تاراپتار ساۋدا-ەكونوميكالىق جانە ينۆەستيتسيالىق ءوزارا ءىس-قيمىلدىڭ وزەكتى ماسەلەلەرى بويىنشا ءبىرىنشى كەزدەسۋدەن كەيىن ءۇش اي ىشىندە اتقارىلعان جۇمىستاردىڭ ناتيجەلەرىن, سونىڭ ىشىندە قازاقستاندىق ونىمدەردىڭ ەو-عا ەكسپورتىن ىلگەرىلەتۋ, اۋىل شارۋاشىلىعى, ەنەرگەتيكا, كولىك, كەدەن, قورشاعان ورتا جانە كليماتتىڭ وزگەرۋى سالالارىنداعى ىنتىماقتاستىق ماسەلەلەرىن, ەلىمىزدەگى ينۆەستيتسيالىق احۋالدى جەتىلدىرۋ جونىندەگى زاڭنامالىق شارالاردى, سونداي-اق, وسى جىلدىڭ 30 قىركۇيەگىندە وتكەن ساۋدا كونفيگۋراتسياسىنداعى «قازاقستان – ەو» ىنتىماقتاستىق كوميتەتىنىڭ 3-وتىرىسىنىڭ ناتيجەلەرىن تالقىلادى.
اسقار مامين تۇڭعىش پرەزيدەنت – ەلباسى نۇرسۇلتان نازارباەۆ پەن مەملەكەت باسشىسى قاسىم-جومارت توقاەۆ ەلىمىزدىڭ ماڭىزدى ساۋدا-ەكونوميكالىق سەرىكتەستەرىنىڭ ءبىرى سانالاتىن ەۋروپالىق وداق ەلدەرىمەن ىنتىماقتاستىققا ۇلكەن كوڭىل بولەتىنىن اتاپ ءوتتى.
ەۋروپالىق وداق ەلدەرىنە قازاقستانعا سالىنعان تىكەلەي شەتەلدىك ينۆەستيتسيالاردىڭ جارتىسىنان كوبى تيەسىلى. 2005 جىلدان باستاپ 2019 جىلدىڭ ءبىرىنشى جارتى جىلدىعىنا دەيىن ەو شامامەن $150 ملرد ينۆەستيتسيا سالدى. ەو سونىمەن بىرگە قازاقستان رەسپۋبليكاسىنىڭ ەڭ ءىرى ساۋدا سەرىكتەسى بولىپ تابىلادى – 2019 جىلدىڭ شىلدەسىندەگى جاعداي بويىنشا تاۋارلار مەن قىزمەتتەردىڭ ەكىجاقتى اينالىمى شامامەن $20 ملرد جەتتى.
«ەۋروپالىق وداق ساراپشىلارىنىڭ قوسقان ۇلەستەرى باسقارۋ, جەكەشەلەندىرۋ, تسيفرلاندىرۋ, مەملەكەتتىك-جەكەمەنشىك ارىپتەستىك, تۇراقتى دامۋ سالالارىنداعى كەيبىر نەگىزگى ستراتەگيالارىمىز بەن قۇجاتتارىمىزدى ازىرلەۋ جانە ىسكە اسىرۋ ءۇشىن ماڭىزدى بولدى, ولار قازاقستان ەكونوميكاسىنىڭ وسۋىنە جانە ەل حالقىنىڭ ءال-اۋقاتىن جاقسارتۋدا ۇلكەن ءرول اتقارادى», — دەدى ا. مامين.
پرەمەر-مينيستر تىكەلەي شەتەلدىك ينۆەستيتسيالار مەن ساۋدا كولەمىنىڭ ءوسۋىن قامتاماسىز ەتۋ قازاقستان ۇكىمەتىنىڭ جۇمىسىنىڭ باسىمدىقتى باعىتتارىنىڭ ءبىرى ەكەنىن اتاپ ايتتى. اسقار مامين ەۋروپالىق وداق ەلشىلەرىن قازاقستاننىڭ ەو-مەن ەكونوميكالىق ىنتىماقتاستىعىنا ىقپالداسۋ بويىنشا بۇدان ءارى اشىق ءارى بەلسەندى ديالوگقا شاقىردى.
ء«بىزدىڭ بولاشاقتاعى كۇن ءتارتىبىن جاڭا بەتالىستارعا يكەمدىرەك ەتىپ, تۋىنداعان سىن-تەگەرۋىندەر مەن مۇمكىندىكتەرگە جاقسىراق ءۇن قاتۋعا جول اشاتىن ۇسىنىمدارمەن جۇمىس ىستەۋىمىز كەرەك», — دەدى ۇكىمەت باسشىسى.
ءوز كەزەگىندە ديپلوماتيالىق ميسسيالاردىڭ باسشىلارى قازاقستاندا بيزنەستى جۇرگىزۋ ءۇشىن قولايلى جاعدايلار تۋدىرۋ بويىنشا جۇمىستاردىڭ وڭ ديناميكاسىن اتاپ ءوتتى. قر-داعى ەو وكىلدىگىنىڭ باسشىسى سۆەن-ولوۆ كارلسسون قر ۇكىمەتىنىڭ ينۆەستيتسيالىق احۋالدى جەتىلدىرۋ بويىنشا جاساپ جاتقان بەلسەندى ۇمتىلىستارى قازاقستان مەن ەۋروپالىق وداق ەلدەرىنىڭ ساۋدا-ەكونوميكالىق جانە ينۆەستيتسيالىق ىنتىماقتاستىعىنىڭ دامۋىنا قوسىمشا سەرپىن بەرەتىنىنە سەنىم ءبىلدىردى.
تالقىلاۋعا ەو ساۋدا-ساتتىق جونىندەگى باس ديرەكتوراتىنىڭ ورتالىق ازيا, رەسەي, تمد, ۋكراينا, باتىس بالقان مەن تۇركيا بويىنشا ءبولىم باسشىسى پەتروس سۋرمەليس, گەرمانيا, فرانتسيا, نيدەرلاندى, پولشا, اۆستريا, يسپانيا, ەستونيا, يتاليا, لاتۆيا, گرەكيا, يسپانيا, حورۆاتيا, رۋمىنيا, سلوۆاكيا, ۆەنگريا ەلشىلەرى, ليتۆا, پورتۋگاليا, بولگاريا, فينليانديا, بەلگيا, چەحيا وكىلدەرى, الەمدىك ءىرى كومپانيالاردىڭ باسشىلارى, وكىلدەرى قاتىستى.
