بيىلعى جىلى ونىنشى رەت وتكەن فورۋمعا ءۇش جۇزگە جۋىق زاڭگەر, جوعارى سوت وكىلدەرى مەن ءتيىستى مينيسترلىكتەردىڭ ماماندارى, شەتەلدىك زاڭگەرلەر قاتىستى.
ەكى كۇنگە سوزىلعان فورۋم جۇمىسىندا بەس سەكتسيا بويىنشا ماماندار سالالىق ماسەلەلەردى تالقىلادى. فورۋمنىڭ العاشقى كەزەڭىندە «اتامەكەن» ۇقپ باسقارما مۇشەسى, باسقارما توراعاسىنىڭ ورىنباسارى رۋستام ءجۇرسىنوۆ ەلىمىزدەگى كاسىپكەرلىك احۋالعا قاتىستى بايانداما جاساسا, جوعارى سوتتىڭ مامانداندىرىلعان سوت القاسىنىڭ توراعاسى ايگۇل قىدىرباەۆا زاڭگەرلىك قوعامداستىق قالىپتاستىرۋدىڭ ەرەكشەلىكتەرى تۋرالى اتاپ ءوتتى.
«اتامەكەن» ۇكپ زاڭناما جانە ءوزىن-ءوزى رەتتەۋدى دامىتۋ دەپارتامەنتىنىڭ باسقارۋشى ديرەكتورى لاۋرا مەرساليموۆانىڭ ايتۋىنشا, زاڭنامالاردى جەتىلدىرۋ مەن كاسىپەرلەر ءۇشىن بيزنەس كليماتتى جاقسارتۋعا بايلانىستى سوڭعى التى جىلدا اكىمشىلىك كەدەرگىلەردى جويۋ, كاسىپكەرلەردىڭ قارجىلىق شىعىندارىن ازايتۋعا بايلانىستى, كوپتەگەن ىستەر اتقارىلدى. بۇگىندە زاڭناماعا وزگەرىستەر ەنگىزۋگە بايلانىستى مەملەكەتتىك ورگاندار ءتيىستى جۇمىستار جۇرگىزۋدە, ونىڭ ىشىندە بيزنەس كليماتتى جاقسارتۋمەن قاتار اكىمشىلىك كەدەرگىلەردىڭ قايتالانباۋى ءۇشىن ارنايى تولىقتىرۋلار ۇسىنىلىپ وتىر. سونداي-اق كاسىپكەرلىكتى جۇرگىزۋ مەن دامىتۋعا تىكەلەي ىقپال ەتەتىن ماڭىزدى قۇجاتتار ەكولوگيا, دەنساۋلىق سالاسىنا قاتىستى زاڭنامالارعا وزگەرىستەر ەنگىزىلەتىن بولادى. بۇگىندە كاسىپكەرلەردى الاڭداتاتىن ماسەلەلەر ارنايى رەەستردە تىركەلگەن. سوندىقتان دا كەز كەلگەن كاسىپكەر سايت نەمەسە الەۋمەتتىك جەلىلەردەگى پاراقشالار ارقىلى وزىنە قاجەتتى اقپاراتتاردى الىپ, دەر كەزىندە حابارلانىپ وتىرۋىنا مۇمكىندىگى بار.
بيزنەستى جۇرگىزۋدىڭ ينتەراكتيۆتى سەكتسياسى بيزنەستى قورعاۋداعى قىلمىستىق-قۇقىقتىق ماسەلەلەرمەن جالعاسىپ تاۋىپ, ارى قاراي يت سالاداعى زاڭناما, جەر قويناۋلارىن پايدالانۋ مەن ەنەرگەتيكا, مەديتسينا جانە فارماتسەۆتيكا, قۇرىلىس نارىعىنا قاتىستى زاڭنامالاراعا وراي ماسەلەلەر تالقىلانىپ, كاسىپكەرلەر وزدەرىن تولعاندىرعان سۇراقتارعا بايلانىستى مامانداردىڭ جاۋابىن تىڭدادى.
ال يت-قۇقىق سەكتسياسى بيزنەسكە جاساندى ينتەللەكتى ەنگىزۋ ماسەلەسىمەن كاسىپكەرلەردىڭ نازارىن اۋداردى. جوبانى قازاقستان-بريتان تەحنيكالىق ۋنيۆەرسيتەتىنىڭ ماماندارى نازارباەۆ ۋنيۆەرسيتەتىنىڭ جاساندى ينتەللەكت زەرتحاناسىنىڭ قىزمەتكەرلەرىمەن جۇزەگە اسىراتىن بولادى. جاساندى ينتەللەكت جۇيەسى كاسىپكەرلەرگە سوت اكتىلەرىن ىزدەۋگە جانە سوت ىستەرىنىڭ قانداي شەشىممەن اياقتالۋىن بولجاۋعا مۇمكىندىك بەرەدى.
