قاتەرلى ىسىككە شالدىققان ناۋقاستار بۇدان بىلاي دياگنوستيكالىق تەكسەرۋدەن ءوتۋ ءۇشىن ونكولوگيالىق ورتالىقتاعى «پەت» ورتالىعىنىڭ قىزمەتىنە جۇگىنە الادى. جاڭا تەكسەرۋ ورتالىعىنىڭ جۇمىسىن ىسكە اسىرۋ ءۇشىن قالا اكىمى ەرلان ايتاحانوۆ تۇرىك كومپانياسىمەن كەلىسسوز جۇرگىزىپ, ەكىجاقتى مەموراندۋمعا قول قويدى.
مەموراندۋم اياسىندا تۇرىك ينۆەستورلارى قالالىق ونكولوگيالىق ورتالىققا سوڭعى ۇلگىدەگى زاماناۋي پوزيتروندى-ەميسسيوندى توموگرافيا جانە تسيكلوترون قوندىرعىسىن ورناتادى. تسيكلوترون اپپاراتى ناۋقاستارعا قاجەتتى راديوفارمپرەپاراتتاردى دايىنداۋ ماقساتىندا ورناتىلۋدا. جالپى جوبا قۇنى 2,7 ملرد تەڭگەنى قۇرايدى.
بۇل قۇرال-جابدىقتى ورناتۋ ارقىلى جىلىنا ورتاشا ەسەپپەن 10 مىڭ ادامنان ونكولوگيالىق اۋرۋلاردىڭ تارالۋىن ەرتە ساتىسىندا انىقتاپ, ءولىم-ءجىتىم كورسەتكىشىن ەداۋىر ازايتۋعا مۇمكىندىك بەرەدى. ايتا كەتەيىك, تۇرىك كومپانياسىنىڭ جوباسى بويىنشا مەملەكەتتىك بيۋدجەت ەسەبىنەن قوسىمشا قارجى بولىنبەيدى. ينۆەستور ءوز قاراجاتى ەسەبىنەن جابدىقتاردى ساتىپ الىپ, نىساندى جالعا الۋ ارقىلى حالىققا تەگىن مەديتسينالىق قىزمەت كورسەتەدى.
قاتەرلى ىسىك اۋرۋى ەرتە ساتىسىندا انىقتالعان جاعدايدا ساۋىعىپ كەتۋ مۇمكىندىگى مول بولادى. ال «پەت» قۇرال جابدىعى قاتەرلى دەرت انىقتالعان جاعدايدا اسقىندىرماي, ەمدى ەرتە باستاۋعا مۇمكىندىك بەرەدى.
بۇگىنگە دەيىن دياگنوستيكادان ءوتۋ ءۇشىن ناۋقاستار 2-3 اي ۋاقىتقا دەيىن كەزەك كۇتىپ, نۇر-سۇلتان, الماتى قالالارىنا بارۋىنا تۋرا كەلەتىن. ال پەت/كت قۇرال-جابدىعىن ورنالاستىرعاننان كەيىن دياگنوستيكانى قاجەت ەتەتىن پاتسيەنتتەر وزگە قالاعا سابىلماي-اق شىمكەنت قالاسىنداعى ونكولوگيالىق ورتالىققا بارىپ, قاجەتتى تەكسەرۋدەن وتە الادى. پەت قۇرال-جابدىعى كۇنىنە 30 ادامعا دەيىن قابىلداي الادى.
شىمكەنت قالاسىنداعى ونكولوگيا ورتالىعىندا ناۋقاستاردىڭ 100 پايىزى زەرتتەۋدىڭ بۇل ءتۇرىن مەديتسينالىق كومەكتىڭ كەپىلدەنگەن كولەمى شەڭبەرىندە تەگىن وتەدى.
شىمكەنت
