ماماندار ەسكىرگەن ستانتسيا بۇرىن مۇنداي قۋاتپەن جۇمىس ىستەي المايتىن ەدى دەيدى. 2019 جىلدىڭ باسىندا وسى سۋ ەلەكتر ستانتسياسىن جاڭعىرتۋ باعدارلاماسىنىڭ اياسىندا ارقايسىسىنىڭ قۋاتى 31,5 مۆت بولاتىن ەكى جاڭا سۋ اگرەگاتى پايدالانۋعا بەرىلگەننەن كەيىن ستانتسياداعى جۇمىس قىزا تۇسكەن.
«جاڭا ەكى گيدرواگرەگاتتىڭ جۇمىسىنان باسقا, سۋ ەلەكتر ستانتسياسىنىڭ جوسپاردى اسىرا ورىنداۋىنا سەبەپ بولعان تاعى ءبىر باستى فاكتور – ستانتسيانىڭ نەگىزگى جانە قوسالقى جابدىعىنىڭ اپاتسىز جۇمىسى. ونىڭ ۇستىنە, سىرداريا وزەنىندە دە سۋ كولەمى جەتكىلىكتى بولعان. 2020 جىلى ءبىز شاردارا سۋ ەلەكتر ستانتسياسىنداعى تەحنيكالىق جاڭعىرتۋ جۇمىستارىن اياقتايمىز دەپ جوسپارلاپ وتىرمىز, بۇدان كەيىن ونىڭ قۋاتى ارتىپ, تۇركىستان وبلىسىنداعى ەلەكتر ەنەرگياسىنىڭ تۇراقتى كوزى بولىپ قالا بەرەدى», – دەيدى «سامۇرىق-ەنەرگو» اق «گەنەراتسيا جانە وتىن» دەپارتامەنتىنىڭ ديرەكتورى باعلان يسەنوۆ.
ايتا كەتەيىك, 2020 جىلدىڭ ءبىرىنشى جارتىسىندا تاعى ەكى گيدرواگرەگات جوسپارعا سايكەس قۇراستىرىلسا, شاردارا ستانتسياسىن جاڭعىرتۋ باعدارلاماسى اياقتالادى. جوبانىڭ جالپى قۇنى 38 ملرد تەڭگەنى قۇرايدى. قارجىنىڭ 32% ءوز قاراجاتى ەسەبىنەن, 68% نەسيەگە الىنعان. جوبانىڭ مەردىگەرى – Andritz Hydro GmbX اتتى اۆستريا-گەرمانيا كومپانياسى.
جالپى, جاڭعىرتۋ جۇمىستارى تولىق اياقتالعاننان كەيىن, شاردارا سەس-ءىنىڭ قۋاتى 126 مۆت-قا دەيىن ارتپاق. جاڭا جابدىق سۋ ستانتسياسىنىڭ قىزمەت ەتۋ مەرزىمىن 35-40 جىلعا دەيىن ۇلعايتىپ, سەس-ءتى پايدالانۋ سەنىمدىلىگىن ارتتىرادى جانە اپاتتىلىق دەڭگەيىن تومەندەتەدى. «سامۇرىق-ەنەرگو» اق ماماندارىنىڭ سوزىنشە, بۇل جوبا ەنەرگيا تاپشىلىعىن سەزىنىپ وتىرعان تۇركىستان وبلىسىن ەلەكتر ەنەرگياسىمەن قامتاماسىز ەتىپ, وڭىردەگى سۋ رەسۋرستارىن پايدالانۋدىڭ تيىمدىلىگىن ارتتىرۋدا ۇلكەن ماڭىزعا يە.
تۇتاس العاندا, «سامۇرىق-ەنەرگو» اق-نىڭ «نارىقتى دامىتۋ» دەپارتامەنتى ازىرلەگەن, قازاقستاننىڭ ەلەكتر ەنەرگياسى مەن كومىرى نارىعىنا 2019 جىلدىڭ قاڭتار-قىركۇيەك كەزەڭىندە جاسالعان تالداۋعا ساي, 2019 جىلدىڭ 9 ايىندا كومپانيانىڭ «تازا» ەلەكتر ەنەرگياسىن وندىرۋدەگى ۇلەسى (كەس, جەس, شاعىن جانە ءىرى سەس-تەر) 2018 جىلدىڭ وسىنداي كەزەڭىمەن سالىستىرعاندا (2 152,2 ملن كۆتس) 11,3% ارتقان (2 395 ملن كۆتس).
