التىن وردانىڭ استاناسى بولعان الىپ شاھاردىڭ ورنى بۇگىندە ۇزىنى 15, ەنى 3-8 كيلومەترگە سوزىلىپ جاتىر ەكەن. يوشكار-ولاداعى ماري ەل مەملەكەتتىك ۋنيۆەرسيتەتىنىڭ پروفەسسورى, تاريح عىلىمدارىنىڭ كانديداتى ەۆگەني پيگورەۆ ەكسپەديتسيا مۇشەلەرىنە كونە قالانىڭ تاريحىنان كوپتەگەن قىزىقتى دەرەكتەردى ايتىپ بەردى. وسى مەكەندى وتىز جىلدان بەرى زەرتتەپ جۇرگەن تانىمال عالىمنىڭ ايتۋىنشا, بۇل شاھار ءوز زامانىندا ساراي ءال-ءجاديد اتالعان. ءوز سوزىندە التىن وردا قالالارىن ءبىر-بىرىمەن ساباقتاستىرا زەرتتەۋدىڭ ماڭىزى زور ەكەنىنە توقتالعان ە.پيگورەۆ قازاقستاندىق زەرتتەۋشىلەردىڭ كەلۋىن وڭ باعالادى. ەكسپەديتسيا جەتەكشىسى «سارايشىق رەسپۋبليكالىق تاريحي مادەني مۋزەي كەشەنىنىڭ ديرەكتورى, تاريح عىلىمدارىنىڭ دوكتورى ابىلسەيىت مۇحتار دا التىن وردا مەملەكەتىنىڭ تاريحىندا ءار شاھاردىڭ ءوز ورنى بولعانىن, ونى تولىق ءبىلۋ ءۇشىن ەكى ەل زەرتتەۋشىلەرى ءوزارا اقپارات الماسىپ قىزمەت ەتۋى قاجەتتىگىن ورتاعا سالدى.
ەكسپەديتسيانىڭ 3-ءنشى كۇنى ۆولگوگراد وبلىسى لەنين اۋدانى تسارەۆ سەلوسى ماڭىنداعى ساراي بەركە قالاسىنىڭ ورنىنا كەلگەن ەكسپەديتسيا مۇشەلەرى تاريحي مەكەننىڭ جەر بەدەرىن كوزىمەن كورىپ, قۇپياسىن قوينىنا جاسىرعان توبەلەردى ارالادى.
سوڭعى قازبا جۇمىستارى 1970 جىلدارى بولعان شاھار ورنى كۇتىمسىز, قوقىس ورنىنا اينالىپتى. كونە كىرپىش سىنىقتارى مەن قازىرگى تۇرمىستىق قالدىقتار ارالاسىپ كەتكەن. «فەدەرالدىق دەڭگەيىندەگى ەسكەرتكىش, مەملەكەت قورعاۋىندا» دەگەن ەسكەرتۋ تاقتا بولماسا, زامانىندا الەمنىڭ كىندىگى, شۋلى شاھار بولدى دەۋگە ادام سەنبەيتىندەي... 
عالىمدار سوڭعى جىلدارى «ساراي بەركە اتاپ جۇرگەن شاھاردىڭ اتاۋى گۇلستان بولسا كەرەك» دەگەن بولجامعا دەن قويىپ كەلەدى ەكەن. بۇعان دالەل - قازبا ورنىنان تابىلعان تيىندار, وزگە دە جادىگەرلەر.
وسى ساپاردا ەرەكشە ەستە قالعان كورىنىس - رەسەي كينەماتوگرافتارىنىڭ «وردا» ءفيلمىن ءتۇسىرۋ ءۇشىن سالىنعان كونە قالا ماكەتىن تاماشالاۋ بولدى. ورتاعاسىرلىق كوشپەلى تۇركى مادەنيەتى, شىعىستىق يسلام مادەنيەتى توعىسقان كونە قالا عيماراتتارى وتە نانىمدى سالىنعان. بۇگىندە مۇندا الىس-جاقىننان ارنايى كەلىپ, تاماشالاۋشى تۋريستەر وتە كوپ ەكەن. ابىلسەيىت قاپيز ۇلى سارايشىق قالاسى ورنىندا دا وسىنداي كەشەن سالىنار بولسا, تۋريست تارتۋعا وڭ اسەر ەتەدى دەپ سانايدى.
بۇدان كەيىن ەكسپەديتسيا ۆولگوگراد وبلىستىق ولكەتانۋ مۋزەيدە بولدى. مۋزەي ديرەكتورى اناتولي مەلچەنكو ەكسپەديتسيا مۇشەلەرىن وتە جىلى قارسى الدى. قوناقتار مۋزەيدىڭ ارحەولوگيا جانە التىن وردا تاريحى زالدارىن ارالاپ كوردى. وتە باي ەكسپوزيتسيا, ول جادىگەرلەردى كورەرمەن نازارىنا ۇسىنۋ جولدارى ۇيرەنۋگە, تاجىريبە الماسۋعا تۇرارلىق.
كەزدەسۋ سوڭىندا سارايشىق جانە ۆولگوگراد ولكەتانۋ مۋزەيلەرى باسشىلارى ءوزارا بايلانىس, ىسكەرلىك قارىم-قاتىناس تۋراسىندا ۋاعدالاستى.
بۇدان كەيىن حالىقارالىق ەكسپەديتسيا مۇشەلەرى ۆولگوگرادتاعى ماماي قورعانى - وتان-انا اسكەري-پاتريوتتىق كەشەنىن ارالادى. بۇل بيىك توبەنىڭ اتاۋى التىن وردا حانى مامايدىڭ ەسىمىنە بايلانىستى.
ايتا كەتەيىك, حالىقارالىق ەكسپەديتسيانى قارجىلاي قولداعان - اتىراۋ وبلىستىق كاسىپكەرلىك جانە يندۋستريالىق-يننوۆاتسيالىق دامۋ باسقارماسى.
