وسى ورايدا ەسىمىزگە م.مىرزاحمەتوۆتىڭ ءبىر سۇحباتىندا جادىنان وشپەيتىن ەڭ اۋىر كۇن رەتىندە اشارشىلىق كەزىندەگى وقيعانى ايتقانى ءتۇسىپ وتىر. «ناۋبەت باستالعاندا مەن 4 جاستا ەدىم. شەشەم مەنى قولىنان تاستاماي كوتەرىپ جۇرەتىن. ستانسا مەن اۋىلدىڭ اراسى 2,5-3 شاقىرىم. اكەم ۇستا بولاتىن. ازداپ التىنىمىز بولدى. سونى ساتىپ كۇن كوردىك. كەيىن اكەمىزدى باي-قۇلاق دەپ تۇتقىندادى. تۇرمەدە جاتىپ كوز جۇمدى. ءۇيىمىز ەۋروپالىق ۇلگىدە سالىنعان, ەدەنى تاقتايلانعان جاقسى ءۇي ەدى. ورتەپ جىبەردى. ءۇيدىڭ ورتاسىندا تىرەۋ بولعان. اكەم تىرەۋدىڭ ءبىر جەرىن بىلدىرمەي ويىپ, سوعان التىن ساقتايتىنبىز. ۇيمەن بىرگە ورتەنىپ كەتتى. ءبارى ءالى كۇنگە دەيىن كوز الدىمدا», دەگەن-ءدى سۇحباتىندا م.مىرزاحمەت ۇلى. وسى ءبىر وقيعانى عالىم كۇنى كەشە سىيعا تارتۋ ەتىلگەن باسپانا كىلتىن العان كەزدە دە ەسىنە العان بولار. اۋىلدا قاراپايىم تىرشىلىك ەتىپ جۇرگەن اعامىز باسپاناسىز ەمەس-ءتى. دەگەنمەن اۋدان اكىمى باستاماشىل بولىپ, جەرلەستەرى جاڭا دا جايلى ءۇي سالىپ بەرۋدى ۇيعارىپتى. وسى ورايدا ايتا كەتەلىك, تۇلكىباس اۋدانىنىڭ اكىمى نۇربول تۇراشبەكوۆتى جۇرت رۋحانياتقا جاناشىر, جاڭاشىل باسشى رەتىندە دە قۇرمەتتەيدى. شاعىن جانە ورتا كاسىپكەرلىك دامىپ, تۇرعىنداردىڭ الەۋمەتتىك جاعدايى جاقسارا تۇسكەن تۇلكىباستا سوڭعى جىلدارى اقىن-جازۋشى, عالىمدار مەن جۋرناليستەرگە ءتۇرلى باعىتتا كوپتەپ قولداۋ كورسەتىلىپ كەلەدى. مەكەمتاس مىرزاحمەت ۇلىنا جاڭا دا ءزاۋلىم ءۇيدىڭ كىلتىن تابىستاۋ راسىمىندە اۋدان اكىمى: ء«بىرازدان بەرى بىزدە مەكەمتاس اعامىزعا تۋىپ-وسكەن جەرىنەن باسپانا سوعىپ بەرسەك دەگەن نيەت بولدى. وسى باسپانادا اعامىز شىعارماشىلىقپەن ەمىن-ەركىن اينالىسسا دەگەن ماقساتتاعى نيەتىمىز ىسكە اسىپ, بۇگىن قۋانىشتى بولىسپەكپىز. بۇل ءۇي اعامىزعا اۋدان حالقىنىڭ اتىنان بەرىلىپ وتىر», دەي كەلە ءۇيدى سالۋعا ۇلەس قوسقان دەمەۋشىلەرگە العىسىن ءبىلدىردى. ال وبلىستىق ارداگەرلەر كەڭەسىنىڭ توراعاسى جەڭىسبەك ماۋلەنقۇلوۆ مەكەمتاس مىرزاحمەت ۇلىنىڭ وتكەن ءومىرى مەن شىعارماشىلىق جولىنا كوز جۇگىرتىپ, قازاق عىلىمىنىڭ دامۋىنا قوسقان ۇلەسى شەكسىز ەكەنىن جەتكىزدى. ءوز كەزەگىندە مەكەمتاس اعا جەرلەستەرىنە العىسىن ءبىلدىرىپ, سول جەرلەستەرىن يگى ىسكە جۇمىلدىرا بىلگەن اۋدان اكىمى نۇربول تۇراشبەكوۆتىڭ جۇمىسىنا ساتتىلىك تىلەدى.
سونداي-اق بۇل كۇنى اۋداندىق «شامشىراق» قوعامدىق-ساياسي گازەتىنىڭ رەداكتسياسىندا تۇلكىباس وڭىرىنە ەسىمى تانىمال اقىن ابدىبەك ارالباي ۇلى مەن ۇزاق جىلدار بويى اۋداندىق گازەتتە قىزمەت ەتكەن جۋرناليست ورىنتاي كومەكوۆتىڭ كىتاپتارىنىڭ تۇساۋكەسەرى ءوتتى. «ىزدە مەنى» كىتابىندا ارقالى اقىن ابدىبەك ارالباي ۇلىنىڭ سوڭعى جىلدارى جازعان ولەڭدەرى توپتاستىرىلعان. ال, «ەندى گۇلگە جولاماسپىن» – ورىنتاي كومەكوۆتىڭ العاشقى كىتابى. قالىڭ كىتاپتا ءجۋرناليستىڭ وسى ۋاقىتقا دەيىن ءازىل-سىقاق, تىلسىم دۇنيە تاقىرىپتارىندا جازعان دۇنيەلەرى توپتاستىرىلعان. تۇساۋكەسەر راسىمىندە مەكەمتاس مىرزاحمەت ۇلى باسىلىپ شىعۋىنا اۋدان اكىمى ىقپال ەتكەن كىتاپ يەلەرىنە شىعارماشىلىق تابىس تىلەدى.
تۇركىستان وبلىسى
