كەزدەسۋ بارىسىندا مەملەكەت باسشىسى ەكى ەلدىڭ اراسىنداعى قارىم-قاتىناستىڭ دوستىق نيەتكە قۇرالعانىن اتاپ ءوتتى.
– ءبىز ءسىزدىڭ ەلدى قۇرمەتتەيمىز. بۇگىنگى سينگاپۋردىڭ نەگىزىن قالاعان ءسىزدىڭ اكەڭىز لي كۋان يۋ قازاقستاننىڭ تۇڭعىش پرەزيدەنتى نۇرسۇلتان نازارباەۆپەن جاقىن دوستىق قارىم-قاتىناستا بولعانى, ونىڭ 90-جىلداردىڭ باسىندا قازاقستانعا كەلگەنى ەسىمىزدە. ەكى ەل اراسىنداعى تىعىز ىنتىماقتاستىققا بەرىك نەگىز بار دەپ ويلايمىن, – دەدى قاسىم-جومارت توقاەۆ.
ءوز كەزەگىندە سينگاپۋر پرەمەر-ءمينيسترى دە ەكى ەل اراسىنداعى ءوزارا قارىم-قاتىناستى ودان ءارى نىعايتۋعا نيەتتى ەكەنىن ايتتى.
– ءبىز قازاقستانمەن اراداعى ىنتىماقتاستىقتى ودان ءارى دامىتۋعا نيەتتىمىز. وزىڭىزبەن پرەزيدەنت رەتىندە بىرلەسە جۇمىس ىستەۋگە اسىقپىن,– دەدى لي سيان لۋن.
تاراپتار ەكى جاقتى ساۋدا-ەكونوميكالىق, ينۆەستيتسيالىق بايلانىستاردى ارتتىرۋدى, سونداي-اق, «استانا» حالىقارالىق قارجى ورتالىعى اياسىندا قالىپتاسىپ كەلە جاتقان ءوزارا قارىم-قاتىناستىڭ كوكجيەگىن كەڭەيتۋ جايىن اتاپ ءوتتى.
كەزدەسۋ سوڭىندا قاسىم-جومارت توقاەۆ سينگاپۋر پرەمەر-ءمينيسترىن ەلىمىزگە ارنايى ساپارمەن كەلۋگە شاقىردى.
– ءبىز ءسىزدى وزىڭىزگە ىڭعايلى كەز كەلگەن ۋاقىتتا كۇتەمىز. ءسىزدىڭ ساپارىڭىز ءوزارا ىنتىماقتاستىقتى دامىتۋ ءۇشىن بىرقاتار ناقتى ماسەلەلەردى تالقىلاۋعا جاقسى مۇمكىندىك بەرەدى,– دەدى قازاقستان پرەزيدەنتى.
