قازاقستان • 09 قازان، 2019

«جاس ناتۋراليستەر» ۇيىرمەسىندە قازاق توبى اشىلدى

84 رەتكورسەتىلدى

الماتىداعى حايۋاناتتار باعىندا جوعارى وقۋ ورىندارى ستۋدەنتتەرىنىڭ تاجىريبەلىك ساباقتارىمەن قاتار مەكتەپ وقۋشىلارىنا ارنالعان «جاس ناتۋراليستەر» ۇيىرمەسى ءبىرازدان بەرى جۇمىس ىستەپ كەلەدى.

جابايى جانۋارلاردى تانىستىرىپ، جاراتىلىستانۋ ءبىلىمىن، سونداي-اق تابيعاتتى قورعاۋدى ناسيحاتتاۋمەن قاتار سيرەك كەزدەسەتىن، جويىلىپ بارا جاتقان اڭ-قۇستاردىڭ گەندىك قورىن ساقتاپ قالۋدى ماقسات ەتەتىن ۇيىرمە جۇمىسىنا مەكتەپ وقۋشىلارىن كوپتەپ قاتىستىرۋ  حايۋاناتتار باعى ماماندارىنىڭ تۇراقتى نازارىندا. وسى ماقساتتا الەۋمەتتىك جەلىلەر مەن اقپارات قۇرالدارىندا حايۋاناتتار باعىنداعى جانۋارلار الەمىن تانۋعا ەرەكشە قىزىعۋشىلىعى بار بالالاردى ۇيىرمەگە قابىلداۋ تۋرالى ۇنەمى اقپاراتتار جارىق كورىپ كەلەدى. عىلىمي-ادىستەمەلىك ءبولىمىنىڭ مامانى ۇلجانار الىلاەۆانىڭ ايتۋىنشا، ۇيىرمەدە  بالالار قورشاعان ورتانى، ونىڭ ىشىندە جانۋارلار الەمىن تانۋىنا مول مۇمكىندىك الىپ، تابيعاتقا دەگەن مەيىرىممەن وسەتىن بولادى.

سەكسەن جىلدان استام تاريحى بار حايۋاناتتار باعىنىڭ قۇرىلۋى جانۋارلار الەمىن ءجىتى تانىعان مامان مىرزاحان تولەباەۆتىڭ ەسىمىمەن تىعىز بايلانىستى. بۇگىندە قاراعاندى، شىمكەنتتە حايۋاناتتار باعى بار  دەسەك، الماتىداعى باق ەڭ كولەمدىسى سانالادى. العاشقى جىلداردا حايۋاناتتار باعىنا ءبىردى-ەكىلى تاۋ ەشكى، ارقار، تۇلكى، قاراقۇيرىق، قاسقىر، ت.ب. اكەلىنسە، كەيىننەن ولاردىڭ قاتارى تولىعىپ 70-كە جۋىقتاعان. ال بۇگىنگى كۇننىڭ دەرەكتەرى اكۆاريۋم، ەكزوتاريۋم، قۇستار، جىرتقىشتار، تۇياقتىلار، پريماتتار ءتارىزدى 6 سەكتسيادا 377 تۇرگە جاتاتىن 3453 باس جانۋاردىڭ بار ەكەندىگىن راستايدى. ولاردىڭ ارقايسىسىندا كاسىبي ماماندار، عىلىمي قىزمەتكەرلەر جانۋارلار الەمىن زەرتتەۋمەن اينالىسىپ كەلەدى. جانۋارلاردىڭ مىنەز-قۇلقى، قورشاعان ورتامەن اسەرى، ت.ب. مامانداردىڭ تۇراقتى نازارىندا. قازىرگى كەزدە دەمەۋشىلەردىڭ قولداۋىمەن حايۋاناتتار الەمىن قىزىقتاۋعا كەلۋشىلەرگە دە قولايلى جاعدايلار جاسالۋدا. ارنايى مەديتسينالىق تىرەكتەرمەن قاتار انا مەن بالاعا ارنالعان بولمەلەر دە جاساقتالىپ،  جەكەلەگەن اڭدار ءۇشىن زاماناۋي ورىندار جاسالۋدا.

مۇندا قولعا تەز ۇيرەنەتىن مايمىلدار، تۇيەلەر، تاسباقا، ت.ب. دا جانۋارلاردى تانۋ بالالار ءۇشىن اسا قىزىقتى. اپتاسىنا ەكى رەت وتەتىن ۇيىرمەنىڭ قازاق توبىنا 5-12 جاس ارالىعىنداعى بالالار قابىلدانۋدا. قازىرگى كەزدە قازاق توبىندا جيىرمادان استام بالا بار.ۇيىرمەنىڭ العاشقى دارىسىندە بالالار جانۋارلار باعىنىڭ تاريحىمەن تانىسىپ، اڭ-قۇستار تۋرالى قىزىقتى مالىمەتتەر الدى.

سوڭعى جاڭالىقتار

ۇقساس جاڭالىقتار