ايماقتار • 30 قىركۇيەك، 2019

وڭتۇستىكتەن 427 وتباسىن سولتۇستىك وڭىرلەرگە كوشىرۋ كوزدەلىپ وتىر

50 رەت كورسەتىلدى

تۇركىستان وبلىسىندا قارابۇلاق دەگەن اۋىل بار. وڭىردەگى وزگە اۋىلداردان ەرەكشەلىگى كوپ. بۇل اۋىلدا 60 مىڭنان استام حالىق تۇرادى. باسىم بولىگى – شارۋاقور وزبەك اعايىندار. سايرام اۋدانىنا قاراستى ەلدى مەكەن وڭىرگە جەمىس-جيدەگىمەن دە، مال ونىمدەرىمەن دە تانىمال. ساۋدا ورىندارىندا وسى اۋىلدىڭ كارتوبى، ەتى مەن ءسۇتى بولسىن ءوتىمدى. ايتايىن دەگەنىمىز، ەڭبەكقور اۋىل تۇرعىندارىنىڭ تۇرمىسى ەمەس، 52 وتباسىنىڭ ەلىمىزدىڭ سولتۇستىك وڭىرلەرگە كوشۋگە نيەت بىلدىرگەنى تۋرالى ەدى.

جۋىردا Nur Otan پارتياسى تۇركىستان وبلىستىق فيليالى توراعاسىنىڭ ءبىرىنشى ورىنباسارى بەيسەن تاجىباەۆ باستاعان اقپاراتتىق-ناسيحاتتىق توپ حالىق سانى جوعارى ءارى ەڭ تىعىز ورنالاسقان سايرام اۋدانى قارابۇلاق ەلدى مەكەنى تۇرعىندارىمەن كەزدەسكەن بولاتىن. كەزدەسۋ بارىسىندا ەل پرەزيدەنتى قاسىم-جومارت توقاەۆتىڭ قازاقستان حالقىنا ارناعان جولداۋىنا توقتالعان ب.تاجىباەۆ وزبەك دياسپوراسىن «ەڭبەك» باعدارلاماسىن جۇزەگە اسىرۋدا بەلسەندى بولۋعا شاقىردى. «بيىل اۋداننان سولتۇستىككە ءبىر وتباسى عانا كوشكەن. باعدارلاما بويىنشا سولتۇستىككە بارعانداردىڭ جۇمىس ىستەۋىنە بارلىق مۇمكىندىك جاسالادى، مال باعۋ مەن ەگىن سالۋعا جەر بەرىلەدى. وڭىرىمىزدە 400 مىڭنان استام شارۋاقور وزبەك اعايىندار تۇرادى. ولار وسى باعدارلامانى ورىنداۋعا بەلسەنە قاتىسسا، حالىق جۇمىسپەن قامتىلىپ، باسپانالى بولىپ، كوپتەگەن ماسەلەلەر شەشىمىن تاباتىن ەدى»، دەدى فيليال توراعاسىنىڭ ءبىرىنشى ورىنباسارى.

كەزدەسۋدە سونداي-اق تۇركىستان وبلىس­تىق قازاقستان حالقى اسسامبلەياسى حاتشى­لىعىنىڭ مەڭگەرۋشىسى ع.رىسبەكوۆ باعدار­لا­مانىڭ ماڭىزدىلىعى تۋرالى بايانداما جاسادى. ال سولتۇستىككە قونىس اۋدارعانداردىڭ تىنىس-تىرشىلىگىمەن تانىسىپ قايتقان ناسيحاتتىق توپ مۇشەلەرى اۋىل تۇرعىندارىنا مەملەكەت تاراپىنان بەرىلىپ جاتقان قولداۋلار مەن مۇمكىندىكتەر تۋرالى كەڭىنەن ءتۇسىندىرىپ، ولاردىڭ سۇراقتارىنا جاۋاپ بەردى. وزبەك ەتنوس وكىلدەرىنىڭ اراسىندا العاش وتكىزىلگەن ماڭىزدى كەزدەسۋدىڭ ناتيجەسى جوعارىداعىداي، ياعني 52 وتباسى سولتۇستىك وڭىرلەرگە كوشۋگە نيەت ءبىلدىردى.

جالپى، ەلباسىنىڭ باستاماسىمەن 2015 جىلدان بەرى جۇزەگە اسىپ كەلە جاتقان ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان «ەڭبەك» باعدارلاماسى اياسىندا تۇركىستان وبلىسىندا سوڭعى 4 جىلدا 881 وتباسى نەمەسە 3377 ادام قونىس اۋدارىپ، مەملەكەت تاراپىنان الەۋمەتتىك كومەكپەن قامتاماسىز ەتىلدى. سونىمەن قاتار سولتۇستىك، شىعىس وڭىرلەردەگى بوس جۇمىس ورىندارى تۋرالى مالىمەت اي سايىن الىنىپ، اۋداندىق، قالالىق جۇمىسپەن قامتۋ ورتالىقتارىنىڭ بازالىق مالىمەتتەرىنە ەنگىزىلىپ تۇرادى. وسى جىلدىڭ ءى توقسانىندا 3 مىڭعا جۋىق جۇمىس ورىندارى ۇسىنىلعان. بىلتىر رەسپۋبليكا بويىنشا بولىنگەن 1706 كۆوتا نەگىزىندە وبلىستان 455 وتباسى، ياعني 1768 ادام سولتۇستىك وڭىرلەرگە قونىس اۋدا­رىپ، كۆوتامەن، كوشۋ ءۇشىن بەرىلەتىن سۋبسيديامەن قامتاماسىز ەتىلۋدە. قونىس اۋدارۋشىلاردىڭ باسىم بولىگى سارىاعاش (91 وتباسى)، سايرام (63)، ماقتاارال (75)، ورداباسى (49 وتباسى) اۋداندارىنىڭ ۇلەسىندە. ال 2019 جىلعى جوسپار بويىنشا وبلىستان 427 وتباسىن (1608) كوشىرۋ جوسپارلانعان. قازىرگى تاڭدا 284 وتباسى (911 ادام) سولتۇستىك وڭىرلەرگە قونىس اۋدا­رىپ، تىرشىلىك ەتۋدە. ناقتىراق ايتساق، قوستاناي وبلىسىنا 27 وتباسى (112 ادام)، شىعىس قازاقستان وبلىسىنا – 54 (104)، سولتۇستىك قازاقستان وبلىسىنا – 147 (415)، پاۆلودار وبلىسىنا 56 وتباسى (280 ادام) قونىس اۋدارعان. ايتا كەتەيىك، «ەڭبەك» باعدارلاماسىنا قاتىسۋشىعا جانە ونىڭ وتباسى مۇشەلەرىنە ءبىر رەت 35 اەك (88375 تەنگە) مولشەرىندە كوشۋگە ماتەريالدىق كومەك بەرىلەدى. پارتيا فيليالى باسشىلارىنىڭ مالىمەتىنشە، بۇگىنگى تاڭعا دەيىن قونىس اۋدارعانداردىڭ باسىم بولىگى تۇرعىن ۇيمەن، جۇمىسقا قابىلەتتى وتباسى مۇشەلەرى جۇمىسپەن قامتىلعان. ءوز كاسىبىن اشامىن دەۋشىلەرگە ەگىن، مال شارۋاشىلىعىمەن شۇعىلدانۋعا جەر تەلىمدەرى، بوس تۇرعان عيماراتتار ۇسىنىلعان. سونداي-اق كوشىپ-قونۋعا بايلانىستى مەملەكەت تاراپىنان بەرىلەتىن ماتەريالدىق كومەكتەرمەن بارعان ازاماتتار قامتاماسىز ەتىلۋدە.

وسى ارادا ايتا كەتەلىك، 2019 جىلعى سەگىز ايدىڭ قورىتىندىسى بويىنشا تۇركىستان وبلىسىندا 62 مىڭ 386 ادام ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان «ەڭبەك» مەملەكەتتىك باعدارلاماسىنا قاتىسقان. ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتى حابارلاعانداي، 42 مىڭ 612 ادام جۇمىسقا ورنالاستىرىلعان، ونىڭ ىشىندە 30 مىڭ 328-ءى نەمەسە 71%-ى تۇراقتى جۇمىس ورىندارىمەن قامتاماسىز ەتىلىپتى. ەڭبەك نارىعىندا سۇرانىسقا يە ماماندىقتار بويىنشا كاسىبي داعدىلاردى قالىپتاستىرۋ ماقساتىندا ازاماتتاردىڭ جەكەلەگەن ساناتتارى ءۇشىن قىسقا مەرزىمدى كۋرستار وتكىزۋدى كوزدەيتىن «ەڭبەك» مەملەكەتتىك باعدارلاماسىنىڭ ءبىرىنشى باعىتى اياسىندا تۇركىستان وبلىسىندا 2 مىڭ 844 ادام وقۋعا جىبەرىلدى. قىسقا مەرزىمدى كاسىپتىك وقىتۋ اياقتالعاننان كەيىن حالىقتى جۇمىسپەن قامتۋ ورتالىق­تا­رى مەملەكەتتىك باعدارلامانىڭ قاتى­سۋ­شىلارىنا جۇمىسقا ورنالاسۋعا كومەك كورسەتەتىن بولادى. ال باعدار­لا­مانىڭ ەكىنشى باعىتى اياسىندا وبلىستا ميكروكرەديتتەۋمەن 940 ادام، ونىڭ ىشىندە قالالاردا – 41، اۋىلداردا 899 ادام قامتىلدى. مەملەكەتتىك گرانتتاردى 100 اەك-كە دەيىنگى مولشەردە مەملەكەتتىك باعدارلامانىڭ 101 قاتىسۋشىسى، 200 اەك-كە دەيىنگى مولشەردە – 498 ادام العان. سونداي-اق ازاماتتاردىڭ جەكەلەگەن ساناتتارىن جۇمىسقا ورنالاستىرۋ ءۇشىن مەملەكەتتىك سۋبسيديالاناتىن جۇمىس ورىندارىن قۇرۋدى كوزدەيتىن باعدارلامانىڭ ءۇشىنشى باعىتى بويىنشا 13 973 ادام، ونىڭ ىشىندە الەۋمەتتىك جۇمىس ورىندارىنا 4333 ادام، قوعامدىق جۇمىسقا 4308 ادام ورنالاستىرىلىپ، جاستار پراكتيكاسىنا 5 مىڭ 332 ادام تارتىلعان.

ءبىز جوعارىدا ناقتى دەرەكتەر كەلتىرگەن باعدارلامانىڭ جۇمىس ىزدەگەندەرگە كومەگى ءتيىپ، الەۋمەتتىڭ الەۋەتىن ارتتىرۋعا قوسىپ جاتقان ۇلەسى مول. ال ەڭ باستىسى – قونىس اۋدارۋشىلار تۇرعىنى از شوعىرلانعان سولتۇستىك وڭىرلەردىڭ اۋىل-ايماقتارىن ساقتاپ قالۋعا ءوز ۇلەستەرىن قوسۋدا.

 تۇركىستان وبلىسى 

سوڭعى جاڭالىقتار

دوللار ارزاندادى

قارجى • بۇگىن، 15:58

ۇقساس جاڭالىقتار