ءىس-شارانىڭ ماقساتى – ەتنوسارالىق كوممۋنيكاتسيا ءتىلى رەتىندە مەملەكەتتىك ءتىلدىڭ ماڭىزىن نىعايتۋ. قحا توراعاسىنىڭ ورىنباسارى – حاتشىلىق مەڭگەرۋشىسى ج.تۇيمەباەۆ: «مەملەكەتتىك تىلدە جالپىقازاقستاندىق اشىق ديكتانت جازۋ – قازاقستان حالقى اسسامبلەياسىنىڭ ءتول جوباسى. ونىڭ ماقساتى قوعامىمىزدا حالىقتى ۇيىستىرۋشى فاكتور – مەملەكەتتىك ءتىلدى بىلۋگە قىزىعۋشىلىقتى ارتتىرىپ, قازاقستاندىق بىرەگەيلىكتى قالىپتاستىرۋ, قوعامدىق كەلىسىم مەن ەل بىرلىگىن نىعايتۋ. قازاقستان حالقى اسسامبلەياسى ۇيىمداستىرۋىمەن رەسپۋبليكا بويىنشا ديكتانتقا 180 مىڭعا جۋىق ادام قاتىسىپ وتىر. ديكتانت – جىل سايىن قازاقستاننىڭ تىلدەرى كۇنى شەڭبەرىندە, ەل ومىرىندەگى ەرەكشە وقيعالاردىڭ ەڭ ماڭىزدىسىن ارقاۋ ەتە وتىرىپ, جازىلادى»,- دەپ اتاپ ءوتتى.
2017 جىلى «ماڭگىلىك ەل» پاتريوتتىق اكتىسى قابىلدانعاندا, قازاقستان حالقى اسسامبلەياسى ەلىمىزدىڭ بارلىق ەلدى مەكەندەرىندە وسى پاتريوتتىق اكتىگە ارنالعان جالپىقازاقستاندىق اشىق ديكتانت وتكىزۋگە باستاما كوتەرگەن بولاتىن. بۇل باستامانى بارشا مەملەكەتتىك ورگاندار, جوعارى وقۋ ورىندارى, زيالى قاۋىم مەن ەتنومادەني بىرلەستىكتەر وكىلدەرى قىزۋ قولداپ, سودان بەرى بۇل ءىس-شارا يگى داستۇرگە اينالدى.
ديكتانتتى اسسامبلەيانىڭ, قازاقستان رەسپۋبليكاسى پرەزيدەنتى جانىنداعى «قوعامدىق كەلىسىم» رەسپۋبليكالىق مەملەكەتتىك مەكەمەسىنىڭ جانە بىرنەشە مينيسترلىكتىڭ تىلدەردى دامىتۋ باسقارمالارىنىڭ ماماندارىنان قۇرىلعان كوميسسيا تەكسەرەدى. ديكتانتتى ەڭ ۇزدىك جازعان قاتىسۋشىلارعا قازاقستان حالقى اسسامبلەياسىنىڭ العىس حاتى تابىس ەتىلەدى.
