بۇل تۋرالى وبلىس اكىمى ومىرزاق شوكەەۆ ۇستازداردىڭ كاسىبي مەرەكەسىنە ارنالعان سالتاناتتى جيىندا ءمالىم ەتتى. سونداي-اق وبلىس اكىمىنىڭ مالىمدەۋىنشە, تولە بي اۋدانىندا «Bi group» كومپانياسى بالالاردى جوعارى وقۋ ورىندارىنا دايىندايتىن 200 ورىندىق ورتالىق سالىپ بەرمەك. «بولاشاق» سەكىلدى ارنايى باعدارلاما جاسالىپ بىلىكتى مۇعالىمدەر جوعارى سىنىپ وقۋشىلارىن ۋنيۆەرسيتەتتەرگە دايىندايتىن بولادى. سالتاناتتى جيىندا ومىرزاق ەستاي ۇلى بالالىق شاعىندا ءبىلىم بەرگەن ۇستازدارىن دا ەسكە الىپ ءوتتى. بايدىبەك اۋدانىنىڭ ورتالىعى شاياندا العان بىلىمىمەن شەتەلدە وقۋ قيىندىق تۋدىرماعاندىعىن جەتكىزدى.
مەرەكەلىك جيىندا قىزمەت بابىندا ۇزدىك دەپ تانىلعان ۇستازدار تۇركىستان وبلىسى اكىمى مەن ءماسليحاتىنىڭ «قۇرمەت گراموتاسىمەن», «العىس حاتىمەن», تۇركىستان وبلىستىق ادامي الەۋەتتى دامىتۋ باسقارماسى مەن وبلىستىق كاسىپوداق كوميتەتىنىڭ «قۇرمەت گراموتاسىمەن», قازاقستان سالالىق ءبىلىم جانە عىلىم قىزمەتكەرلەرى كاسىپتىك وداعىنىڭ ء«بىلىم جانە عىلىم قىزمەتكەرلەرىنىڭ كاسىپتىك وداعىنا سىڭىرگەن ەڭبەگى ءۇشىن» بەلگىسىمەن ماراپاتتالدى. ال ارداگەر ۇستازدارعا وبلىس اكىمىنىڭ اتىنان ارنايى سىيلىقتار مەن گۇل شوقتارى ۇسىنىلدى. جاستار جىلىنا وراي جاس مۇعالىمدەردىڭ ءوزىن - ءوزى جەتىلدىرۋىنە, كاسىبي جانە شىعارماشىلىق الەۋەتىن دامىتۋعا جاعداي جاساۋ ماقساتىندا وتكىزىلگەن «ۇزدىك جاس مۇعالىم-2019» وبلىستىق بايقاۋىنىڭ جەڭىمپازدارى دا ارنايى ماراپاتتارعا يە بولدى.
