مەموراندۋمنىڭ ماقساتى - «بولاشاق» حالىقارالىق ستيپەندياسىمەن قوسا شەتەلدە كادرلاردى دايارلاۋ, قايتا دايارلاۋ جانە بىلىكتىلىگىن ارتتىرۋدىڭ حالىقارالىق باعدارلامالارى اياسىندا سىبايلاس جەمقورلىقتى جالپىعا بىردەي قابىلداماۋدى قالىپتاستىرۋ, سونىمەن قاتار سىبايلاس جەمقورلىق قۇقىق بۇزۋشىلىقتار جاساۋعا ىقپال ەتەتىن سەبەپتەر مەن جاعدايلاردى انىقتاۋ.
كەزدەسۋ بارىسىندا اگەنتتىك توراعاسى ماماندار ىرىكتەۋ كەزىندە شەتەلدىك وقۋ ورىندارىنىڭ تۇلەكتەرىنە, «بولاشاق» باعدارلاماسىنىڭ ستيپەندياتتارىنا, ماگيستر جانە PhD دوكتورى دارەجەسىن يەلەنگەندەرگە باسىمدىق بەرىلەتىنىن جانە سىبايلاس جەمقورلىققا قارسى قىزمەتتىڭ 11 قىزمەتكەرى ەۋروپا مەن اقش-تىڭ جەتەكشى جوعارى وقۋ ورىندارىنىڭ تۇلەكتەرى ەكەنىن اتاپ ءوتتى.
اليك شپەكباەۆ «بولاشاق» حالىقارالىق ستيپەندياسى ارقىلى ءتۇرلى سالالاردىڭ, اتاپ ايتقاندا قۇقىق قورعاۋ ورگاندارىنىڭ ماماندارىن دايارلاۋ, قايتا دايارلاۋ جانە بىلىكتىلىگىن ارتتىرۋ جۇيەسىنىڭ ماڭىزدى رولىنە باسا نازار اۋداردى.
سونىمەن قوسا, تاراپتار اگەنتتىكتىڭ ورتالىق اپپاراتى مەن تەرريتوريالىق بولىمشەلەرى قىزمەتكەرلەرىنىڭ جەتەكشى شەتەلدىك جوعارى وقۋ ورىندارىنىڭ, سونداي-اق تانىمال الەمدىك عىلىمي-زەرتتەۋ ورتالىقتارىنىڭ, كومپانيالار مەن سالالىق ۇيىمداردىڭ بازاسىندا قىسقا مەرزىمدى تاعىلىمدامادان ءوتۋ ماسەلەسىن تالقىلادى.
كەزدەسۋ سوڭىندا اينۇر كاربوزوۆا اليك شپەكباەۆقا حالىقارالىق باعدارلامالار ورتالىعىنىڭ باستاماسىن قولداعانى ءۇشىن العىس ايتىپ, الداعى ىنتىماقتاستىققا دايىن ەكەندىگىن ءبىلدىردى.
«حالىقارالىق باعدارلامالار ورتالىعى» اق پرەزيدەنتى مەموراندۋمعا قول قويۋ سىبايلاس جەمقورلىققا قارسى قىزمەت قىزمەتكەرلەرىنىڭ بىلىكتىلىگىن ۇزدىك الەمدىك تاجيريبەگە سايكەس ارتتىرۋعا تىڭ سەرپىن بەرەتىنىن اتاپ ءوتتى.
اتالعان ماقساتتارعا قول جەتكىزۋ ءۇشىن تاراپتار اگەنتتىك پەن حالىقارالىق باعدارلامالار ورتالىعى كۇشىن جۇمىلدىرا وتىرىپ, سىبايلاس جەمقورلىققا قارسى ساياساتتى ىسكە اسىرۋدا جانە ونىڭ كەز-كەلگەن كورىنىستەرىنە جول بەرمەۋدە ءوزارا ارەكەتتەسۋدى ارتتىرۋعا كەلىستى.
