ماڭعىستاۋ وبلىسىنىڭ اكىمى سەرىكباي ترۇموۆ اقتاۋ قالاسىنداعى تۇركيانىڭ باس كونسۋلى مۇزاففەر اقيىلدىرىم باستاعان دەلەگاتسيانى ايتۋلى مەرەكەمەن قۇتتىقتاپ, ەكى ەلدىڭ اراسىنداعى ىنتىماقتاستىق قارىم-قاتىناستى ەرەكشە اتاپ ءوتتى.
- ەلىمىز ەگەمەندىگىن الىپ, تاۋەلسىزدىگىنە قول جەتكىزگەن جىلداردان باستاپ, قازاقستان مەن تۇركيا مەملەكەتىنىڭ باسشىلارى ىنتىماق پەن بەرەكەنىڭ ۇلگىسىن كورسەتىپ كەلەدى. ول ءبىز ءۇشىن وتە ماڭىزدى. ءبىزدىڭ ءتۇبىمىز ءبىر, تەگىمىز بەن قاسيەتتى قۇندىلىقتارىمىز ورتاق, تاريحىمىز بەن ءجۇرىپ وتكەن جولىمىز ۇقساس. بىلىكتى رەفورماتور مۇستافا كەمال اتاتۇرىك ىرگەسىن قالاعان تۇركيا - مەملەكەت رەتىندە قالىپتاسۋ ءۇشىن تالاي قيلى كەزەڭ مەن قيىندىقتى وتكىزگەنى تاريحتان بەلگىلى. الايدا, اۋىزبىرشىلىك پەن تاتۋلىقتىڭ ارقاسىندا ونىڭ ءبارى وتكەن شاقتىڭ ەنشىسىندە قالدى. الداعى ۋاقىتتا دا باۋىرلاس تۇركيا حالقىنا وركەندەۋ مەن گۇلدەنۋدى تىلەيمىن!,- دەپ اتاپ ءوتتى ايماق باسشىسى.
تۇركيانىڭ ەكونوميكالىق بەلسەندىلىگى ماڭعىستاۋ ءوڭىرى ءۇشىن دە ەداۋىر ۇلەسىن تيگىزىپ كەلەدى. ماڭعىستاۋ مەن تۇركيا ەلى اراسىنداعى ساۋدا-ەكونوميكالىق بايلانىستىڭ ماڭىزى زور. «نۇرلى جول» مەملەكەتتىك باعدارلاماسىن جۇزەگە اسىرۋ ارقىلى وبلىسىمىزدىڭ كولىك الەۋەتى ارتىپ كەلەدى. قۇرىق پورتى جوباسىنىڭ ارقاسىندا ماڭعىستاۋ ءوڭىرى ازيا مەن ەۋروپانىڭ التىن كوپىرىنە اينالىپ وتىر. 2019 جىلدىڭ 8 اي كورسەتكىشى بويىنشا ماڭعىستاۋ وبلىسىمەن تۇركيا رەسپۋبليكاسىنىڭ اراسىنداعى تاۋار اينالىمى 211 ملن اقش دوللارىن قۇرادى. بۇل كورسەتكىش وتكەن جىلمەن سالىستىرعاندا 22 ەسەگە ارتىق. سونداي-اق وبلىستا قۇرىلىس, قۇرىلىس تاستارىن ءوندىرۋ, مەيرامحانالار جانە قىزمەت كورسەتۋ سالاسىندا تۇرىك كاپيتالىنىڭ قاتىسۋىمەن 74 بىرلەسكەن كاسىپورىن تىركەلگەن.
ماڭعىستاۋ وبلىسى
