ەلباسى نۇرسۇلتان نازارباەۆ تۇركىستان وبلىسىنا جۇمىس ساپارىنىڭ ەكىنشى كۇنى جۋرناليستەرگە بەرگەن سۇحباتىندا وسىلاي دەدى. سونداي-اق ەلباسى قارقىندى جۇرگىزىلىپ جاتقان قۇرىلىس ناتيجەسىندە جاڭا جۇمىس ورىندارى اشىلىپ جاتقانىن اتاپ ءوتتى. اسىرەسە حالقى كوپ ءوڭىر جاستارىنىڭ جۇمىسپەن قامتىلۋىنا مۇمكىندىك جاسالۋدا. «الەۋمەتتىك نىساندار, زاماناۋي اۋەجاي سالىنادى. سۋ ماسەلەسى, جول بويىنداعى قالانىڭ ينفراقۇرىلىمى تولىق شەشىمىن تابادى. ياعني, قازاقستاندا تاعى ءبىر ۇلكەن قالا بوي كوتەرەدى. قۇرىلىستاردى ارالاپ كورىپ ريزا بولدىم, كوپ جۇمىس اتقارىلعان.
كەلەسى جىلى كورشى وزبەكستان, قىرعىزستان, تاجىكستان, تۇرىكمەنستان ەلدەرىنىڭ باسشىلارىن شاقىرايىن دەپ وتىرمىز. ولار كەلىسىمىن بەرسە, مۇمكىن تۇركىستاندا سامميت وتكىزەمىز. ەستەرىڭىزدە بولسا, ق.ا.ياساۋي كەسەنەسىنىڭ الدىندا وزبەكستانمەن ماڭگىلىك دوستىققا قول قويعانبىز. جوسپارلاپ وتىرعان كەزدەسۋدە سونداي كەلىسىم جاسايتىن شىعارمىز», – دەدى نۇرسۇلتان نازارباەۆ. سونىمەن قاتار ەلباسى جۋرناليستەر سۇراعىنا وراي تۇركىستاندا ءتۋريزمدى دامىتۋ باعىتىندا قولعا الىنعان جۇمىستارعا توقتالدى. قازبا جۇمىستارى جۇرگىزىلىپ, مۋزەيلەر سالىنىپ, سامارقاند – تاشكەنت – شىمكەنت – تۇركىستان باعىتىندا قاتىناس ورناتىلىپ جاتقانىن اتاپ ءوتتى.
جۇمىس ساپارى بارىسىندا قازاقستاننىڭ تۇڭعىش پرەزيدەنتى – ەلباسى ن.نازارباەۆ قۇرىلىسى اياقتالعان بىرقاتار نىسانداردا بولدى. تۇركىستانداعى جاڭادان اشىلعان نەكە سارايىنىڭ جۇمىسىمەن تانىسىپ, شاڭىراق كوتەرىپ جاتقان جاس وتاۋ يەلەرىن قۇتتىقتاپ, باقىت پەن بەرەكە تىلەدى. تاپسىرىس بەرۋشى قوستاناي وبلىسى بولىپ تابىلاتىن نەكە سارايىنىڭ قۇرىلىسى شىلدەدە باستالعان بولاتىن. قۇرىلىس جۇمىستارىن «B-A Contractors SA» جشس جۇرگىزىپ, قازاندا اياقتاپ وتىر.
ەلباسى جۇمىسىمەن تانىسقان حالىققا قىزمەت كورسەتۋ ورتالىعىن سالۋدى پاۆلودار وبلىسى مىندەتىنە العان-دى. نىسان قۇرىلىسى جوسپارلانعان مەرزىمدە اياقتالدى. ال ەلىمىزدەگى ءىرى قۇرىلىس كومپانيالارىنىڭ ءبىرى «BI Group» حولدينگى تۇركىستاندا بىرنەشە نىساننىڭ قۇرىلىسىن اياقتاپ, اكىمشىلىك-ىسكەرلىك ورتالىق, «نۇر-سۇلتان» الاڭى جانە «الاتاۋ» مەديا ورتالىعىن پايدالانۋعا بەردى. قالاداعى ەڭ باستى جوبا سانالاتىن اكىمشىلىك-ىسكەرلىك ورتالىقتىڭ ءبىر ەرەكشەلىگى – ايرىقشا ساۋلەتىندە. وبلىستىق اكىمدىك, باسقارمالار مەن دەپارتامەنتتەر ورنالاساتىن عيمارات قوس قاسبەتتەن تۇرادى: ءبىرىنشىسى – HPL-پانەلدەر, ەكىنشىسى – ۇلتتىق ويۋ-ورنەك تۇرىندەگى فيبروبەتون. مامانداردىڭ سوزىنە قاراعاندا, قوس قاسبەت نەگىزىنەن ىستىق ايماقتاردا ءجيى قولدانىلادى, ويتكەنى ول قاراڭعىلىق اسەرىن بەرىپ, عيماراتتى كۇننىڭ ىستىق ساۋلەسىنەن قورعايدى. ديزاينىندا كوركەم پاركەت, ساندىك پانەلدەر, ەرەكشە فاكتورلى ءمارمار قولدانىلعان. «BI Group» حولدينگى ديرەكتورلار كەڭەسىنىڭ توراعاسى ايدىن راحىمباەۆتىڭ ايتۋىنشا, اكىمشىلىك-ىسكەرلىك ورتالىعىندا سەيسميكالىق نورمالار ەسكەرىلگەن. عيماراتتارداعى جىلىتۋ, جەلدەتۋ جانە سالقىنداتۋ جۇيەلەرى اۆتوماتتاندىرىلعان.
سىرتقى جەلىلەر بويىنشا جوبانى ازىرلەۋدە ەلەكتر مەن جىلۋ وندىرۋگە ارنالعان قوندىرعىلار ورناتىلىپتى. جۇمىس بارىسىندا ارتىق شىعىندار بولماۋى ءۇشىن ۇنەمدى ءوندىرىس تەحنولوگياسى قولدانىلعان. قۇرىلىسشىلار ەكى اۋىسىمدا جۇمىس ىستەپ, جوبانى مەرزىمىنەن ءبىر اي بۇرىن تاپسىرعان. كومپانيا قۇرىلىسىن جۇرگىزگەن تاعى ءبىر نىسان – «نۇر-سۇلتان» الاڭىنىڭ جالپى اۋدانى – 54 000 شارشى مەتر. ونىڭ 30 000 شارشى مەترى كوگالداندىرىلىپ, اعاشتار وتىرعىزىلعان, اسپانعا اتىلعان سۋ اعىنى مىڭ قۇبىلىپ, تۇمان, گەيزەرلەردىڭ بەينەسىن جاسايتىن سۋبۇرقاق ورناتىلعان. كومپانيا مۇنداي سۋبۇرقاقتى بۇكىل ءوڭىر بويىنشا قولدانۋعا نيەتتى. سونىمەن قاتار «BI Group» حولدينگى قالادا جەرگىلىكتى باق قىزمەتى ءۇشىن سالىنعان, زاماناۋي قۇرىلعىلارمەن جابدىقتالعان ەكىنشى اۋقىمدى جوبا – «الاتاۋ» مەديا ورتالىعىن سالدى. ەلباسى وڭىرلىك باق وكىلدەرىنە ارنالعان جۇمىس بولمەلەرىن ارالاپ كوردى. جۋرناليستەرگە ارنالعان 4 قاباتتى عيماراتتا 200-دەن استام ادام جۇمىس ىستەي الادى. مەديا ورتالىقتا كونفەرەنتس-زال, تەلەستۋديا, گريمەر, اۋديو جانە ۆيدەومونتاج ورىندارى, رەداكتسيالار مەن اكىمشىلىكتىڭ كەڭسەلەرى, بريفينگ-ورتالىق, فۋد-كورت قاراستىرىلعان. ال عيماراتتىڭ قاسبەتى كۇن جىلۋىن 70%-عا دەيىن وتكىزبەيتىن ەنەرگيا ۇنەمدەيتىن شىنىدان جاسالعان, ياعني قىس مەزگىلىندە عيمارات ىشىندە جىلۋدى ساقتاپ, ال جازدا جايلى قوڭىر سالقىن اۋا قالىپتاستىرادى. جالپى قۇرىلىس كومپانياسى تۇركىستاندا 7 ماڭىزدى نىساندى سالۋدا, ونىڭ ىشىندە « ۇلى دالا» مۇراجايى, «Hampton by Hilton» قوناقۇيى جانە 7000 ورىندى فۋتبول ستاديونى بار.
سونداي-اق جۇمىس ساپارى بارىسىندا ەلباسى تۇركىستان وبلىستىق اكىمدىگىنىڭ جاڭا عيماراتىندا Nur Otan پارتياسى فيليالىنىڭ حالىق پەن بيلىك اراسىن جاقىنداتۋ باعىتىندا قولعا العان جوباسىمەن تانىستى. وبلىس اكىمى, Nur Otan پارتياسى تۇركىستان وبلىستىق فيليالىنىڭ توراعاسى ومىرزاق شوكەەۆ تۇرعىنداردىڭ ءوتىنىشى مەن قۇقىقتارى ءاردايىم باستى نازاردا بولاتىنىن جەتكىزدى. ال جوبانىڭ جۇمىسىمەن ەلباسىن پارتيانىڭ وبلىستىق فيليالى توراعاسىنىڭ ءبىرىنشى ورىنباسارى بەيسەنباي تاجىباەۆ تانىستىردى. مۇندا پارتيا حالىقتى اشىق فورماتتا قابىلدايدى. ارنايى قوعامدىق قابىلداۋ بولمەلەرىندە تۇرعىنداردىڭ تالاپ-تىلەگى تىڭدالىپ, ارىز-شاعىم, وتىنىشتەر بويىنشا ءتيىستى جۇمىستار جۇرگىزىلەدى. سونىمەن بىرگە قۇقىق قورعاۋ ورگاندارى مەن تۇرعىندار ءجيى سۇراق قوياتىن الەۋمەتتىك سالانىڭ وكىلدەرى دە تۇرعىندارعا كومەكتەسەدى. ءاربىر ازاماتتىڭ شاعىمى پوست-تەرمينال ارقىلى قابىلدانادى. بارلىق وتىنىشتەر پارتيا تاراپىنان تۇراقتى قاداعالانۋعا الىنادى. بۇل جاڭا باستاما اشىق اكىمدىك جوباسىن جانداندىرۋ ماقساتىندا قولعا الىنىپ وتىر. ب.تاجىباەۆتىڭ ايتۋىنشا, بۇگىندە Nur Otan پارتياسىنىڭ توراعاسى نۇرسۇلتان نازارباەۆتىڭ «سەنىم. ديالوگ. بولاشاققا نىق قادام» – Nur Otan پارتياسىنىڭ 7 سەرپىنى» باعدارلاماسى اياسىنداعى تاپسىرماسىنا سايكەس وڭىردە جۇيەلى جۇمىس اتقارىلۋدا. «Open space» فورماتىندا اشىلعان قوعامدىق قابىلداۋ كەڭسەسى جاڭا عيماراتقا كوشىرىلگەن. لاۋازىمدى تۇلعالار تۇرعىنداردى تۇراقتى تۇردە قابىلداپ, ماسەلەلەر شەشىمىن تابۋدا. مىسالى, بيىل قاڭتار-قازان ايلارى ارالىعىندا پارتيا فيليالىنىڭ بارلىق قوعامدىق قابىلداۋ بولمەلەرىنە تۇسكەن 6047 ارىز-شاعىمنىڭ 2358-ءى (39%) وڭتايلى شەشىلسە, 3611 وتىنىشكە زاڭ اياسىندا كەڭەستەر بەرىلگەن. سونداي-اق كاسىپكەرلەرگە زاڭ جۇزىندە كەڭەس بەرىپ, ارىز-شاعىمىن تىڭدايتىن قوعامدىق بيزنەس-قابىلداۋى دا ىسكە قوسىلعان.
ايتا كەتەلىك, بۇگىندە تۇركىستان وبلىسىندا Nur Otan پارتياسىنىڭ 90 مىڭعا جۋىق مۇشەسى بار. وڭىردە 255 باستاۋىش پارتيا ۇيىمىنا تالداۋ جۇرگىزىلىپ, 2,5 مىڭنان اسا ادام پارتيا قاتارىنان شىعارىلعان. جاڭادان بەس باستاۋىش پارتيا ۇيىمى اشىلىپ, كاسىپورىن مەن شارۋاشىلىق ۇيىمدارىنىڭ وكىلدەرى پارتيا قاتارىنا تارتىلدى. وسى جىلدىڭ سوڭىنا دەيىن اشىلاتىن باستاۋىش پارتيا ۇيىمدارىنىڭ سانىن ونعا جەتكىزۋ جوسپارلانىپ وتىر.
قازاقستاننىڭ تۇڭعىش پرەزيدەنتى تۇركىستانعا جۇمىس ساپارى كەزىندە قالاداعى جاڭا نىسانداردىڭ قۇرىلىس قارقىنى جوعارى ەكەنىن ايتتى, بۇل ورايدا وبلىس اكىمدىگىنىڭ ەڭبەگى دە ەلەۋسىز قالمادى.
تۇركىستان وبلىسى
