اڭداعانىمىزداي, قوعام نازارىن وزدەرىنە اۋدارعان بۇل ازاماتتار قالاداعى رىسقۇلوۆ پەن ەمتسوۆ كوشەلەرىنىڭ قيىلىسىنداعى قۇرىلىسى ساعىزشا سوزىلىپ, بۇل كۇندە تۇرالاپ قالعان اسپالى جولدا جۇمىس ىستەگەن ەڭبەككەرلەردىڭ ءبىر توبى عانا. ولاردىڭ ساپىندا 8-9 اي بويى ەڭبەگىنىڭ وتەۋىن الا الماي جۇرگەندەر بار. ولار «قانشا ۋاقىتتان بەرى ۋادەگە تويدىق, مۇنداي جاعدايعا قارىن اشىپ, قادىر قاشقاننان باردىق» دەپ وتىر. ايتۋلارىنشا, الىپ كومپانيا ولارعا وسى ايدىڭ 11-نە دەيىن جالاقىلارى تولىق تولەنەتىنىن ۋادە ەتكەن. الايدا «اكىمدىك اقشا اۋدارماي جاتىر» دەگەن جەلەۋمەن جالاقى جايى تاعى دا كەيىنگە شەگەرىلىپتى. جاعدايعا قاتىستى تۇسىنىكتەمە بەرگەن جەرگىلىكتى بيلىك وكىلدەرى مەردىگەر فيرما الدىندا ەشقانداي قارىزىمىز جوق دەگەن بولاتىن.
– كىمگە سەنەرىمىزدى بىلمەي دال بولدىق. بۇگىن مۇندا نارازىلىعىمىزدى ءبىلدىرىپ الماتى ماڭىندا تۇراتىن 32 ازامات قانا كەلىپ وتىرمىز. بىزگە «ا. ريازانوۆ اتىنداعى №25 كوپىر قۇرىلىسى جاساعى» كومپانياسى 18,3 ملن تەڭگە قارىز. بىزدەن بولەك باسقا وڭىرلەردەن كەلىپ جۇمىس ىستەگەن قانشاما قۇرىلىسشىلار بار. قولىمىزدا 102 ازاماتتىڭ ءتىزىمى تۇر. كومپانيا ولاردىڭ اربىرىنە ورتا ەسەپپەن 1 ملن تەڭگەدەن بەرەشەك. ءوزىم 1 ملن 200 مىڭ تەڭگە كولەمىندە ەڭبەكاقىمدى الا الماي سەندەلىپ ءجۇرمىن. بارماعان جەر, باسپاعان تاۋىمىز قالمادى. انە-مىنە, بۇگىن-ەرتەڭگە سالىپ ۋادە بەرىپ شىعارىپ سالادى. قانشاما ۋاقىتتان بەرى ادال ەڭبەگىمىزدىڭ اقىسىن الا الماي ابىگەرگە تۇستىك, – دەيدى قۇرىلىسشى اسلان ءجابرايىلوۆ.
اسلان بۇعان دەيىن 5 جىل قاتارىنان اتالعان كومپانيانىڭ قۇرامىندا جۇمىس ىستەگەنىن, دەگەنمەن بۇرىندارى جالاقىلارى ازار بولسا 1-2 ايعا عانا كەشىگەتىنىن, بۇل جولى ماسەلەنىڭ سيىرقۇيىمشاقتانىپ كەتكەنىنە قاتتى الاڭداپ جۇرگەندىكتەرىن ايتادى.
جۇمىسشىلاردان تۇسىنىستىك تانىتۋدى وتىنگەن مەردىگەر كومپانيانىڭ باسشىسى مۇنداي تۇيتكىلدەر كەز كەلگەن مەكەمەدە بولاتىنىن, سوندىقتان قىزمەتكەرلەرىنەن جاعدايدى ۋشىقتىرماي اي سوڭىنا دەيىن كۇتۋلەرىن سۇرادى.
«بۇگىنگە دەيىن قۇر الاقان وتىرعان جوقپىز. كورىپ وتىرعاندارىڭىزداي, جۇمىس توقتاپ قالدى. اكىمدىكتەن ەكى ايعا عانا قاراجات ءتۇستى. ەندى تەحنيكالارىمدى ساتۋعا ءماجبۇرمىن. قۇرىلىسشىلار سوتقا بەرسە ءوز جالاقىلارىن ءوندىرىپ الا الادى. كىشكەنە سابىرلىق سۇرايمىن. اعىمداعى ايدىڭ 29-30 كۇندەرى جالاقى تولەنەدى» دەدى كومپانيا ديرەكتورى تيمۋر ناكۋسوۆ.
وقيعا ورنىنا جەتكەن ەڭبەك قاۋىپسىزدىگىن باقىلاۋ ءبولىمىنىڭ باسشىلىعى مەن الماتى قالاسىنىڭ الەۋمەتتىك ءال-اۋقات باسقارماسىنىڭ وكىلدەرى قىزمەتكەرلەرگە ەڭبەك زاڭناماسىنىڭ نورمالارى تۇرعىسىندا ءتۇسىندىرۋ جۇمىستارىن جۇرگىزدى. جاۋاپتى ماماندار اتالعان فاكتى بويىنشا الماتى وبلىسىنىڭ ەڭبەك ينسپەكتسياسى تاراپىنان جوسپاردان تىس تەكسەرىس جۇرگىزىلگەنىن, جۇمىس بەرۋشى تاراپ اكىمشىلىك جاۋاپكەرشىلىككە تارتىلاتىنىن اتاپ ءوتتى.
«بۇزۋشىلىقتاردى جويۋ تۋرالى ۇيعارىمدار بەرىلدى. بۇگىندە نۇسقامالار ورىندالماعان. تەكسەرۋ ماتەريالدارى قر قك 152-بابى بويىنشا شەشىم قابىلداۋ ءۇشىن قۇقىق قورعاۋ ورگاندارىنا جىبەرىلدى», دەپ حابارلادى قالا اكىمدىگى. جوعارىدا تىلگە تيەك ەتكەنىمىزدەي, ۆەدومستۆودا ولاردىڭ تاپسىرىس بەرۋشىلەر رەتىندە مەردىگەر ۇيىمنىڭ باسشىلىعىمەن تولىق ەسەپ ايىرىسقانى ايتىلعان.
ازىرگە ءوزارا كەلىسىمگە كەلگەن تاراپتار مامىلەمەن تارقاسقانداي بولدى. دەسە دە سابىرى سارقىلىپ, ءتوزىمى تاۋسىلعان قۇرىلىسشىلار اي سوڭىنا دەيىن كەزەكتى ۋادە ورىندالماسا تاعى دا باس كوتەرىپ, ادال ەڭبەگىمىزدى داۋلاپ تالاي تابالدىرىقتى توزدىرامىز دەپ وتىر. جۇرتتى ابىگەرگە سالعان ەڭبەك داۋى كوپ ۇزاماي وڭ شەشىمىن تابادى دەگەن سەنىمدەمىز.
الماتى
