106-شى كوكتەم
سەنبى, 23 ناۋرىز 2013 1:20
شالقار قالاسىنىڭ تۇرعىنى سۇلۋپان اباجان بيىل 106-شى كوكتەمىن قارسى الىپ وتىر. ءبىر عاسىردى ارتقا تاستاعان كىسىنىڭ بۇگىندە ءسوزى ءتۇزۋ بولعانمەن, سوڭعى كەزدەرى سىرتقا كىرىپ-شىعۋى قيىنداپتى.
قوس عاسىردىڭ كۋاسى – سۇلۋپان اجەنىڭ وتكەن جولىنىڭ ءوزى ءبىر تاريح. ول 1907 جىلى اۋدانعا قاراستى №13 اۋىلدىڭ قاراجيدە دەگەن جەرىندە دۇنيەگە كەلىپتى. بالالىق شاعى ەلدىڭ باسىنا ءتۇسكەن اۋىر كەزەڭدەرمەن قاتار كەلىپ, بۇعاناسى بەكىمەي جاتىپ قايناعان قارا جۇمىسقا جەگىلەدى.
سەنبى, 23 ناۋرىز 2013 1:20
شالقار قالاسىنىڭ تۇرعىنى سۇلۋپان اباجان بيىل 106-شى كوكتەمىن قارسى الىپ وتىر. ءبىر عاسىردى ارتقا تاستاعان كىسىنىڭ بۇگىندە ءسوزى ءتۇزۋ بولعانمەن, سوڭعى كەزدەرى سىرتقا كىرىپ-شىعۋى قيىنداپتى.
قوس عاسىردىڭ كۋاسى – سۇلۋپان اجەنىڭ وتكەن جولىنىڭ ءوزى ءبىر تاريح. ول 1907 جىلى اۋدانعا قاراستى №13 اۋىلدىڭ قاراجيدە دەگەن جەرىندە دۇنيەگە كەلىپتى. بالالىق شاعى ەلدىڭ باسىنا ءتۇسكەن اۋىر كەزەڭدەرمەن قاتار كەلىپ, بۇعاناسى بەكىمەي جاتىپ قايناعان قارا جۇمىسقا جەگىلەدى. سول زامانداعى اقتاردىڭ دۇربەلەڭىن, قازان توڭكەرىسىن, كولحوزداستىرۋ كەزەڭىن, قازاقتىڭ جاپپاي اشارشىلىققا ۇشىراۋىن, 1937 جىلعى رەپرەسسيانى, 1941-45 جىلدار ارالىعىنداعى ۇلى وتان سوعىسىنداعى ەڭسە ەزەر اۋىرتپالىقتاردىڭ بارلىعىن اجەمىز باستان وتكەرگەن.
– مەن ءۇشىن وتكەندى ەسكە ءتۇسىرۋ قيىن, ول كۇندەر قۇردىمعا كەتسىن دەپ تىلەيىك. ءبىز كىندىكتەن تورتەۋ ەدىك. اعام نۇعىمان سوعىستان كەرى ورالمادى. مەنەن كەيىن تولەۋ دەگەن ءىنىم بولعان, سوسىن توكەش دەگەن ءسىڭلىم بار. ول قازىر ءتىرى, وسى شالقاردا تۇرادى. شالىم سەرجان 1983 جىلى 78 جاسىندا و دۇنيەلىك بولدى. قوساعىم ەكەۋمىز ومىرگە تولەۋ, رايا, نۇريا, سامات, مارات ەسىمدى بەس بالا اكەلىپ, بۇگىندە سولاردان 26 نەمەرە, 24 شوبەرە ءسۇيىپ وتىرمىن. وسىنداي عۇمىر بەرىپ, نەمەرە, شوبەرەلەرىمنىڭ ورتاسىندا وتىرعانىمدى اللانىڭ ماعان بەرگەن باعا جەتپەس سىيى دەپ بىلەمىن. تاڭىرگە مىڭ تاۋبە, – دەپ شۇكىرشىلىك ەتەدى كەيۋانا.
ءوزىنىڭ قولىن جىلى سۋعا مالىپ وتىرعان بالاسى مەن كەلىنى مارات پەن سانىمگۇلگە ريزاشىلىعى دا كولدەي اجەنىڭ. سانىمگۇل اپايدىڭ دا كەلىن بولىپ وسى شاڭىراقتىڭ تابالدىرىعىنان اتتاعانىنا 25 جىل. ونىڭ عاسىر جاساعان ەنەسىن باعىپ, اق باتاسىن الىپ جۇرگەنىن ماقتان تۇتاتىنىن اڭعاردىق. اجە ءوزىنىڭ نەمەرە-شوبەرەلەرىنە اقىلىن ايتىپ, تاربيەسىنە ءمان بەرۋدەن ەش جالىققان ەمەس. ۇيىندەگى 8 جاسار نەمەرەسىنىڭ ەسىمىن كەزىندە اقىلبەك دەپ اجەنىڭ ءوزى قويىپتى. بۇگىندە سول اقىلبەگى اجەلەپ كەلىپ, موينىنا اسىلعاندا ونىڭ بويىن ەرەكشە سەزىم بيلەيدى.
اجە قوشتاسار ساتتە بىزگە: « ۇلىستىڭ ۇلى كۇنى بار جاقسىلىعىن الا كەلسىن. ەلىمىزدە ءاردايىم تىنىشتىق بولسىن. داستارقانىمىز مول بولىپ, ءار شاڭىراقتا بەرەكە, بىرلىك ماڭگى بولا بەرسىن. بارىڭىزگە مەندەي عۇمىرلى جاس بەرسىن. تاۋەلسىز ەلىمىزدىڭ بولاشاعى باياندى بولسىن. اللا وسى ايتقانىمدى قابىل ەتسىن! ءاۋمين!» – دەپ باتاسىن بەردى.
لايىم, ءتاڭىر كەز كەلگەننىڭ پەشەنەسىنە بۇيىرتا بەرمەيتىن عۇمىر سىيلاعان اجەمىزدىڭ بەرگەن ۇلىستىڭ ۇلى كۇنى قارساڭىندا اق باتاسى قابىل بولعاي دەپ تىلەيىك.
مۇحتار مىرزالين,
اقتوبە وبلىسى,
شالقار اۋدانى.
سۋرەتتە: سۇلۋپان اجە.
