بالالاردىڭ شىعارماشىلىق الەۋەتىن دامىتۋ, مۇمكىندىگى شەكتەۋلى تالانتتى بالالاردى قولداۋ, بالالاردى وتانسۇيگىشتىككە تاربيەلەۋ, قازاقتىڭ ۇلتتىق كيىم ۇلگىلەرىنە, حالىقتىڭ تاريحى مەن مادەنيەتىنە قىزىعۋشىلىقتى وياتۋ ماقساتىندا ۇيىمداستىرىلعان بۇل بايقاۋدى «پەرىشتە» قوعامدىق قورى بىلتىر, 2018 جىلى تۇڭعىش رەت وتكىزگەن ەدى. كامەلەتكە تولماعاندار, اسىرەسە مۇمكىندىگى شەكتەۋلى سابيلەر اراسىندا ەرەكشە تانىمال بولعان بايقاۋ بيىل باتىس قازاقستان وبلىستىق مادەنيەت باسقارماسى, «عىلىمي زەرتتەۋلەردى قولداۋ قورى» جانە باتىس قازاقستان وبلىستىق ىشكى ساياسات باسقارماسى قولداۋىمەن بيىك دارەجەدە ۇيىمداستىرىلدى.
العاشقى بايقاۋعا 23 بالا قاتىسسا, بيىل ولاردىڭ سانى 41-گە جەتتى. سونىڭ ىشىندە 26 قاتىسۋشى فينالعا ءوتتى. ولاردىڭ اراسىندا «بالالار اۋىلىندا» تاربيەلەنۋشى جەتىم بالالار, كورۋ جانە ەستۋ قابىلەتى بۇزىلعاندار, قاتەرلى ىسىك اۋرۋىنا شالدىققان بالالار ءوز قۇربىلاستارىمەن قاتار بايقاۋعا قاتىستى. بايقاۋدىڭ ىرىكتەۋ سىناقتارى وتكەن 1,5 اي ىشىندە ولار قادىر مىرزا ءالى اتىنداعى مادەنيەت جانە ونەر ورتالىعىندا, وبلىستىق فيلارمونيا مەن وبلىستىق ولكەتانۋ مۇراجايىندا فوتوسەسسيادان ءوتتى.
ءبىر قىزىعى, وسى بايقاۋ اياسىندا ەڭ ۇزدىك ۇلتتىق تاريحي كيىم ۇلگىسىنە ارنالعان ديزاينەرلەر بايقاۋى دا ەكىنشى مارتە ءوتتى. بايقاۋدىڭ يدەياسى – قازاقتىڭ XVII-XVIII عاسىرلارداعى ۇلتتىق كيىم ۇلگىلەرىن جاڭعىرتۋ بولاتىن. بۇل سايىسقا تاريحي كوستيۋم ۇلگىلەرى قاتىستى.
سونىمەن, قازىلار القاسى 13-15 جاس ارالىعىنداعى جوعارعى توپ اراسىنان گران-پري سىيلىعىن سۇلتانبەك شامبۋلوۆ پەن گۇلزادا, بەكزادا نۇرسەيىلدەرگە, 1 ورىندى – ايقىن مەن دارياعا تاپسىردى. 10-12 جاس ارالىعىنداعى ورتا توپ اراسىنان باقىتجان بوپەجان مەن التىنجان شامبۋلوۆا – باس جۇلدەگە, باقداۋلەت پەن امانگۇل 1 ورىنعا يە بولدى. 7-9 جاستار اراسىنداعى ءى جانە 4-6 جاستاعى ءىى كىشى توپتار اراسىندا ەرتورە بولات, ءسابينا ەرتاەۆا, ءادىل يسا جانە انەليا – گران-پريگە بولسا, ارىستانبەك, نۇراسىل جانە انگەلينا ەسىمدى بالدىرعاندار جۇلدەلى ءبىرىنشى ورىننىڭ سىيلىعىن يەمدەندى. «ۇزدىك فوتومودەل» اتالىمى ءوزىن ادەمى كورسەتىپ, كۇيزەلىسكە قارسى قايسارلىق تانىتقان ادىلەت عابباسوۆقا بۇيىردى. 12 جاسار انەل اسانوۆا مەن 7 جاسار الەكسەي – «ەڭ ادەمى مودەل» اتاندى.
بايقاۋدىڭ بارلىق قاتىسۋشىسى ارنايى سەرتيفيكاتقا, لەنتا مەن سىيلىققا يە بولدى.
- ءبىزدىڭ ۇزدىك فوتومودەلدەرىمىزدىڭ سۋرەتى ءتۇرلى-ءتۇستى جۋرنالدارعا جاريالاناتىن بولادى. گران-پري جانە «ۇزدىك فوتومودەل» اتاۋىنىڭ يەلەرى جۋرنالعا سۇقبات بەرەدى. سونداي-اق وسى باعىتتا قىزىعۋشىلىعىن دامىتقىسى كەلەتىن بالالار Edelweissارت ستۋدياسىندا ەتيكەت جانە مودەلينگ ساباقتارىنان ءدارىس الا الادى, - دەيدى بايقاۋدىڭ ۇيىمداستىرۋشىسى, «پەرىشتە» قوعامدىق قورىنىڭ جەتەكشىسى جانار داۋلەتوۆا.
ايتا كەتەيىك, ۇلتتىق كيىمدەردى ساراپقا سالعان جيۋري قۇرامىندا مادەنيەت قايراتكەرلەرى, سۋرەتشىلەر, تاريحشىلار بولعان ەدى. ساراپشىلار ديزاينەرلەر اراسىندا وتكەن «ناعىز ۇلتتىق كيiم» بايقاۋىنىڭ گران-پري جۇلدەسىنە ماليكا كۋباەۆانى لايىق دەپ تاپتى.
كەش سوڭىندا فليۋرا ميليكەەۆا جەتەكشىلىك ەتەتىن «تاتار مادەني ورتالىعى» قوعامدىق بىرلەستىگى بايقاۋ قاتىسۋشىلارىنا فۋرشەت ۇيىمداستىرسا, جەكە كاسىپكەر ايزادا شايحيەۆا بالالارعا تاتتىلەر مەن شامپۋن سىيلادى. جالپى, بۇل بايقاۋعا قاتىسقان ءار بالا بۇل كۇنى ويىنشىق پەن سىيلىقتان كەندە بولمادى.
باتىس قازاقستان
