ءىس-شارانى جۇرگىزگەن جازۋشىلار وداعى نۇر-سۇلتان قالالىق فيليالىنىڭ ديرەكتورى داۋلەتكەرەي كاپ ۇلى:
– سارىارقانىڭ سايىن دالاسىن دۇبىرلەتكەن كىندىك ازيانىڭ قاراشاڭىراعى – قازاق ەلى كەشەدەن بەرى ازيا ەلدەرى قالامگەرلەرىنىڭ فورۋمىن وتكىزىپ جاتىر. بۇگىنگى ءىس-شارا قازاق رۋحانياتىنا, اقىن-جازۋشىلارعا جوعارى دەڭگەيدە كوڭىل ءبولىنىپ جاتقانىنىڭ ايعاعى», – دەي كەلە, ءسوز كەزەگىن قالا اكىمىنىڭ ورىنباسارى باقتيار ماكەنگە بەردى.
نۇر-سۇلتان قالاسى اكىمىنىڭ ورىنباسارى باقتيار ماكەن جينالعان قوناقتاردى – قازاقتىڭ مارعاسقا قالامگەرلەرىن قالا باسشىسى اتىنان مەرەكەلەرىمەن شىن جۇرەكتەن قۇتتىقتاپ, شىعارماشىلىق تابىس تىلەدى.
سونداي-اق ءوز كەزەگىندە ءسوز العان ولجاس سۇلەيمەنوۆ پەن ۇلىقبەك ەسداۋلەت تە ارىپتەستەرىن ايتۋلى ءىس-شارامەن قۇتتىقتاپ, ىزگى تىلەگىن جەتكىزدى.
نۇر-سۇلتان قالاسى تىلدەردى دامىتۋ جانە مۇراعات ءىسى باسقارماسىنىڭ باسشىسى تىلەۋعالي قىشقاشباەۆتىڭ ايتۋىنا قاراعاندا, ەلوردانىڭ سارىارقا اۋدانىندا ورنالاسقان اللەياعا «قالامگەرلەر اللەياسى» دەگەن اتاۋ بەرۋدى ۇسىنعان.
ەسكە سالا كەتسەك, «قالامگەرلەر اللەياسى» ازيا قۇرلىعىندا ورنالاسقان ەلدەر اراسىنداعى ادەبي-مادەني بايلانىستاردى نىعايتۋ, ودان ءارى دامىتۋ ءھام ەگەمەندى ەلىمىزدىڭ بۇگىنگى كەسكىن-كەلبەتىن, قازاقستاننىڭ ادەبيەتىن, رۋحاني قۇندىلىقتارىن دارىپتەۋ, ادەبي ۇدەرىستىڭ دامۋىنا قاتىستى ازيا ەلدەرىمەن تاجىريبە الماسۋ ماقساتىندا قازاقستان جازۋشىلار وداعى, پرەزيدەنت اكىمشىلىگىنىڭ جانە مادەنيەت جانە سپورت مينيسترلىگىنىڭ قولداۋىمەن ءوتىپ جاتقان ازيا ەلدەرى قالامگەرلەرىنىڭ ءى فورۋمى اياسىندا نۇر-سۇلتان قالاسىندا اشىلدى.
قازىرگى تاڭدا اللەياعا ارنايى ەسكەرتكىش تاقتا ورناتىلدى. ەسكەرتكىش تاقتا ءبىلىمدى, دانالىقتى, شىعارماشىلىقتى بىلدىرەتىن اشىق تۇرعان كىتاپ بەينەسىندە بەرىلگەن. ەسكەرتكىش تاقتا بيىكتىگى – 150 سم, ەنى – 165 سم.
