قاراعاندى وبلىسىندا «اۋىل – ەل بەسىگى» جوباسى ىسكە اسىرىلا باستادى

ايماقتار • 10 قىركۇيەك، 2019

قاراعاندى وبلىسىندا «اۋىل – ەل بەسىگى» جوباسى ىسكە اسىرىلا باستادى

قاراعاندى وبلىسىندا «اۋىل – ەل بەسىگى» ارنايى جوبا باعدارلاماعا ەنگەن جاڭاارقا، نۇرا جانە ۇلىتاۋ اۋداندارى بويىنشا ىسكە اسىرىلا باستادى.

قايرات ءابىلدا

وسى باعىتتاعى جۇمىس بارىسى تۋرالى وبلىس اكىمدىگىندە وتكەن اپپاراتتىق جينالىستا وبلىستىق ەكونوميكا باسقارماسى باسشىسىنىڭ مىندەتىن اتقارۋشى ايجان دۇرسۇن باياندادى.

– 2020 جىلى «اۋىل – ەل بەسىگى» جوباسىنا قاتىسۋ ءۇشىن جوعارى جانە ورتاشا دامۋ الەۋەتىنە يە ءتورت ەلدى مەكەن انىقتالدى، 27 جوبانى ىسكە اسىرۋ جوسپارلانعان، ونىڭ ىشىندە 9 ءبىلىم بەرۋ، ءۇش سپورت نىسانىن جوندەۋ جانە 15 اۆتوجولدى قالىپقا كەلتىرۋ جوسپارلانعان، – دەدى ول.

جوعارىدا اتالعان اۋدانداردا ينجەنەرلىك جەلىلەر، مەكتەپتەر، مادەنيەت ۇيلەرى، سپورتتىق قۇرىلىستار مەن جولدار جوندەلىپ جاتىر. مۇنىڭ ءوزى جاڭا جۇمىس ورىندارىن اشۋعا زور مۇمكىندىك تۋعىزدى. مىسالى جاڭاارقا اۋدانىندا – 47، نۇرا اۋدانىندا – 44، ۇلىتاۋ اۋدانىندا 43 بوس جۇمىس ورنى اشىلدى.

اتاسۋ كەنتىندە جالپى ۇزىندىعى 8،7 شاقىرىم بولاتىن التى جولدىڭ ورتاشا جوندەۋ جۇمىستارى اياقتالىپ، 60 جارىقتاندىرۋ تىرەكتەرى ورناتىلدى. جوندەۋ جۇمىستارى جىلۋمەن قامتۋدىڭ بەس نىسانىندا، ءتورت جولدىڭ قۇرىلىسىندا جانە ەكى بالاباقشادا جالعاسۋدا.

نۇرا اۋىلىندا ءۇش كوشەدە جارىقتاندىرۋ تىرەكتەرى ورناتىلدى جانە «نۇرا» ستاديونى جوندەلدى. سونىمەن قاتار بالالار ونەر مەكتەبى، تاريحي-ولكەتانۋ مۇراجايى، كەنتىشىلىك جولدار مەن «تاۋەلسىزدىك» ساياباعىندا جوندەۋ جۇمىستارى جالعاسۋدا. قىركۇيەك ايىنىڭ سوڭىنا دەيىن اۋداندا تاعى 31 بوس جۇمىس ورنى اشىلادى.

ۇلىتاۋ كەنتىندە №1 ورتا مەكتەپ جوندەلدى.

جوبا جوسپارى بويىنشا، كەلەسى جىلى «اۋىل – ەل بەسىگى» باعدارلاماسىنا وبلىستىڭ تاعى ءتورت ەلدى مەكەنى ەنگىزىلمەكشى.

قاراعاندى وبلىسى