بارا جاتىر باۋىر باسۋعا
جۇما, 29 ناۋرىز 2013 0:45
بۇگىندە اسا قاجەتتى ماماندىقتار قاتارىندا الدىمەن دارىگەرلەر اتالادى. ەلىمىز بويىنشا دەنساۋلىق ساقتاۋ سالاسىنا ارناۋلى ءبىلىمدى 5 مىڭ مەديتسينا قىزمەتكەر كۇتۋلى ەكەنى ءمالىم ماسەلە. ونىڭ بىرتىندەپ شەشىمى تابىلۋىنا «ديپلوممەن – اۋىلعا» باعدارلاماسىنىڭ جاستار تاراپىنان قولداۋ تاۋىپ, وسىناۋ شاراعا ىقىلاستى ىنتا تانىتۋى يگى اسەرىن تيگىزىپ كەلەدى. بۇل رەتتە قاراعاندى مەملەكەتتىك مەديتسينالىق ۋنيۆەرسيتەتى بيىلعى تۇلەكتەرىنىڭ تەڭ جارتىسىنان استامى, دالىرەك ايتقاندا, 60 پايىزىنىڭ ەڭبەك جولدارىن الىستاعى ەلدى مەكەندەردە, اۋدان ورتالىقتارىندا باستاۋعا تىلەك ءبىلدىرۋى سونىڭ ءبىر جارقىن كورىنىسى بولىپ تابىلادى.
جۇما, 29 ناۋرىز 2013 0:45
بۇگىندە اسا قاجەتتى ماماندىقتار قاتارىندا الدىمەن دارىگەرلەر اتالادى. ەلىمىز بويىنشا دەنساۋلىق ساقتاۋ سالاسىنا ارناۋلى ءبىلىمدى 5 مىڭ مەديتسينا قىزمەتكەر كۇتۋلى ەكەنى ءمالىم ماسەلە. ونىڭ بىرتىندەپ شەشىمى تابىلۋىنا «ديپلوممەن – اۋىلعا» باعدارلاماسىنىڭ جاستار تاراپىنان قولداۋ تاۋىپ, وسىناۋ شاراعا ىقىلاستى ىنتا تانىتۋى يگى اسەرىن تيگىزىپ كەلەدى. بۇل رەتتە قاراعاندى مەملەكەتتىك مەديتسينالىق ۋنيۆەرسيتەتى بيىلعى تۇلەكتەرىنىڭ تەڭ جارتىسىنان استامى, دالىرەك ايتقاندا, 60 پايىزىنىڭ ەڭبەك جولدارىن الىستاعى ەلدى مەكەندەردە, اۋدان ورتالىقتارىندا باستاۋعا تىلەك ءبىلدىرۋى سونىڭ ءبىر جارقىن كورىنىسى بولىپ تابىلادى. اتالعان وقۋ ورنىنىڭ پرورەكتورى باقىت كوشەروۆا ورتاعا سالعانداي, ەلدىڭ بارلىق وڭىرلەرىنەن جاس ماماندارعا سۇرانىس از بولماسا, سونىڭ ىشىندە اۋىلدىق جەرلەردەن وتە جوعارى ەكەن. ماسەلەن, بيىل 24 جۇمىس بەرۋشىدەن تۇسكەن 3 مىڭنان استام ءوتىنىش-تىلەكتىڭ باسىم بولىگى سونداي تاپسىرىسقا ارنالىپتى.
وزدەرىنىڭ ەرتەڭگى قىزمەتىنە, كۇتىلگەن كومەگىنە دەگەن زارۋلىكتى وقۋدى اياقتاپ قالۋشىلار جاقسى بىلەدى. بۇعان ءبىر جاعىنان ۋنيۆەرسيتەتتە جىل سايىن وتكىزىلىپ تۇراتىن بوس جۇمىس ورىندارى جارمەڭكەسى ارقىلى قانىق كوبى. قاي-قايسىسى دا قاتىسۋعا نيەتتىلى, وندا ولار جان-جاقتان كەلىپ ماماندار تارتۋشىلارمەن قالاۋلارىنا قاراي كەلىسىم-شارتتار جاساپ, ەڭبەك ەتەر, بارار جەرلەرىن شەشىپ جاتادى.
سولاردىڭ ءبىرى بولاشاق تەراپەۆت انار نۇراشينا سولتۇستىك قازاقستان وبلىسىنىڭ قىزىلجار اۋدانىنا ءوز ەركىمەن بارۋعا كەلىسكەن.
– بەسكول اۋىلىنداعى ورتالىق اۋرۋحاناعا دارىگەر بولىپ ورنالاسامىن. اۋەلى تەراپەۆت رەتىندە ىسكە ىسىلعان سوڭ فتيزياتورلىققا بىلىكتىلىكتى كوتەرۋ ويىمدا بار. بۇل ماقساتىم قولدانىپ وتىر. ۋاعدا بويىنشا بىرجولعى ماتەريالدىق كوتەرمە سىيلىق, باسپانا بەرىلۋىنە قۋانىشتىمىن. بارىنەن دە جەرگىلىكتى جۇرت سەنىمىن اقتاي الىپ, شىن مانىندەگى جاقسى دارىگەر اتانۋ قىمبات ماعان. سول ءۇشىن بارا جاتىرمىن, – دەيدى ول. اقمولا وبلىسىنىڭ اقكول اۋدانىنا شاقىرۋشىلار تىلەگىن قۇپ العان ەرتەڭگى حيرۋرگ ەرىك شونباەۆ تا وسىنداي ويدا. ونىڭ ايتۋىنشا قالادان گورى اۋىلدا دارىگەرلىك شەبەرلىك شىڭداۋعا, تاجىريبە تەرەڭدەتۋگە مۇمكىندىك كەڭ, سوندىقتان وسىنداي ورتانى قالاۋعا كوڭىلى اۋعان كورىنەدى.
اتالعان جارمەڭكەگە ارنايى قاتىسۋشى وڭىرلەر وكىلدەرى ءبىرازىنىڭ جولى بولدى. اسىرەسە, وڭتۇستىكقازاقستاندىقتار تىلەكتەرىنە ىقىلاس بىلدىرۋشىلەر از بولمادى. وسى جاقتان 27 جاس مامانمەن ۋاعدالاستىق جاساۋ جوبالانسا, وسىنشا كەلىسىم بەرىلدى. رۋدنىي قالالىق ەمحاناسىنىڭ دارىگەرى ۆيكتور ۆايزەر دە قاتارلارىن بىردەن 5 جاس ارىپتەس تولىقتىراتىندىعىنا قۋانىپ قايتتى. جالپى العاندا 300-گە تارتا تۇلەكتىڭ 180-ءى اۋىل مەديتسيناسى مەرەيىن كوتەرۋگە ىنتالىلىعى تانىلدى.
بىلىكتى دارىگەرلەر دايارلاۋداعى بەدەلى ەرتەدەن بيىك قاراعاندى بۇل وقۋ ورنىن بىتىرۋشىلەرگە سۇرانىس ءاردايىم جوعارى. بىلتىر تۇلەكتەرىنىڭ 99,5 پايىزى قالاعان ماماندىقتارى بويىنشا ەڭبەككە ارالاستى. سولاردىڭ 50 پايىزى اۋىل تۇرعىندارىمەن تاعدىر توعىستىردى. ال بيىل قوسىلا باۋىر باسۋعا بارا جاتقاندار 10 پايىزعا ۇلعايدى. ەل قۇشاعى اشىق ولارعا قاشاندا, سوعان اسىق جاس دارىگەرلەر.
ايقىن نەسىپباي,
«ەگەمەن قازاقستان».
قاراعاندى.
––––––––––––––
سۋرەتتى تۇسىرگەن لينار گاليموۆ.
