15 قازان كۇنى الماتى قالاسىنداعى رەسپۋبليكا سارايىندا جانە 30 قازاندا نۇر-سۇلتان قالاسىنداعى «قازاقستان» ورتالىق كونتسەرت زالىندا قۇرمانعازى وركەسترىنىڭ 85 جىلدىق مەرەيتويىنا ارنالعان سالتاناتتى كونتسەرت وتەدى.
سالتاناتتى كونتسەرتتە اتى الەمگە ايگىلى قۇرمانعازى وركەسترىمەن كسرو حالىق ءارتيسى ب.تولەگەنوۆا, قازاقستاننىڭ حالىق ارتيستەرى ن.ءنۇسىپجانوۆ, م.ءجۇنىسوۆا, ا.قورازباەۆ, ن.ۇسەنباەۆا, قازاقستاننىڭ ەڭبەك سىڭىرگەن قايراتكەرلەرى س.بايعوجين, ت.اسار, ا.قوسانوۆا, ب.مىقتىباەۆ, س.مايعازيەۆ جانە تاعى دا باسقا ونەر مايتالماندارى ساحنا تورىنە شىعادى.
ايتا كەتەيىك, كەزىندە قازاقستان رەسپۋبليكاسىنىڭ تۇڭعىش پرەزيدەنتى – ەلباسى ن.ءا. نازارباەۆ «قازاقتىڭ ءىنجۋ – مارجانى» - دەپ اتاعان وركەستر بۇگىندە بۇكىل الەمگە حالقىمىزدىڭ مۋزىكالىق ونەرىن, بىرەگەي مۋزىكالىق اسپاپتارىن جانە ۇلى دالا اۋەنىنىڭ پاك سۇلۋلىعىن تانىتىپ كەلەدى.
وركەستردىڭ شەت مەملەكەتتەردەگى قازاقستاننىڭ مادەنيەت كۇندەرىندە, الەمنىڭ ۇزدىك زالدارىنداعى جەكە شىعارماشىلىق گاسترولدەرىندە, سونداي-اق قازاقستان رەسپۋبليكاسى پرەزيدەنتىنىڭ قاتىسۋىمەن مەملەكەتتىك كونتسەرتتەردە لايىقتى دەڭگەيدە ونەر كورسەتىپ كەلە جاتقانى بارشاعا ءمالىم.
قۇرمانعازى وركەسترى قازاقستاننىڭ اسپاپتىق مۋزىكالىق ونەر تاريحىندا بىرەگەي ءارى تۇڭعىش وركەستر. ول بۇكىل الەمگە قازاق حالقىنىڭ مۋزىكالىق ونەرىن, بىرەگەي قازاق مۋزىكالىق اسپاپتارىن جانە دالا اۋەنىمەن سۇلۋلىعىن تانىتقان ۇجىم.
وركەستر رەسمي تۇردە 1934 جىلدىڭ 23 ساۋىرىندە قازسسر اعارتۋ حالكومى №425 بۇيرىعىمەن قىزمەتىن باستاعان. ءدال سول كۇنى احمەت جۇبانوۆ وركەستردىڭ ديريجەرى جانە كوركەمدىك جەتەكشىسى قىزمەتىنە تاعايىندالعان. وركەستردىڭ تريۋمفالدى قويىلىمدارى 1936 جانە 1958 جىلدارى كسرو ۇلكەن تەاترىندا 2-ءشى قازاق ونەرىنىڭ ونكۇندىگىنىڭ قورىتىندى كونتسەرتىندە, 2006 جىلى وركەستردىڭ نەگىزىن سالعان احمەت جۇبانوۆتىڭ 100 جىلدىق مەرەيتويىنا ارنالعان پاريجدە يۋنەسكو شتاب-پاتەرىنىڭ ۇلكەن زالىندا, ەۆروپا, امەريكا, قىتاي حالىق رەسپۋبليكاسى, قازاقستان جانە بۇۇ ەلدەرىنىڭ ءىرى قالالارىندا بولعان گاسترولدىك كونتسەرتتەردە بولدى.
1953 جىلى بۋحارەستتە (رۋمىنيالىق حالىقتىق رەسپۋبليكا) شامگون قاجىعاليەۆتىڭ جەتەكشىلىگىمەن وركەستر دەموكراتيالىق جاستار جانە ستۋدەنتتەردىڭ بۇكىلالىمدىك IV فەستيۆالىنىڭ لاۋرەاتى اتاندى جانە التىن مەدالمەن ماراپاتتالدى. 1944 جىلى قۇرىلعانىنا 10 جىل تولۋىنا وراي وركەسترگە ايگىلى كۇيشى قۇرمانعازى ەسىمى بەرىلدى, 1967 جىلى – «قر ەڭبەك سىڭىرگەن ۇجىمى», 1978 جىلى – اكادەميالىق وركەستر اتاعى بەرىلگەن. ال 1984 جىلى وركەستر «حالىقتار دوستىعى» وردەنىمەن ماراپاتتالدى.
ءار جىلدارى وركەستر قۇرامىندا قازاق ونەرىنىڭ ايگىلى مۋزىكانتتارى – وركەستر شەجىرەسىندە ەسىمدەرى التىن ارىپتەرمەن جازىلعان ورىنداۋشىلار مەن ديريجەرلار ەڭبەك ەتتى. سولاردىڭ ىشىندە ەرەكشە قۇرمەتكە يە تۇلعا, وركەستردىڭ ۇيىمداستىرۋشىسى, ءبىرىنشى كوركەمدىك جەتەكشىسى, باستى ديريجەرى – قازاقستاننىڭ حالىق ءارتيستى, كومپوزيتورى, اكادەميك, پروفەسسورى احمەت قۋان ۇلى جۇبانوۆ.
كەزىندە وركەسترگە مۇقان تولەباەۆ, ن.تىلەنديەۆ, ا.مىرزابەكوۆ, ل.ا. حاميدي, ق.مۋسين, ل.م. شارگورودسكي ديريجەرلىك ەتتى. 1950 جىلدان وركەستردىڭ كوركەمدىك جاعىن ش.س. قاجىعاليەۆ (1950 – 60; 1964 – 68 جانە 1971 جىلدان) باسقارىپ, باس ديريجەرى بولدى. وركەستردىڭ قازىرگى باس ديريجەرى- ابىلاي تلەپبەرگەن. ونەر ۇجىمىنىڭ رەپەرتۋارلىق قورىندا 4000-نان اسا تۋىندى بار.
