پارلامەنت • 08 قاراشا، 2019

سەناتورلاردى «اۋىل - ەل بەسىگى» جوباسىنا ەنبەگەن اۋىلدىق اۋماقتار تولعاندىرادى

48 رەتكورسەتىلدى

پارلامەنت سەناتى اگرارلىق ماسەلەلەر، تابيعاتتى پايدالانۋ جانە اۋىلدىق اۋماقتاردى دامىتۋ كوميتەتى ەلىمىزدىڭ ۇلتتىق ەكونوميكا، اۋىل شارۋاشىلىعى، يندۋستريا جانە ينفراقۇرىلىمدىق دامۋ مينيسترلىكتەرىنىڭ باسشىلارىمەن كەزدەسىپ، «اۋىل - ەل بەسىگى» ارنايى جوباسىن جۇزەگە اسىرۋ بارىسىن تالقىلادى. بۇل تۋرالى پارلامەنت سەناتىنىڭ ءباسپاسوز قىزمەتى حابارلادى.

«كوپتەگەن اۋىلدىڭ، اسىرەسە، شەكاراداعى اۋىلدىق جەرلەردىڭ «اۋىل - ەل بەسىگى» جوباسىنا ەنبەگەنى ءبىزدى تولعاندىرىپ وتىر. ول جەردە دە ءبىزدىڭ ازاماتتارىمىز تۇرادى، ولار دا مەكتەپتەر مەن اۋرۋحانالارعا مۇقتاج» دەدى كوميتەت توراعاسى ءالي بەكتاەۆ.

ۇلتتىق ەكونوميكا ءمينيسترىنىڭ ورىنباسارى ەرمەك الپىسوۆتىڭ ايتۋىنشا، 2027 جىلعا دەيىن جوبانى جۇزەگە اسىرۋعا 900 ملرد تەڭگە بولىنەدى. ونىڭ 70 پايىزى رەسپۋبليكالىق بيۋدجەتتەن، قالعان 30 پايىزى جەرگىلىكتى بيۋدجەتتەن بولادى. اكىمدىكتەرمەن بىرلەسە وتىرىپ جىل سوڭىنا دەيىن اۋىلدىق اۋماقتار مەن ەلدى مەكەندەردىڭ ءتىزىمى جاڭارتىلادى.

«جوسپار بويىنشا 2027 جىلعا دەيىن «اۋىل - ەل بەسىگى» جوباسىن جۇزەگە اسىرۋ قورىتىندىسى بويىنشا 7 ميلليون اۋىل تۇرعىنىنىڭ ءال-اۋقاتى جاقسارىپ، اۋىز سۋمەن، دامىعان ينفراقۇرىلىممەن قامتاماسىز ەتىلەدى» دەپ سەندىردى ە. الپىسوۆ.

اگرارلىق ماسەلەلەر، تابيعاتتى پايدالانۋ جانە اۋىلدىق اۋماقتاردى دامىتۋ كوميتەتىنىڭ توراعاسى ءالي بەكتاەۆ ءوز كەزەگىندە مينيسترلىك وكىلدەرىنە ەلدى مەكەندەرگە بارىپ، بولىنگەن قاراجاتتىڭ يگەرىلۋىن تەكسەرۋ جونىندە كەڭەس بەردى. سەناتور سونداي-اق كوميتەت باعدارلامانىڭ ورىندالۋىنا مونيتورينگ جۇرگىزەتىنىن اتاپ ءوتتى.

سوڭعى جاڭالىقتار

ۇقساس جاڭالىقتار