ادىلەت مينيسترلىگى زاڭ جوبالاۋ قىزمەتى ماسەلەلەرى جونىندەگى ۆەدومستۆوارالىق كوميسسيا مۇشەلەرىمەن بىرلەسىپ ۇكىمەتتىڭ زاڭ جوبالاۋ جۇمىستارىنىڭ 2020 جىلعا ارنالعان جوسپار جوباسىن ازىرلەدى.
جوسپار جوباسى پرەزيدەنت پەن مەملەكەتتىڭ ستراتەگيالىق قۇجاتتارىندا ايقىندالعان مىندەتتەر نەگىزىندە ازىرلەنگەن جانە 16 زاڭ جوباسىن ازىرلەۋدى كوزدەيدى. ولار الەۋمەتتىك قامسىزداندىرۋ, دەنە شىنىقتىرۋ جانە سپورت, ارنايى مەملەكەتتىك ورگاندار قىزمەتكەرلەرى مەن اسكەري قىزمەتشىلەردىڭ تۇرعىن ءۇي قاتىناستارى, ەرەكشە تاۋارلاردى باقىلاۋ, كورنەكى اقپارات جانە باسقادا سالالاردى ودان ءارى دامىتۋعا باعىتتالعان.
الداعى جىلى 2 جاڭا زاڭ جوباسىن ازىرلەۋ كوزدەلىپ وتىر. بۇل «ەرەكشە تاۋارلاردى باقىلاۋ تۋرالى» جانە «وسىمدىك الەمى تۋرالى» زاڭ جوبالارى. «ەرەكشە تاۋارلاردى باقىلاۋ تۋرالى» زاڭ جوباسىن جاڭا رەداكتسيادا ازىرلەۋ ۇلتتىق ەكسپورتتىق باقىلاۋ جۇيەسىن جەتىلدىرۋ, سونداي-اق ۇلتتىق جانە وڭىرلىك قاۋىپسىزدىكتى قامتاماسىز ەتۋگە باعىتتالعان. «وسىمدىك الەمى تۋرالى» جاڭا زاڭ جوباسىن ازىرلەۋ وسىمدىكتەر دۇنيەسى وبەكتىلەرىن قورعاۋ جانە پايدالانۋ سالاسىنداعى قاتىناستاردى رەتتەۋدى قامتاماسىز ەتۋ, ولاردى ءتيىمدى باسقارۋ ءۇشىن جاعداي جاساۋ ماقساتىندا قاجەت.
بۇدان باسقا, الداعى جىلى مەملەكەت باسشىسىنىڭ 2019 جىلعى 2 قىركۇيەكتەگى قازاقستان حالقىنا جولداۋىن ىسكە اسىرۋ جونىندەگى جالپىۇلتتىق ءىس-شارالار جوسپارىنان تۋىندايتىن 2 زاڭ جوباسى پارلامەنتكە ەنگىزىلەتىن بولادى.
بۇل - حالىقتىڭ بارلىق جاس توپتارى اراسىندا دەنە شىنىقتىرۋ مەن بۇقارالىق سپورتتى دامىتۋعا, بالالار ءۇشىن سپورتتىق ينفراقۇرىلىمنىڭ بارىنشا قول جەتىمدىلىگىن قامتاماسىز ەتۋگە باعىتتالعان زاڭ جوباسى. جانە, جەرگىلىكتى ماڭىزى بار الەۋمەتتىك-ەكونوميكالىق مىندەتتەردى شەشۋدە بيلىكتىڭ اۋداندىق, قالالىق جانە اۋىلدىق دەڭگەيلەرىنىڭ دەربەستىگى مەن جاۋاپكەرشىلىگىن كەڭەيتۋدى كوزدەيتىن زاڭ جوباسى ازىرلەنەتىن بولادى.
جوسپار جوباسىندا كوزدەلگەن 16 زاڭ جوباسىنىڭ ىشىنەن پارلامەنتكە 2020 جىلدىڭ ءبىرىنشى جارتىجىلدىعىندا - 4, ال ەكىنشى جارتىجىلدىعىندا - 12 زاڭ جوباسىن ەنگىزۋ جوسپارلانۋدا.
زاڭ جوبالاۋ جۇمىستارىنىڭ جوسپارىن جاساۋ كەزىندە زاڭ جوبالارىن ەنگىزۋ مەرزىمدەرى ازىرلەۋشى مەملەكەتتىك ورگاندارمەن ۇسىنىلدى.
يندۋستريا جانە ينفراقۇرىلىمدىق دامۋ مينيسترلىگى 3 زاڭ جوباسىن ازىرلەيدى. قورعانىس, ۇلتتىق ەكونوميكا, سىرتقى ىستەر, مادەنيەت جانە سپورت, ەكولوگيا, گەولوگيا جانە تابيعي رەسۋرستار, ەڭبەك جانە حالىقتى الەۋمەتتىك قورعاۋ مينيسترلىكتەرى 2 زاڭ جوباسىنان ازىرلەيتىن بولادى. قارجى مينيسترلىگى ءبىر زاڭ جوباسىن ازىرلەيتىن بولادى.
