇلدەگەر الما قوساباي. ال ەڭ جاس قاتىسۋشى الماتى قالاسىنان كەلگەن سابىرجان دانيال ۇلى بايقاۋدان كوپ تاربيە العانىن ايتادى. «ادامگەرشىلىك, ادەپتىلىك, ادىلدىك پەن مەيىرىمدىلىك ءاربىر ادامنىڭ بويىنان تابىلۋى ءتيىس قاسيەتتەر ەكەندىگى حيكمەتتەردە ءجيى ايتىلعان», دەيدى سابىرجان.
جەڭىمپازدار قارجىلاي سىيلىقتارمەن ماراپاتتالىپ, ق.ا.ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ گرانتىنا يە بولدى. وقۋشىلاردىڭ جەتەكشىلەرىنە دە العىس حاتتار مەن سىيلىقتار تابىستالدى.
تۇركىستان وبلىسى
