قۇجاتتا نازار سالار بىرقاتار ماڭىزدى باعىتقا توقتالساق, بىرىنشىدەن, مەملەكەت باسشىسى قاسىم-جومارت توقاەۆتىڭ العاشقى جولداۋى ەلباسى نۇرسۇلتان نازارباەۆتىڭ مەملەكەتتىك كۋرسىنىڭ ستراتەگيالىق جولىن جالعاپ, ەلىمىزدى جاڭعىرتۋداعى باسىم باعىتتار بويىنشا ساباقتاستىقتى ساقتايدى. بۇل – قوعامدىق كۇشتەردى نىعايتۋ, مەملەكەتتىك اپپاراتتىڭ تيىمدىلىگىن ارتتىرۋ, شاعىن جانە ورتا بيزنەستى قولداۋ, ازاماتتاردىڭ الەۋمەتتىك احۋالىن كوتەرۋ, اگروونەركاسىپ سالاسىن دامىتۋدى ىنتالاندىرۋ جانە ت.ب.
ەكىنشىدەن, جولداۋدا حالىقتىڭ ناقتى ساۋالدارىنا جاۋاپ ىزدەۋ مەن ۇزاقمەرزىمدى سيپاتتاعى جۇيەلى شارالار اراسىندا تەڭگەرىم كورىنىس تاپقان. ماسەلەن, بۇل رەتتە ءبىر جاعىنان تەمىر جولداعى جولاۋشىلار تاسىمالىنداعى بيلەت تاپشىلىعى ماسەلەسىن, ەكىنشى جاعىنان سالىق جانە زەينەتاقى جۇيەسىن وڭتايلاندىرۋ ماسەلەسىن ايتۋعا بولادى.
ۇشىنشىدەن, ەكونوميكالىق ءوسىمدى ىنتالاندىرۋدا مەيلىنشە ءتيىمدى تەتىك رەتىندە شاعىن جانە ورتا بيزنەستى دامىتۋعا باسىمدىق بەرۋ تاعى دا نازارعا الىنىپ وتىر. وتاندىق ەكونوميكاداعى شاعىن جانە ورتا بيزنەس ۇلەسىن دامىعان ەلدەردەگى دەڭگەيگە, ياعني 50-60%-عا جەتكىزۋ تۋرالى ءبىز بۇرىننان ايتىپ كەلەمىز. ەكونوميكالىق ورلەۋگە كەلگەندە شاعىن جانە ورتا بيزنەس جاڭا قوزعاۋشى كۇشكە اينالۋى ءتيىس. جولداۋدا شاعىن جانە ورتا بيزنەستى قولداۋ بويىنشا ەڭ وزەكتى قادامدار جاريا بولدى. شاعىن جانە ورتا بيزنەس سۋبەكتىلەرىن 3 جىلعا سالىقتان بوساتۋ, مەملەكەتتىك تەكسەرىستەرگە ۇشجىلدىق موراتوري ەنگىزۋ, «بيزنەستىڭ جول كارتاسى» اياسىندا 250 ملرد تەڭگە ءبولۋ تۋرالى شارالار قاراستىرىلماق. تۇتاستاي العاندا, اتالعان قادامدار جەكەمەنشىك كاسىپكەرلىكتى دامىتۋعا وڭ اسەر ەتىپ, ساپالى جاعداي جاسالۋىنا سەپ بولماق.
تورتىنشىدەن, مەنىڭ ويىمشا, قوعام مەن بيلىك اراسىنداعى تىكەلەي ديالوگتى كۇشەيتۋگە باعىتتالعان ارەكەتتەر نازار اۋدارۋدى قاجەت ەتەدى. مەملەكەت باسشىلىعى ازاماتتىق سەكتورمەن بەرىك بايلانىس ورناتۋعا دايار ەكەندىكتەرىن اڭعارتۋمەن قاتار, ءوز نيەتىن ناقتى شارالار ارقىلى بەكىتە تۇسپەك. مىسال رەتىندە, ۇلتتىق قوعامدىق سەنىم كەڭەسىنەن بولەك, ميتينگ تۋرالى زاڭناماعا وزگەرىستەر ەنگىزۋ جونىندەگى كەشەندى شارالاردى كەلتىرۋگە بولادى. ەل باسشىلىعى حالىقتىڭ ازاماتتىق جانە ساياسي بەلسەندىلىگىن وڭ قابىل الىپ, تەك زاڭ شەبەرىنەن شىعىپ كەتپەۋگە شاقىردى.
ەكىنشى جاعىنان, جەرگىلىكتى ورگاندار مەن حالىق اراسىنداعى بايلانىستىڭ تيىمدىلىگىن ارتتىرۋعا بارىنشا كوڭىل بولىنگەن. بۇل رەتتە, مەنىڭشە, جەرگىلىكتى بيلىك جۇمىسىنىڭ تيىمدىلىگىن باعالاۋ جۇيەسى وڭ اسەرىن بەرۋى ءتيىس.
جالپى العاندا, بۇعان دەيىنگى جىلدارى وڭ ناتيجەسىن بەرگەن ەل دامۋىنىڭ نەگىزگى ۇلگىسى ساقتالىپ وتىر. ءبىز قازاقستاننىڭ تۇڭعىش پرەزيدەنتى – ەلباسىنىڭ جولعا قويعان ستراتەگيالىق ورلەۋ باعىتىنداعى ەۆوليۋتسيالىق دامۋ جولىن ءارى قاراي جالعاي تۇسەمىز.
ەرجان سالتىباەۆ,
الەمدىك ەكونوميكا جانە ساياسات ينستيتۋتىنىڭ ديرەكتورى
