اتالعان كوميسسيانىڭ توراعاسى قۋانىش سۇلتانوۆتىڭ باسشىلىعىمەن وتكەن جيىندا ادام قۇقىقتارى جونىندەگى كوميسسيا مۇشەلەرى, نۇر-سۇلتان قالاسى اكىمىنىڭ ورىنباسارى ەرمەك قيزاتوۆ جانە «استانا سۋ ارناسى» مكك باس ديرەكتورى تابيعات زەينۇلقابدەن ءوز باياندامالارىن جاسادى. وتىرىسقا زاڭ شىعارۋشى, اتقارۋشى ورگان جانە سوت وكىلدەرى, «استانا سۋ ارناسى» مكك-ءنىڭ, حالىقارالىق جانە ۇكىمەتتىك ەمەس ۇيىمداردىڭ وكىلدەرى قاتىستى.
كوميسسيا مۇشەلەرى ەلدىڭ سۋ رەسۋرستارىن ۇلتتىڭ گەندىك قورىن ساقتاۋعا قىزمەت ەتەتىن ماڭىزدى ستراتەگيالىق وبەكتىلەر رەتىندە قورعاۋدىڭ ماڭىزدىلىعىن ەرەكشە اتاپ ءوتتى. ەلوردا حالقىن ساپالى سۋمەن قامتاماسىز ەتۋدىڭ, تۇتىنۋشىلاردىڭ قۇقىقتارىن ساقتاۋ ماسەلەلەرى مەن ولاردى شەشۋدىڭ جولدارى تالقىلاندى. وتىرىسقا قاتىسقاندار ءوز ۇسىنىستارىن ءبىلدىرىپ, «استانا سۋ ارناسى» مكك-ءنىڭ جۇمىسىنا قاتىستى ويلارىمەن ءبولىستى.
بايانداما جاساعاندار ينفراقۇرىلىمدىق مىندەتتەردى – جاڭا جانە ساپالى سۋ الۋ قۇرىلعىلارىن, سۋ قۇبىرلارىن, كوممۋنالدىق جەلىلەر سالۋ ارقىلى سۋدىڭ جەتكىزىلۋىن قامتاماسىز ەتۋ مىندەتتەرىن شەشۋدىڭ قاجەتتىگىن اتاپ ءوتتى.
جيىن بارىسىندا كوميسسيا مۇشەلەرى مەن ساراپشىلار استانا تۇرعىندارىن اۋىز سۋمەن تولىق قامتاماسىز ەتۋ, سونداي-اق تاريفتىك جوسپاردى قايتا قاراۋ ماسەلەسىن تالقىلادى. «استانا سۋ ارناسى» مكك باس ديرەكتورى تابيعات زەينۇلقابدەننىڭ ايتۋىنشا, نۇر-سۇلتان قالاسىنىڭ اۋىز سۋ ءتاريفى رەسپۋبليكا بويىنشا 11-ورىندا. سونىمەن قاتار ۇيىم باسشىسى قازىرگى كەزدە ارنايى ءبىلىمى بار تەحنيكالىق مامانداردىڭ جەتىسپەۋشىلىگى بارىن ايتىپ ءوتتى.
وعان قوسا, كوميسسيا وتىرىسىندا 16-27 قىركۇيەك ارالىعىندا ۆارشاۆا قالاسىندا وتكەن ەقىۇ جىل سايىنعى كەڭەسىنىڭ قورىتىندىلارى تالقىلاندى. قۋانىش سۇلتانوۆ تۇجىرىمدار مەن ۇسىنىستار مەملەكەت باسشىسىنىڭ, پارلامەنت پەن ۇكىمەتتىڭ نازارىنا جەتكىزىلەتىنىن مالىمدەدى.
