وتىرىستا وڭىرلەردى دامىتۋدىڭ 2020 جىلعا دەيىنگى مەملەكەتتىك باعدارلاماسىن ىسكە اسىرۋعا بولىنگەن قارجىنىڭ ءتيىمدى پايدالانۋ ماسەلەسى تالقىلاندى.
ۇلتتىق ەكونوميكا مينيسترلىگىنىڭ, رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ, باس پروكۋراتۋرانىڭ, سىبايلاس جەمقورلىققا قارسى ءىس-قيمىل اگەنتتىگىنىڭ جانە بىرقاتار ءوڭىر اكىمدەرىنىڭ باياندامالارى تىڭدالدى.
وڭىرلەردە مەملەكەتتىك باعدارلامانى جۇزەگە اسىرۋ بارىسىندا تۇرعىن ءۇي-كوممۋنالدىق شارۋاشىلىعى جانە اۋىز سۋمەن قامتاماسىز ەتۋ سالالارىندا سىبايلاس جەمقورلىققا قاتىستى جوعارى تاۋەكەلدەر بار ەكەنى انىقتالدى.
اتاپ ايتقاندا, پروكۋراتۋرا ورگاندارى ەلىمىزدىڭ التى ءوڭىرى بويىنشا قارجى جىمقىرۋ جانە ماقساتسىز جۇمساۋ فاكتىلەرى بويىنشا جالپى سوماسى 5,3 ملرد تەڭگەنى قۇرايتىن مەملەكەتتىك قاراجاتتىڭ ىسىراپ بولعانىن انىقتاعان, ودان مەملەكەتكە 730 ملن تەڭگە كولەمىندە زارداپ كەلگەن. وسى فاكتىلەر بويىنشا 7 سوتقا دەيىنگى تەرگەۋ جۇمىستارى باستالىپ, 267 ملن تەڭگە قايتارىلعان.
سىبايلاس جەمقورلىققا قارسى ءىس-قيمىل اگەنتتىگى 2017 جىلدان باستاپ سىبايلاس جەمقورلىق بويىنشا 145 قىلمىستى انىقتادى, قىلمىس جاساعانى ءۇشىن 78 ادام قىلمىستىق جاۋاپكەرشىلىككە تارتىلىپ, 59-ى سوتتالدى. مەملەكەتكە كەلتىرگەن 931,9 ملن تەڭگە زارداپ سوماسىنىڭ 907,6 ملن تەڭگەسى قايتارىلدى.
باعدارلامانى ىسكە اسىرۋ كەزەڭى بويىنشا قارجى مينيسترلىگىنە قاراستى قارجى مونيتورينگى كوميتەتى ەكونوميكالىق تەرگەۋ قىزمەتىنىڭ وندىرىسىندە 33 قىلمىستىق ءىس قارالعان.
قارجى مينيسترلىگىنىڭ ىشكى مەملەكەتتىك اۋديت كوميتەتى 10 لاۋازىمدى تۇلعانى قۇقىق بۇزۋشىلىق بويىنشا اكىمشىلىك جاۋاپكەرشىلىككە, 22 تۇلعانى تارتىپتىك جاۋاپكەرشىلىككە تارتتى. پروتسەسستىك شەشىم قابىلداۋ ماقساتىندا قۇقىق قورعاۋ ورگاندارىنا جالپى سوماسى 5,7 ملرد تەڭگەنى قۇرايتىن 24 ءىس جىبەرىلدى.
2019 جىلى كامەرالىق باقىلاۋ جالپى سوماسى 42,8 ملرد تەڭگەنى قۇرايتىن مەملەكەتتىك ساتىپ الۋدىڭ 45 پروتسەدۋراسىن قامتىپ, جالپى سوماسى 39,1 ملرد تەڭگەنى قۇرايتىن 42 پروتسەدۋرا بويىنشا مەملەكەتتىك ساتىپ الۋ زاڭدىلىعىن بۇزۋ جاعدايلارى انىقتالعان.
كوميسسيا وتىرىسىنىڭ قورىتىندىسى بويىنشا مەملەكەتتىك حاتشى قۇقىق بۇزۋشىلىققا جول بەرگەن سەبەپتەردى جويۋعا جانە ولاردىڭ الدىن الۋعا باعىتتالعان ناقتى شارالاردى قابىلداۋدى تاپسىردى. مەملەكەتكە تيگىزگەن زارداپتى وتەۋ ماسەلەسىنە دە ەرەكشە نازار اۋداردى.
سونىمەن قاتار كوميسسيا مەملەكەتتىك باعدارلامانى ارى قاراي ىسكە اسىرۋ ءۇشىن جانە مەملەكەت باسشىسىنىڭ تاپسىرمالارىن ورىنداۋ بارىسىندا سىبايلاس جەمقورلىق كورىنىستەرىنىڭ الدىن الۋعا باعىتتالعان ناقتى ۇسىنىستار دايىنداپ, ءتيىستى مەملەكەتتىك ورگاندارعا جىبەردى.
