«استانا وپەرا» تەاترىنىڭ «مۋزىكالىق قيىلىس» تسيكلدى جوباسى ءوزىنىڭ بىرەگەي كونتسەرتتىك باعدارلاماسىنان بولەك, وعان الەمنىڭ بىلىكتى مۋزىكا ماماندارىنىڭ تارتىلۋىمەن دە تىڭدارماندار اراسىندا زور قوشەمەتكە يە. كلاسسيكالىق مۋزىكا كەشىنە يتاليادان ارنايى شاقىرىلعان باندونەونشى ماريو ستەفانو پەتروداركيدىڭ قاتىسۋى ايتۋلى ونەر كەشىنىڭ كورىگىن قىزدىرادى دەپ كۇتىلۋدە. وتانىنان بولەك انگليا, فرانتسيا, بەلگيا, حورۆاتيا, سەربيا, گەرمانيا, اقش, پولشا, پورتۋگاليا, فينليانديا, شۆەيتساريا, ۆەنگريا, كانادا, ارمەنيا, رەسەي, بوسنيا جانە گەرتسەگوۆينا, بولگاريا, تۇركيا, ليۆان, بەلارۋس, قىتاي سىندى ونەرى ورىستەپ تۇرعان ەلدەردە ابىرويعا بولەنىپ جۇرگەن مۋزىكا مايتالمانىنىڭ بۇل – «استانا وپەراداعى» العاشقى كەشى.
VII تەاتر ماۋسىمىنىڭ ۇلكەن جاڭالىعىنا اينالادى دەپ كۇتىلىپ وتىرعان كونتسەرتتە ماريو ستەفانو پەتروداركيمەن بىرگە ساحنادا «استانا وپەرا» سيمفونيالىق وركەسترىنىڭ ءسوليسى ءارى كونتسەرتمەيستەرى, قازاقستاننىڭ ەڭبەك سىڭىرگەن قايراتكەرى باعدات ءابىلحانوۆ, وركەستر ءسوليسى ايسۇلۋ بايكەنوۆا, ۆيولونچەلشى قۇربانجان احاتوۆ, سونداي-اق قازاقستاندىق جاس پيانيست ەرلان سەركەباەۆ ونەر كورسەتەدى. كەش باعدارلاماسىنا تانىمال قازاقستاندىق كومپوزيتور ارتىق توقسانباەۆتىڭ فورتەپيانو, سكريپكا جانە ۆيولونچەلگە ارنالعان «دالا ناقىشتارى» تريوسى مەن ايگىلى ارگەنتينالىق كومپوزيتور استور پياتستسوللانىڭ «بۋەنوس-ايرەستەگى جىلدىڭ ءتورت مەزگىلى» جانە «تانگو تاريحى» تۋىندىلارى ەنىپ وتىر. «استانا وپەرا» تەاترىنىڭ كامەرالىق زالىندا وتەتىن كلاسسيكالىق مۋزىكا كەشىنىڭ ديريجەر تۇعىرىندا بەلگىلى ديريجەر, قازاقستاننىڭ ەڭبەك سىڭىرگەن قايراتكەرى ابزال مۇحيتدينوۆ ونەر كورسەتەدى.
