بولاشاققا اپاراتىن جول داڭعىل دا سارا بولۋى ءۇشىن…
جۇما, 15 ناۋرىز 2013 2:11
الماتى, باتىس قازاقستان جانە قاراعاندى وبلىستارىندا «ەلىمنىڭ تاعدىرى – مەنىڭ تاعدىرىم!» ايماقتىق فورۋمى ءوتتى. ءىس-شارانىڭ باستى ماقساتى: زامانداستارىمىزدىڭ ءپوزيتيۆتى دۇنيەتانىمى مەن جاسامپاز كۇشىن ايعاقتايتىن قازاقستان رەسپۋبليكاسى ازاماتتارىنىڭ جەتىستىكتەرى تاريحىن اشىپ كورسەتۋ; ەلباسى – قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ ستراتەگياسىنىڭ جاڭا تاۋەلسىز مەملەكەت ورناتۋداعى تابىسىن وتانداستارىمىزدىڭ تاعدىرى ارقىلى كورسەتۋ.
جۇما, 15 ناۋرىز 2013 2:11
الماتى, باتىس قازاقستان جانە قاراعاندى وبلىستارىندا «ەلىمنىڭ تاعدىرى – مەنىڭ تاعدىرىم!» ايماقتىق فورۋمى ءوتتى. ءىس-شارانىڭ باستى ماقساتى: زامانداستارىمىزدىڭ ءپوزيتيۆتى دۇنيەتانىمى مەن جاسامپاز كۇشىن ايعاقتايتىن قازاقستان رەسپۋبليكاسى ازاماتتارىنىڭ جەتىستىكتەرى تاريحىن اشىپ كورسەتۋ; ەلباسى – قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ ستراتەگياسىنىڭ جاڭا تاۋەلسىز مەملەكەت ورناتۋداعى تابىسىن وتانداستارىمىزدىڭ تاعدىرى ارقىلى كورسەتۋ.
فورۋمنىڭ ەستافەتاسىن الماتى وبلىسىندا كەربۇلاق, ۇيعىر جانە پانفيلوۆ اۋداندارى قابىلدادى. بۇگىنگى كۇننىڭ مۇنداعى ەرلەرىنىڭ قاتارىندا الماتى وبلىسىنىڭ قۇرمەتتى ازاماتى تولەندى سارىباەۆ, ۇيعىر اۋداندىق «ارداگەرلەر» ۇيىمى جانىنداعى اجەلەر القاسىنىڭ ءتورايىمى رايا سارتولوۆا, پانفيلوۆ اۋداندىق ارداگەرلەر كەڭەسىنىڭ توراعاسى ساعىمبەك ۇشباەۆ, ۇيعىر اۋداندىق «ارداگەرلەر» ۇيىمىنىڭ توراعاسى نۋرۆياگ سەيىتوۆ, قوناەۆ اتىنداعى ورتا مەكتەپتىڭ ديرەكتورى, كەربۇلاق اۋدانىنىڭ قۇرمەتتى ازاماتى كۇلاش مەرەنباەۆا, اۋداندىق ۇيعىر ەتنومادەني بىرلەستىگىنىڭ توراعاسى راقىمجان توحتاحۋنوۆ, پانفيلوۆ اۋدانى ءبىلىم ءبولىمىنىڭ باستىعى باعيرا جازىلبەكوۆا, پانفيلوۆ اۋدانى ورتالىق اۋرۋحاناسىنىڭ باس دارىگەرى تولەۋ سارپەكوۆ, كەربۇلاق اۋدانى جۇمىسپەن قامتۋ ورتالىعىنىڭ باس مامانى, II رەسپۋبليكالىق «جاس وتان» جق سەزىنىڭ دەلەگاتى جانارىم حاميدۋللاەۆا, جاركەنت گۋمانيتارلىق-تەحنيكالىق كوللەدجىنىڭ وقىتۋشىسى, جاس مامان ەرجان يساەۆ, سارىوزەك ورتا مەكتەبىنىڭ «التىن بەلگىدەن» ۇمىتكەر 11 سىنىپ وقۋشىسى زەرە ماراتقىزى جانە ت.ب. بولدى.
«مەن قازاقستاندا دۇنيەگە كەلىپ, وسىندا ءوستىم, – دەپ باستادى ءوز ءومىرى جايلى ءسوز العان شونجى اۋىلى №1 ورتا مەكتەبى ديرەكتورىنىڭ ورىنباسارى, ءبىلىم بەرۋ ءىسىنىڭ ۇزدىگى ەكاتەرينا كوجەۆنيكوۆا. – ەڭبەك جولىمدى شونجىدا باستادىم. مەكتەپتە جۇمىس ىستەدىم. قازىرگى كەزدە وتكەن كۇن مەن بۇگىنگى كۇننىڭ وزگەرىسىن سالىستىرىپ قارايمىن. ءبىلىم بەرۋ جۇيەسىنىڭ قالاي وزگەرىسكە ءتۇسىپ جاتقانىن, ومىرىمىزگە قانداي جوبالار ەنگەنىن, بالالاردىڭ قالاي ءوسىپ كەلە جاتقانىن زور قاناعاتپەن قابىلدايمىن! شىن مانىندە, تولىققاندى بىلىمگە قول جەتكىزبەگەن كەز كەلگەن ۇلت الەمدىك ۇدەرىستەردىڭ ينتەللەكتۋالدى شەكاراسىندا قالىپ قويادى دا, ال مەملەكەت ەشقاشان ولجالى بولا المايدى. سونىمەن بىرگە, جاھاندانۋدىڭ بۇگىنگى تالابىندا ءبىلىم ۇلتتىڭ كۇش-قۋاتى مەن داۋلەتىن انىقتايتىن فاكتورعا اينالۋدا. بۇل باسىمدىقتى ەلىمىزدىڭ پرەزيدەنتى نۇرسۇلتان ءابىش ۇلى نازارباەۆ تا ءاردايىم ايتىپ كەلەدى.
ءوزىمنىڭ قازاقستان رەسپۋبليكاسىنىڭ ازاماتى بولعانىم كەۋدەمە زور ماقتانىش سەزىمىن ۇيالاتادى. بۇگىندە ءبىزدىڭ ەكونوميكامىز ءوسىپ كەلەدى, ادامداردىڭ ءال-اۋقاتى جاقسارا تۇسكەن, جاڭا ءوندىرىس ورىندارى اشىلىپ جاتىر. پرەزيدەنتتىڭ بارلىق جوباسى مەن جوسپارى ىسكە اسىپ جاتىر, ويتكەنى, ونىڭ ارتىندا ءبىزدىڭ تۇتاس حالقىمىز تۇر.
ءاربىر ەلىنىڭ پاتريوتى مەملەكەتىنىڭ جارقىن بولاشاعىنا شەكسىز سەنىپ قانا قويماۋى كەرەك, سونداي-اق بولاشاققا اپاراتىن جولدىڭ داڭعىل دا سارا بولۋى ءۇشىن ايانباي بار كۇش-جىگەرىن جۇمساۋى كەرەك».
«بۇگىنگى فورۋم اۋدان جاستارىنىڭ عانا ەمەس, قازاقستاننىڭ بارلىق ازاماتتارىنىڭ كەۋدەسىندەگى پاتريوتتىق سەزىمدەرىن ارتتىراتىنىنا سەنىمدىمىن. سوندىقتان ءوز اتىمنان ەلىمىزدىڭ بولاشاعى – جاس جەتكىنشەكتەرگە ايتارىم, قانداي جاعداي بولسا دا, ەلىمىزدىڭ قاۋىپسىزدىگىن, تىنىشتىعىن, بولاشاعىن ساقتاۋ مەن وتانىمىزدى قورعاۋ جولىندا كۇش-جىگەرىمىزدى ايامايىق!», – دەدى جينالعانداردى وتانشىلدىققا شاقىرعان №2534 اسكەري ءبولىمنىڭ اسكەري قىزمەتكەرى مەحريشات اشيماحۋنوۆ. بۇل جاي ايتىلا سالعان ءسوز ەمەس ەدى. م.اشيماحۋنوۆ 2010 جىلى شەكارا بۇزۋشىلاردى قولعا ءتۇسىرۋ بارىسىندا جاراقاتتانىپ, كەيىن «جاۋىنگەرلىك ەرلىگى ءۇشىن» مەدالىمەن ماراپاتتالعان بولاتىن.
ءوز جەتىستىكتەرىنىڭ تاريحىنان سىر شەرتكەن ءاربىر سپيكەرلەر ەلىمىزدىڭ باستى بايلىعى – بەيبىتشىلىك پەن كەلىسىمدە جاتقانىن اتاپ كورسەتتى, شىنىن ايتقاندا, قازىرگى تاڭداعى كىسى تاڭدانارلىق جەتىستىكتەرگە ونسىز قول جەتكىزۋ قيىن بولار ەدى.
«قازاقستانعا كەلگەن ساتىمنەن باستاپ الدىمنان شىققان قيىندىقتارعا قاراماستان, كوپتەگەن قازاقستاندىقتاردىڭ, سونىڭ ىشىندە مەنىڭ دە, وتباسىمنىڭ دا تۋعان جەرىندەي بولىپ وتانىمىزعا اينالىپ ۇلگەرگەن وسىناۋ قاسيەتتى جەردە ءومىر ءسۇرىپ جاتقانىما ەشقاشان وكىنگەن ەمەسپىن, – دەگەن ۇستانىمىن ورتاعا سالدى №2091 اسكەري ءبولىمى كومانديرىنىڭ ورىنباسارى, دون وبلىسىنىڭ تۋماسى ي.پولوزەنكو. – ءاردايىم ءوزىم قولداعان, ءالى دە قولداي بەرەتىن پرەزيدەنتتىڭ دانالىعى مەن شىنايى كۇش-جىگەرىنە سەنىپ, قازاقستان حالقىمەن بىرگە نە كورسەم دە بىرگە كورەيىن دەپ بەل بۋدىم. وعان كوز الدىمىزداعى حالىقتىڭ ءال-اۋقاتى مەن ەكونوميكانىڭ ءوسۋى, حالىقارالىق ارەناداعى بەدەلىمىز, ءاربىر وتانداستارىمىزعا دەگەن قامقورلىق, ەڭبەك پەن شىعارماشىلىققا بەرىلگەن ەركىندىك, ەلىمىزدىڭ بولاشاق ۇرپاقتارىنىڭ يگىلىگىنە دەگەن تىنىشتىققا كۋا بولىپ وتىرعانىمىزدى ايتۋعا بولادى».
* * *
«ەلىمنىڭ تاعدىرى – مەنىڭ تاعدىرىم!» ايماقتىق فورۋمى باتىس قازاقستاندا ءبىرىنشى بولىپ جانىبەك اۋدانىندا ءوتتى. وسىناۋ سالتاناتتى شاراعا اۋداننىڭ تانىمال ادامدارى, مەمورگان وكىلدەرى, ۇەۇ, ينتەلليگەنتسيا مەن جاستار شاقىرىلدى. ەلىنىڭ تاعدىرىمەن ساباقتاسقان عۇمىرى تۋرالى اۋداندىق ارداگەرلەر كەڭەسىنىڭ توراعاسى بەكەت الىپقاليەۆ, اۋداندىق ءماسليحات دەپۋتاتى, ە.نيەتقاليەۆ اتىنداعى ورتا مەكتەپتىڭ ديرەكتورى توقتاعان ۇمىتاەۆا, «زدوروۆە» جشس ديرەكتورى نينا دۋيۋنوۆا, ت.جاروكوۆ اتىنداعى ورتا مەكتەپتىڭ حيميا ءپانى مۇعالىمى ميراسبەك تورەشوۆ پەن اۋداندىق جاسوسپىرىمدەر مەن بالالاردىڭ سپورت مەكتەبىنىڭ اعا جاتتىقتىرۋشىسى سىرىم بايىسوۆ قاتىستى.
«…دارىحانالىق ىسىمەن اينالىسا باستاعان كەزدە, قيىندىقتار از بولعان جوق, – دەپ ەسكە الادى كاسىپكەرلىك جولىنداعى العاشقى قادامدارىن ەسكە تۇسىرگەن ن. دۋيۋنوۆا. – بيزنەستى دامىتۋ ءتۇرلى مەمورگانداردىڭ باسشىلارى مەن قاراپايىم تۇرعىنداردىڭ ءوزارا تۇسىنىستىگى مەن كومەك كورسەتۋىنە جول اشتى. بۇعان, اسىرەسە, ءدارىحانام ورتەنىپ كەتكەندە انىق كوزىم جەتتى. سول كەزدە ماعان ءتۇرلى ۇلت وكىلدەرى مەن كاسىپ يەلەرى قولداۋ كورسەتتى. سوندا مەن ءبىزدىڭ حالقىمىزدىڭ دوستىعى مەن بىرلىگىنىڭ بەرىك ەكەنىن ناقتى ۇقتىم. وسىنداي مىقتى حالىقپەن بىرگە كەز كەلگەن شىڭدى باعىندىرۋعا بولادى!»
* * *
بۇل كۇنى وتانعا دەگەن ەڭ بيىك ماحابباتى تۋرالى قاراعاندى وبلىسىنىڭ اقتوعاي اۋدانىندا اۋدان اكىمى, اۋعان سوعىسىنىڭ ارداگەرى قايرات نوكەش, اۋداندىق ارداگەرلەر كەڭەسىنىڭ ءتوراعاسى مادەنيەت ساتەكوۆ پەن ەڭبەك ارداگەرى تورعاي اقپانباەۆا, اقتوعاي ارحەولوگيالىق-ەتنوگرافيالىق مۇراجايىنىڭ ديرەكتورى تۇڭعىشباي مۇقان, اۋداندىق جاستارمەن جۇمىس جاساۋ ورتالىعىنىڭ باس مامانى, اۋداندىق ءماسليحاتتىڭ دەپۋتاتى, «جاس وتان» جق اتقارۋشى حاتشىسى ميراس قاسىمحان ءسوز سويلەدى.
«بار دەگەن وڭالادى, جوق دەگەن جوعالادى» دەگەن بابالار ءسوزىن دە ەستەن شىعارماعان ءجون, – دەدى ەل الدىندا ءسوز العان م. قاسىمحان. – ءبىر كۇن اش, ءبىر كۇن توق بولساڭ دا تۋعان جەرىڭدە كەۋدەڭدى كەرە دەمالىپ جۇرگەنگە ەشتەڭە جەتپەيدى. قازاقستاننىڭ الداعى اسۋلاردان سۇرىنبەي ءوتۋى ءۇشىن جاستاردان قاشاندا بەلسەندىلىك كۇتىلەدى. جۇمىلساق جۇدىرىق, اشىلساق الاقان بولساق, ءبىزدى ەشقانداي داۋ دا, ەشقانداي جاۋ دا الا الماسى انىق. ءبىز, جاستار ەلىمىزدىڭ قوعامدىق ومىرىنە بەلسەنە ارالاسىپ, ونىڭ وركەندەۋىنە ۇلەسىمىزدى قوسۋعا ءتيىستىمىز! ويتكەنى, ءبىزدىڭ بولاشاعىمىز تىكەلەي وسىعان بايلانىستى!».
ەسكە سالا كەتسەك, ءبىرىنشى رەسپۋبليكالىق «ەلىمنىڭ تاعدىرى – مەنىڭ تاعدىرىم!» فورۋمى 2012 جىلدىڭ شىلدەسىندە, ەلوردا كۇنى قارساڭىندا استانادا وتكىزىلگەن بولاتىن. ءىس-شارانىڭ باستاماشىسى جانە ۇيىمداستىرۋشىسى كوپفۋنكتسيالى عىلىمي-تالدامالىق جانە گۋمانيتارلىق-اعارتۋشىلىق «نازارباەۆ ورتالىعى» مەملەكەتتىك مەكەمەسى بولدى. فورۋم قوعامدا كەڭىنەن رەزونانس تۋعىزىپ, ونى ەندىگى كەزەكتە جىل سايىن ەلدىڭ بارلىق ايماقتارىندا وتكىزۋ تۋرالى شەشىم قابىلداندى.
ايماقتىق فورۋم ەكى كەزەڭدە ءوتكىزىلەدى: ءبىرىنشىسى – اۋداندىق دەڭگەيدە, ەكىنشىسى – وبلىستىق, استانا جانە الماتى قالالارى دەڭگەيىندە. ەلوردا كۇنى قارساڭىندا استانادا وتكىزىلەتىن «ەلىمنىڭ تاعدىرى – مەنىڭ تاعدىرىم!» ەكىنشى رەسپۋبليكالىق فورۋمىنا قاتىسۋعا لايىقتى دەگەندەرى جولداما الادى.
ساۋلەبەك كوكشە ۇلى.
