بۇل جونىندە وبلىس اكىمى ومىرزاق شوكەەۆ پرەزيدەنت ق.توقاەۆتىڭ قازاقستان حالقىنا جولداعان «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى جولداۋىن ىسكە اسىرۋعا ارنالعان جيىندا ءمالىم ەتتى. القالى جيىندا وبلىس اكىمى جولداۋدا ايقىندالعان باعىتتارعا توقتالىپ, ناقتى تاپسىرمالار بەردى. حالىقپەن بايلانىستى نىعايتۋدا قوعامدىق باقىلاۋ جانە پارتيا بەلسەندىلەرى مەن شەنەۋنىكتەردى باعالاۋ تەتىگىن ۇيىمداستىرا ءبىلۋ قاجەتتىگىن ايتقان ءو.شوكەەۆ «اۋىل – ەل بەسىگى» جوباسى بويىنشا اتقارىلاتىن جۇمىستارعا دا توقتالدى. «بيىل تۇركىستان وبلىسىندا 7 ەلدى مەكەننىڭ ماسەلەسىن شەشۋگە 4 ملرد تەڭگە جۇمسالدى. ناتيجەسىندە 112,8 شاقىرىم جول توسەلىپ, 7 ءبىلىم, 1 سپورت جانە 5 مادەنيەت نىسانى جوندەۋدەن وتەتىن بولادى. جوبا اياسىندا 2020 جىلعا 15 ەلدى مەكەندە 114 جوبانى ىسكە اسىرۋعا 4,8 ملرد تەڭگە باعىتتاۋ جوسپارلانۋدا», – دەدى وبلىس اكىمى. سونداي-اق ءو.شوكەەۆ قالا, اۋدان اكىمدەرى مەن قالالىق قۇرىلىمداردىڭ باسشىلارىنا تۇرعىندار اراسىندا كەڭ اۋقىمدى اقپاراتتىق-ءتۇسىندىرۋ جۇمىستارىن جۇرگىزۋدى جۇكتەپ, وزدەرىنە جۇكتەلگەن مىندەتتەردى ۋاقتىلى ءارى ساپالى ورىنداۋعا تاپسىرما بەردى.
اكتيۆ وتىرىسىندا ءماسليحات دەپۋتاتتارى, ارداگەرلەر, زيالى قاۋىم, قوعامدىق ۇيىم توراعالارى جارىسسوزگە شىعىپ, جولداۋدا اتالعان مىندەتتەر بويىنشا ءوز پىكىرلەرىمەن ءبولىستى. ال Nur Otan پارتياسى تۇركىستان وبلىستىق فيليالى توراعاسىنىڭ ءبىرىنشى ورىنباسارى بەيسەن تاجىباەۆ جەرگىلىكتى اتقارۋشى ورگاندارداعى پارتيا مۇشەلەرىنە ماسەلەنى جاسىرعاننان گورى جەدەل شەشكەن ءتيىمدى ەكەنىن ايتتى. «بۇگىندە وبلىستا الەۋمەتتىك جاعدايدىڭ تومەندىگى, تۇرعىن ءۇي جانە جۇمىسقا ورنالاسۋ ماسەلەلەرى وتە وزەكتى. پارتيا فيليالى ءبىرىنشى كەزەكتە وسى باعىتتاعى پروبلەمالاردى جۇيەلى تۇردە شەشۋ ءۇشىن جەرگىلىكتى اكىمدىكتەرمەن, ءتيىستى باسقارمالارمەن جوسپار ءتۇزىپ, جۇمىس جۇرگىزەتىن بولادى», دەدى ب.تاجىباەۆ. پارتيا فيليالى پرەزيدەنتتىڭ جولداۋدا ايتقان «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ ءۇشىن ەكى باعىتتا جۇمىس جۇرگىزبەك. ەڭ الدىمەن, پارتيا فيليالىنىڭ قوعامدىق قابىلداۋ بولمەسى تۇركىستان قالاسىنداعى حالىق ەڭ ءجيى شوعىرلانعان الماتى ارباتىنداعى عيماراتتا «Open space» فورماتىنا كوشسە, ەكىنشىدەن بارلىق لاۋازىم يەلەرىنىڭ قابىلداۋلارىن الەۋمەتتىك جەلىلەردە تىكەلەي ەفير ارقىلى جۇرگىزۋ قولعا الىناتىن بولادى. سونىمەن قاتار اكتيۆ جينالىسىندا پارتيا فيليالى جولداۋدى حالىققا ءتيىمدى ەتىپ ناسيحاتتاۋ ءۇشىن ەسكى فورماتتاعى كوپتەگەن جينالىستى توقتاتىپ, ەلدەگى شەشىمىن تاپپاعان ماسەلەلەرگە جاۋاپتى وكىلدەردى الىپ, ەلدىڭ ورتاسىنا شىعۋدى ۇسىندى. اتاپ ايتقاندا, كاسىپورىن اۋلاسىندا, بازارلاردا, الاڭداردا, ساياباقتاردا, ەگىستىك القاپتارىندا, فەرمالاردا اشىق اسپان اياسىندا وتەتىن كەزدەسۋلەردە تۇرعىندار سالا ماماندارىنا تىكەلەي ساۋال قويىپ, جاۋابىن الۋ كەرەك.
ايتا كەتەلىك, جىل باسىنان بەرى Nur Otan پارتياسى تۇركىستان وبلىستىق فيليالىنىڭ قوعامدىق قابىلداۋ بولمەسىنە 5204 ارىز-شاعىم تۇسكەن. ونىڭ 2747-ءسى وڭتايلى شەشىلىپ, 2289 وتىنىشكە زاڭ اياسىندا كەڭەستەر بەرىلگەن, 168 ءوتىنىش بۇگىندە قارالۋ ۇستىندە. ارىز-شاعىمداردىڭ 2148-ءى الەۋمەتتىك كومەككە مۇقتاج جانداردان, ال 1629-ى تۇرعىن ۇيگە جانە جەرگە مۇقتاجدىق بويىنشا, 454-ءى جۇمىسقا ورنالاسۋ, زاڭسىز جۇمىستان شىعارۋ, ەڭبەكاقى ءوندىرۋ ماسەلەسىنە قاتىستى تۇسكەن. اسىرەسە كەلەس, ورداباسى, جەتىساي اۋداندارىنان شاعىمدانۋشىلار كوپ.
تۇركىستان وبلىسى
