ءىس-شارانى اشقان ەلباسى كىتاپحاناسى ديرەكتورىنىڭ ورىنباسارى بوتاگوز قايىپوۆا:
– قالامگەرلىك – قيىندىعى مەن قىزىعى مول, جان-جاقتى ءبىلىمدى تالاپ ەتەتىن جاۋاپتى سالا. ەل يگىلىگى ءۇشىن قىزمەت ەتەتىن وسى سالانىڭ ماماندارى شىعارماشىلىعى ارقىلى ادامزات ساناسىنا وڭ ىقپالىن تيگىزىپ قانا قويماي, جاڭالىقتىڭ جاقتاۋشىسى, جاڭانىڭ قولداۋشىسى رەتىندە قوعام ومىرىنەن ەرەكشە ورىن الادى. حالىقتىڭ مادەنيەتى مەن رۋحانياتىن تەرەڭ قاستەرلەگەن سونداي جاناشىر ازاماتتاردىڭ ءبىرى – جابال ەرعالي ۇلى. ول كىسىنىڭ قالامىنان تامعان تۋىندىلاردى بۇگىنگى قازاق ادەبيەتىنىڭ قۇندى قازىناسىنا بالاۋعا بولادى, - دەپ جازۋشىعا قۇرمەت ءبىلدىردى.
كەلەلى كەزدەسۋگە «بولاشاققا جول وزىڭنەن باستالادى» سەمينار-ترەنينگىنىڭ تىڭداۋشىلارى, قاراعاندى مەملەكەتتىك تەحنيكالىق ۋنيۆەرسيتەتى, د. سەرىكباەۆ اتىنداعى شىعىس قازاقستان مەملەكەتتىك تەحنيكالىق ۋنيۆەرسيتەتى, SILKWAY حالىقارالىق ۋنيۆەرسيتەتىنىڭ ستۋدەنتتەرى, باس قالانىڭ بەلسەندى جاستارى قاتىستى.
– ەكى كۇننىڭ كولەمىندە ءبىلىم قورىن بارىنشا جان-جاقتى تولتىرۋعا تىرىستىق. سەمينار-ترەنينگتەردىڭ اياسىندا ءبىز جاستار جىلى مەن ەرىكتىلەر جىلىنا ارنالعان جوبالاردى جۇيەلەپ, ولاردى ءتۇرلى وڭىرلەردەن كەلگەن ستۋدەنتتەرمەن بىرگە قورعادىق. تانىسۋدىڭ ارقاسىندا دوستار قاتارىن تولىقتىرىپ قانا قويماي, اقىل-پاراساتىمەن بوي تۇزەتەر بەدەلدى ازاماتتاردىڭ ەسىمىن دە, وسيەتىن دە ءبىلىپ جۇرەتىن بولدىق. باعدارلامامىزدىڭ وقۋمەن عانا شەكتەلمەي, رۋحاني, مادەني ازىق بەرەر قىزىق شارالارمەن تولىقتىرىلعانىن ەلباسى كىتاپحاناسىنىڭ بىزگە دەگەن قۇرمەتى دەپ بىلەمىز. سەمينار-ترەنينگتىڭ ساپاسى مەن تيىمدىلىگىن ستۋدەنتتەر قاۋىمى دا, بىزبەن كەلگەن ۇستاز ماماندار دا ءبىر اۋىزدان جوعارى باعالادى. بۇل باستامامەن جاستارعا قامقورلىق جاساپ وتىرعان تۇڭعىش پرەزيدەنتكە باسىمىزدى ءيىپ, سەميناردى ۇيىمداستىرعان ەلباسى كىتاپحاناسىنا زور العىسىمىزدى بىلدىرەمىز, - دەدى 4-كۋرس ستۋدەنتى, قاراعاندىلىق جالعاس تولەباەۆ.
جاستارعا ريزاشىلىعىن بىلدىرگەن جابال ەرعالي ۇلى وسيەتىمەن ولاردى قاناتتاندىردى جانە رۋحتاندىردى:
– كەزدەسۋدىڭ ماڭىزى تەرەڭ ماعىناعا يە. بۇل كۇننىڭ ءوزى تاريحي ءسات ەكەنىمەن تىڭداۋشىلاردىڭ كەلىسەتىنىنە سەنىمدىمىن. تۇڭعىش پرەزيدەنت كۇنى مەن تاۋەلسىزدىك كۇنى مەرەكەلەرى قارساڭىندا ەلىمىزدىڭ تۇكپىر-تۇكپىرىنەن كەلگەن جاستاردىڭ ەلباسى ساياساتىن قولدايتىنىن كورىپ, ىشتەي قۋاندىم. سەبەبى, ەگەمەن ەلدىڭ بۇگىنگى بۋىنى ەلباسى مەن تاۋەلسىزدىك ۇعىمدارىنىڭ تىعىز بايلانىسىن مويىنداپ قانا قويماي, مەملەكەتتىڭ ەرتەڭى مەن حالىقتىڭ مۇددەسىن ءوز جاۋاپكەرشىلىگىنە الۋعا دايىن. ۇلت جاناشىرلارى مەن وتانسۇيگىش جاستاردىڭ سۇحباتىن جۇزەگە اسىرعان ەلباسى كىتاپحاناسىنا العىسىم مول. كەرەگەمىزدىڭ مىقتى, شاڭىراعىمىزدىڭ بيىك بولعانىن تىلەيمىن!
جابال ەرعالي ۇلى – تانىمال جۋرناليست, جازۋشى-دراماتۋرگ جانە قوعام قايراتكەرى. ول «قۇرمەت» وردەنى, «ەڭبەكتەگى ەرلىگى ءۇشىن», «قازاقستان كونستيتۋتسياسىنا – 10 جىل», «استاناعا 10 جىل», «قازاقستان رەسپۋبليكاسىنا 20 جىل» مەرەيتويلىق توسبەلگىلەرىنىڭ يەگەرى, جامبىل اتىنداعى حالىقارالىق سىيلىقتىڭ لاۋرەاتى. كەزدەسۋ بارىسىندا جازۋشى كەيىنگى بۋىندى شىعارماشىلىعىمەن تانىستىرىپ, ولاردىڭ نازارىنا تۋىندىلارىن ۇسىندى.
بۇگىندە ونىڭ «قازاقتىڭ قاراساي باتىرى», «سونە كورمە, جۇلدىزدار», «ۇلتىم مەنىڭ, ۇلىسىم مەنىڭ», «حان كوتەرگەن ەل ەدىك ەر ۇلانىن», «بۇلتتى تۇنگى تولعان اي», «جولساپار جالعاسا بەرەدى», «تاۋەلسىزدىك تولعاۋى», «الەمدى جۇرەگىنە سىيعىزعان», «قۇلپىتاستىڭ كوز جاسى», «لەتو بەز دوجديا» كىتاپتارى, «سوڭعى تۇياق», «ەسكى اربا» پوۆەستەرى وقىرماندارعا جول تارتىپ ۇلگەرگەنى بەلگىلى. ولاردىڭ قاتارىنان «بۇلتتى تۇنگى تولعان اي», «تويعاندار مەن توزعاندار», «جەتىم تاعدىر» اتتى درامالىق شىعارمالارى تەاتر ساحنالارىندا قويىلىپ كەلەدى.
