بۇل قاراجات بىلتىرعىدان ءۇش ەسە كوپ. قازىر قۇرال-جابدىقتاردىڭ بىرقاتارى ورناتىلىپ, قىزمەت ساپاسىنىڭ الدەقايدا جاقسارعانى بايقالادى. رەسمي مالىمەتتەرگە سۇيەنسەك, 9 مىڭ سولتۇستىك- قازاقستاندىقتىڭ اعزاسىندا قاتەرلى ىسىك بار. ناۋقاستار بۇدان بىلاي 140 ملن تەڭگەگە فينليانديادان جەتكىزىلگەن سوڭعى ۇلگىدەگى تسيفرلى مامموگرافتىڭ كومەگىنە سۇيەنە الادى. بۇل ارقىلى ءسۇت بەزىنىڭ قاتەرلى ىسىگىن باستاپقى كەزەڭدە بىردەن انىقتايدى. بۇرىنعى ۋلترادىبىستىق اپپاراتپەن ءسۇت بەزىنىڭ جاڭادان پايدا بولعان ىسىگىن ايىرۋ وتە قيىن-تۇعىن.
ونكولوگيالىق ديسپانسەردىڭ باس دارىگەرىنىڭ ورىنباسارى ولەگ دۋدياكتىڭ ايتۋىنشا, وبىر اۋرۋىنىڭ تارالۋى جونىنەن وبلىستا كورسەتكىش جوعارى. ونىڭ ىشىندە ءسۇت بەزىنىڭ قاتەرلى ىسىگى كەڭىنەن تارالعان. ەسەپكە ەكى مىڭنان استام ايەل الىنسا, 113-ءنىڭ كەسەلى بيىل انىقتالىپتى. قوندىرعىنىڭ كوپ ارتىقشىلىقتارىنىڭ بىرىنە ءسۇت بەزىنىڭ ءاربىر ميلليمەترىن زەرتتەيتىن «توموسينتەز» فۋنكتسياسىن اتاۋعا بولادى.
جۋىردا ءوڭىر باسشىسى قۇمار اقساقالوۆ وبلىستىق ەرەسەكتەر اۋرۋحاناسىنا ورناتىلعان زاماناۋي كومپيۋتەرلىك توموگرافتىڭ جۇمىسىمەن تانىستى. ونىڭ قۇنى 347 ملن تەڭگە, 250 ملن-ى جەرگىلىكتى قازىنادان بولىنگەن. ناۋقاستىڭ ءىش قۇرىلىسى اۋرۋلارىن وتە دالدىكپەن زاماتتا ايقىنداپ بەرەدى. جانە دە ءبىر عاجابى, اقش-تان اكەلىنگەن قۇرىلعىنىڭ دياگنوستيكالىق قورىتىندىسىن الەمنىڭ كەز كەلگەن جەرىنە جولداۋعا بولادى. سەرۆەرلىك نۇسقاداعى ستانسا ارقىلى ءۇش مامان ءبىر مەزگىلدە زەرتتەۋ جۇرگىزە الادى. اۋرۋحانا دارىگەرى يۆان لەيمان ماگنيتتىك-رەزونانستىق توموگرافتىڭ ابدەن ەسكىرگەنىن, ءجيى سىنا بەرەتىنىن ايتىپ ەدى, قۇمار ىرگەباي ۇلى جىل اياعىنا دەيىن جاڭاسىن الىپ بەرۋگە ۋادە ەتتى. بۇعان قوسا زاماناۋي انگيوگراف تا الىنادى. ەسكى توموگراف تايىنشا اۋداندىق اۋرۋحاناسىنا بەرىلىپ, ايىرتاۋ, اقجار, ءۋاليحانوۆ اۋداندارىنىڭ تۇرعىندارىنا قىزمەت كورسەتەدى.
«دەنساۋلىق ساقتاۋ سالاسىنىڭ ماتەريالدىق-تەحنيكالىق بازاسىن نىعايتۋ, كادرلار تاپشىلىعىن جويۋ باعىتىندا جۇيەلى شارالار اتقارىلىپ كەلەدى. بيىل ەمدەۋ مەكەمەلەرى 66 جەدەل جاردەم كولىگىمەن, 80-گە جۋىق قۇرال-جابدىقپەن قامتاماسىز ەتىلەدى. كۇزگە تامان 500 ورىندى كوپبەيىندى اۋرۋحانانىڭ قۇرىلىسى باستالادى. جوعارى ءبىلىمدى 170 جاس دارىگەردىڭ كەلۋىن توسىپ وتىرمىز. ولاردىڭ جارتىسىنا جۋىعى اۋىلدىق جەرلەرگە ورنالاستىرىلادى. ەلدى مەكەنگە جولداما العان ماماندارعا 1,5 ملن, قالالىقتار ءۇشىن 500 مىڭ تەڭگە كوتەرمەاقى تولەنەدى. «ديپلوممەن – اۋىلعا! باعدارلاماسى اياسىندا جاسالاتىن جەڭىلدىكتەر از ەمەس. قازىر
47 پاتەر دايىن», دەدى وبلىس باسشىسى باق وكىلدەرىنە بەرگەن سۇحباتىندا.
سولتۇستىك قازاقستان وبلىسى
