بۇل تۋرالى وبلىس اكىمى ومىرزاق شوكەەۆ تۇركىستاندا وتكەن ۇستازداردىڭ كاسىبي مەرەكەسىنە ارنالعان سالتاناتتى جيىندا ءمالىم ەتتى. سالتاناتتى شاراعا ءوڭىردىڭ 400-دەن استام ءبىلىم بەرۋ سالاسىنىڭ وكىلدەرى قاتىستى. ۇرپاق تاربيەلەۋدە تالماي ەڭبەك ەتىپ جۇرگەن ۇستازداردىڭ ءتول مەرەكەسىنە ارنالعان «مەرەكەلەرىڭىزبەن, ۇلاعاتتى ۇستازدار!» اتتى شارانىڭ شىمىلدىعى «اباي وسيەتى» تەاترلىق كورىنىسىمەن اشىلدى. وبلىس اكىمى ومىرزاق شوكەەۆ ۇستازدار قاۋىمىنا ءوز العىسىن ءبىلدىرىپ, مەرەكەسىمەن قۇتتىقتادى. تۇلعا بولىپ قالىپتاسۋعا ىقپال ەتكەن مەكتەپ مۇعالىمدەرىن ەسكە الىپ, ولارعا دەگەن جىلى لەبىزىن ءبىلدىردى. ەلدىڭ ەرتەڭىن ايقىندايتىن, ونىڭ باسەكەلەستىك قابىلەتىنە ىقپال ەتەتىن اسا ماڭىزدى سالا مايتالماندارى تۇركىستان وبلىسى اكىمىنىڭ قۇرمەت گراموتاسىمەن, العىس حاتىمەن ماراپاتتالدى. ال ارداگەر ۇستازدارعا وبلىس اكىمىنىڭ اتىنان ارنايى سىيلىقتار مەن گۇل شوقتارى ۇسىنىلدى. سونداي-اق «جاستار جىلىنا» وراي وتكەن «ۇزدىك جاس مۇعالىم-2019» وبلىستىق بايقاۋىنىڭ جەڭىمپازدارىنا دا ماراپاتتار تابىس ەتىلدى.
بۇگىندە وبلىستا 60 مىڭعا جۋىق پەداگوگ ەڭبەك ەتىپ كەلەدى. بىلتىر ءوڭىردىڭ 150-گە جۋىق وقۋشىسى حالىقارالىق جانە رەسپۋبليكالىق دەڭگەيدەگى ءبىلىم سايىستارىندا جۇلدەلى ورىندارعا يە بولدى. ال جاقىندا وتكەن «ۇزدىك پەداگوگ-2019» رەسپۋبليكالىق بايقاۋىنا وبلىستان 9 ۇستاز قاتىسىپ, ۇشەۋى ءبىلىم سايىسىنىڭ وزىعى اتاندى. سالتاناتتى ءراسىم كونتسەرتتىك باعدارلامامەن جانە تەاترلاندىرىلعان قويىلىمدارمەن جالعاستى.
تۇركىستان وبلىسى
