– «اڭىزدىڭ اقىرى» رومانىنا ارنالعان وقىرمان بايقاۋى بيىل تۋعانىنا 80 جىل تولىپ وتىرعان ءسوز زەرگەرى ءابىش كەكىلباەۆتىڭ شىعارماشىلىق مۇراسىن ناسيحاتتاۋ, ۇلتتىق قۇندىلىقتاردى, مەملەكەتتىك ءتىلدى دارىپتەۋگە سونىمەن قاتار تالانتتاردى تانۋعا ارنالدى. ويتكەنى قالامگەر قالامىنان تۋعان «اڭىزدىڭ اقىرى» رومانى – تالايلار ىزدەپ ءجۇرىپ, ءسۇيسىنىپ وقيتىن كلاسسيكالىق تۋىندى. تاريح تامىرىن قوزعايتىن روماننىڭ قازاق ادەبيەتىنەن ويىپ تۇرىپ الار ورنى بار, - دەيدى وسى بايقاۋدىڭ قازىلار القاسى توراعاسى, ۋنيۆەرسيتەت وقىتۋشىسى, قاۋىمداستىرىلعان پروفەسسور ريتا سۇلتانعاليەۆا.
بايقاۋ ءۇش كەزەڭنەن تۇردى. ءبىرىنشى كەزەڭدە قاتىسۋشىلار «اڭىزدىڭ اقىرى» رومانى بويىنشا بەرىلگەن سۇراقتارعا جاۋاپ بەرىپ, روماندى قانشالىق تۇسىنگەنىن كورسەتسە, ەكىنشى كەزەڭدە «مەن وقىعان «اڭىزدىڭ اقىرى»: تۇيگەنىم, بولجام, ۇسىنىس» اتتى شىعارماشىلىق جۇمىس جازدى. ال ءۇشىنشى كەزەڭدە «اڭىزدىڭ اقىرى» رومانىنىڭ ءۇزىندىسىن مانەرلەپ جاتقا وقىدى.
ادەبيەتتەگى ءابىش الەمىن تەرەڭ ءبىلىپ, روماننىڭ كوركەمدىك-يدەيالىق ەرەكشەلىگىن ادەمى تالداعان بىرنەشە ستۋدەنت جەڭىمپاز اتاندى. ءسويتىپ, بايقاۋدىڭ ءبىرىنشى ورىن جۇلدەسى فيلولوگيا فاكۋلتەتىنىڭ 1-كۋرس ستۋدەنتى زافۋرا مامۇتقا بۇيىردى. ال ەكىنشى ورىندى قازىنا ەسەتوۆا مەن قۇرالاي جىلتىقاەۆا, ءۇشىنشى جۇلدەنى نازەركە سۇلتانعالي, باعدات ورازحان جانە اقنۇر سەمباەۆا ءوزارا ءبولىستى. وسى بايقاۋعا بەلسەندى قاتىسىپ, كوزگە تۇسكەن ءزۇلفيا تولەۋ, قازىنا فايزۋللينا, جادىرا قۇلتاي, گۇلنۇر كوشەرباەۆا, دينارا سارسەنباەۆا سىندى ستۋدەنتتەر العىس حاتپەن ماراپاتتالدى.
باتىس قازاقستان
