بۇل رەتتە اسىرەسە ءبىلىم مەن دەنساۋلىق سالالارىنداعى ءتۇرلى تۇيتكىلدەردىڭ ءتۇيىنىن تارقاتۋ ماڭىزدى. اسىرەسە, اپاتتى جاعدايداعى مەكتەپتەردى انىقتاپ رەتكە كەلتىرۋ, بالاباقشا ماسەلەسىن جولعا قويۋ, شاھارداعى كولىك كەپتەلەگى مەن ەكولوگيالىق احۋالدى رەتتەۋ كەزەك كۇتتىرمەي شەشىمىن تابۋى قاجەت.
كۇن ساناپ اۋماعى ءوسىپ جاتقان الىپ مەگاپوليستەگى مادەني نىسانداردىڭ سانى مەن ساپاسىن ارتتىرۋ ماسەلەسىنە كوڭىل ءبولۋ كەرەكتىگىن ايتقان پرەزيدەنت قالاداعى الاتاۋ, ناۋرىزباي اۋداندارىنداعى حالىقتىڭ ينفراقۇرىلىمدىق قاجەتتىلىكتەرىن قاناعاتتاندىرۋدى تاپسىردى.
شاھاردا ءالى دە جارىقتاندىرىلماعان كوشەلەر بار ەكەنىن, ارىق جۇيەسىن جەتىلدىرۋ ءىسىن ءجىتى قولعا الۋ كەرەكتىگىن تىلگە تيەك ەتكەن مەملەكەت باسشىسى باسقا دا بىرقاتار ناقتى تاپسىرمالار بەردى.
