كۇن ەنەرگياسىمەن قۋاتتانعان كولىك
سارسەنبى, 27 اقپان 2013 7:13
ق.ا.ياساۋي اتىنداعى حقتۋ-گە قاراستى ارنايى مامانداندىرۋ ورتالىعىنىڭ قىزمەتكەرلەرى كۇن ەنەرگياسىمەن جۇرەتىن كولىكتى قۇراستىرىپ شىعاردى. قول كۇشىمەن قۇراستىرىلعان ماشينا نەگىزگى قۋاتتى كۇننەن الادى. ياعني, توبەسىنە ورناتىلعان ارنايى قۇرىلعى ارقىلى ەنەرگيانى اككۋمۋلياتورعا جينايدى. سودان كىلتتى بۇراپ, كولىكتى قوزعالىسقا تۇسىرۋگە تولىق مۇمكىندىك بار.
سارسەنبى, 27 اقپان 2013 7:13
ق.ا.ياساۋي اتىنداعى حقتۋ-گە قاراستى ارنايى مامانداندىرۋ ورتالىعىنىڭ قىزمەتكەرلەرى كۇن ەنەرگياسىمەن جۇرەتىن كولىكتى قۇراستىرىپ شىعاردى. قول كۇشىمەن قۇراستىرىلعان ماشينا نەگىزگى قۋاتتى كۇننەن الادى. ياعني, توبەسىنە ورناتىلعان ارنايى قۇرىلعى ارقىلى ەنەرگيانى اككۋمۋلياتورعا جينايدى. سودان كىلتتى بۇراپ, كولىكتى قوزعالىسقا تۇسىرۋگە تولىق مۇمكىندىك بار.
باس قۇراستىرۋشى – ساتىلمىش چايىر. قازىرگى كەزدە ول ارنايى مامانداندىرۋ ورتالىعىندا ءدارىس بەرەدى. ۋاقىتتى بوسقا وتكىزبەۋگە داعدىلانعان مامان قولى قالت ەتكەندە قوعامعا قاجەتتى دۇنيەنى جاساۋعا ۇمتىلادى.
– 1930 جىلى شىققان ماشينالاردىڭ سۋرەتىنە قاراپ وتىرىپ قۇراستىردىق. نەگىزگى ماقساتىمىز ەسكى كولىكتى جاڭا تەحنولوگيامەن جاراقتاندىرۋ بولدى. كۇن ەنەرگياسىن قابىلدايتىن قۇرىلعىنى قىتايدان, ال اككۋمۋلياتوردى يتاليادان الدىردىق. ساپاسى وتە جوعارى. سودان جارامسىز بولىپ قالعان «جيگۋلي» ماشيناسىنىڭ قاڭقاسىن قىرقىپ, قايتا جالعاي وتىرىپ ويىمىزداعى كولىكتى قۇراستىرىپ شىقتىق. قازىر تەك ءارلەۋ, ادەمىلەۋ جۇمىستارىن جاساپ جاتىرمىز, – دەيدى ساتىلمىش چايىر.
كۇن ەنەرگياسىمەن قۋاتتانعان كولىك سىرتى ەسكى بولعانىمەن, ءىشىنىڭ بارلىعى دا جاپ-جاڭا. ءتىپتى, قوزعالتقىشىنىڭ وزىنە زامان تالابىنا ساي اۆتوماتتاندىرىلعان جۇيە ورنالاستىرىلعان.
– كولىكتى تۇركىستاننان كەنتاۋعا دەيىن ايداپ كەلدىم. كۇن بۇلتتى بولعان جاعدايدا اككۋمۋلياتورعا جينالعان توكتىڭ كۇشىمەن ءجۇز شاقىرىمعا دەيىن جۇرە بەرەدى. ال كۇن شىعىپ تۇرسا, ەشقانداي ماسەلە تۋىندامايدى. سونىمەن قاتار, گەنەراتورمەن جانە كەز كەلگەن جەردەگى رازەدكا ارقىلى زارياد الا الادى. ماشينا ەكولوگيالىق ءارى ەكونوميكالىق ءتيىمدى, – دەيدى قۇراستىرۋشى.
تۇركيادان كەلىپ, قازاق بالالارىن كاسىبي ءبىلىم الۋعا باۋلىپ جۇرگەن مامان يەسىنىڭ بۇل العاشقى تۋىندىسى ەمەس. ياعني, بۇنىڭ الدىندا دا بەنزينمەن جۇرەتىن جانە كۇن ەنەرگياسىنان قۋات الاتىن موتوتسيكلدى قۇراستىرىپ, ىسكە قوسقان. استانادا وتكەن كورمەگە قويىلعان كولىكتەر العاشقى جۇلدەنى دە جەڭىپ الىپتى. ەكى ماشينا دا پاتتەنتتەلگەنىمەن, ولارعا ارنايى اتاۋ بەرىلمەگەن. قازىرگى كەزدە كولىكتەر وقۋ ورنىنىڭ مۇراجايىنا قويىلعان. ءبىر ايتا كەتەرلىگى, قاراپايىم مۇعالىم تەك كولىك قۇراستىرمايدى. شەبەر بۇعان دەيىن ۋنيۆەرسيتەت اۋلاسى مەن كوتتەدجىندەگى 80 جارىقشام مەن پروجەكتورلاردى كۇن ەنەرگياسىنا قوسقان. سونداي-اق ۇلكەن كيىز ءۇيدىڭ توبەسىنە كۇن ەنەرگياسىنىڭ اينالمالى قۇرىلعىسىن ورناتقان. ياعني, شىعىستان شىققان كۇننىڭ كوزىمەن بىرگە قۋات الاتىن قۇرىلعى دا اينالىپ وتىرادى. 220 ۆولتپەن جاراقتانعان ءۇي ىشىندە تەلەديدار كورىپ, مۋزىكا تىڭداۋعا تولىعىمەن جاعداي جاسالعان. بۇگىنگى كۇنى ساتىلمىش چايىر كۇننەن ەنەرگيا الاتىن اريستوندى قۇراستىرۋ ۇستىندە.
قايرات زاينيشەۆ.
وڭتۇستىك قازاقستان وبلىسى,
كەنتاۋ قالاسى.
