• 26 قاڭتار, 2013

مەملەكەتتىك قىزمەتتىڭ جاڭا جۇيەسى

598 رەت

كورسەتىلدى

10 مين

وقۋ ءۇشىن

Egemen Qazaqstan

مەملەكەتتىك قىزمەتتىڭ جاڭا جۇيەسى

سەنبى, 26 قاڭتار 2013 7:36

جولداۋ كادر ساياساتىنداعى جاڭا باعىتتاردى بەلگىلەپ, كاسىبي دايارلىقتىڭ ەرەكشە جەتىلدىرىلگەن ادىستەمەلەرىن ەنگىزىپ وتىر

پرەزيدەنت نۇرسۇلتان نازارباەۆتىڭ «قازاقستان-2050» ستراتەگياسى – قالىپتاسقان مەملەكەتتىڭ جاڭا ساياسي باعىتى» جولداۋى جۇرتشىلىق تاراپىنان جاڭا سيپاتتى قۇجات رەتىندە باعالانىپ وتىر. ستراتەگيالىق باعدارلامادا ەكونوميكالىق الەۋەتى كەمەلىنە كەلىپ, وركەنيەت كوشىنە قوسىلعان قازاقستاننىڭ ۇزاق مەرزىمدى دامۋ جولدارى جان-جاقتى قاراستىرىلعان. نەگىزگى باسىمدىقتار مەملەكەتتىلىگىمىزدى ودان ءارى نىعايتۋ, ۇلتتىق ەكونوميكانى سەرپىندى دامىتۋ, حالىقتىڭ ءال-اۋقاتىن ارتتىرۋ, قوعامداعى تۇراقتىلىق مەن كەلىسىمدى قامتاماسىز ەتۋ سەكىلدى وتكىر ماسەلەلەرگە اۋدارىلىپ, باسەكەگە اسا قابىلەتتى 30 ەلدىڭ قاتارىنا ەنۋ باعىتى ناقتى سارالانعان.

سەنبى, 26 قاڭتار 2013 7:36

«قازاقستان-2030» ستراتەگياسىنىڭ تابىستى قورىتىندىلارىنا وي جىبەرە وتىرىپ, العا قويعان ورەلى ماقساتتار ءار قازاقستاندىقتى بەرىك جاۋاپكەرشىلىك پەن تاباندى سەنىمدىلىككە ۇمتىلدىرارى انىق. مەملەكەت باسشىسىنىڭ تەرەڭنەن ويلاستىرىلعان بايىپتى دا ۇستامدى ساياساتىنىڭ ءبىر پاراسى مەملەكەتتىك اپپاراتتىڭ جاۋاپكەرشىلىگىن, ءتيىمدىلىگى مەن فۋنكتسيونالدىعىن ارتتىرۋعا ارنالعان. ول جونىندە «مەملەكەتتىلىكتى ودان ءارى نىعايتۋ جانە قازاقستاندىق دەموكراتيانى دامىتۋ» تاراۋىندا ەگجەي-تەگجەيلى باياندالىپ, مەملەكەتتىك باسقارۋدىڭ جاڭا ءتۇرلەرى ۇسىنىلعان. قىزمەت ەتۋ مەن مەملەكەتتىلىكتى نىعايتۋدىڭ جاڭا مىندەتتەرگە ساي بولۋى, حالىققا جانە مەملەكەتكە قىزمەت ەتۋدى بارلىعىنان جوعارى قوياتىن كاسىپقوي مەملەكەت اپپاراتىن قالىپتاستىرۋ تالاپتارى ناقتى اتاپ كورسەتىلگەن.
بۇگىنگى كۇنى مەملەكەتتىك قىزمەتتىڭ كادرلىق قۇرامىن ىرىكتەۋ, كاسىبي دايارلىقتىڭ جەتىلدىرىلگەن ادىستەمەلەرىن ەنگىزۋ ارقىلى ساپالى تۇردە جاقسارتۋ ەرەكشە ماڭىزعا يە. بۇل تۇرعىدان العاندا, ەلىمىزدىڭ مەملەكەتتىك قىزمەت ءجۇيەسىندە حالىقارالىق ساراپشىلار مويىنداعان اۋقىمدى وزگەرىستەردى باسشىلىققا الا وتىرىپ, ءىس-ءتاجىريبەلەردى جەتىلدىرۋ, بايىتا ءتۇسۋ ەش ارتىقتىق ەتپەيدى. بىزدە كادر قىزمەتى ەڭبەككەرلەرىنىڭ ساراپشىلار كەڭەسى جۇمىس ىستەيدى. ونىڭ قۇرامىنا وبلىستىق جانە اۋداندىق مەملەكەتتىك ورگانداردىڭ كادر قىزمەتتەرىنىڭ ءتاجىريبەلى باسشىلارى ەنگەن. ولار مەملەكەتتىك قىزمەت ىستەرى ءجونىندەگى اگەنتتىگىنە مەملەكەتتىك قىزمەت تۋرالى زاڭنامالاردى وزگەرتۋ بويىنشا 30-دان استام ۇسىنىس جاسادى.
قىزمەتكەرلەر مەملەكەتتىك قىزمەت تۋرالى زاڭناماعا ەنگىزىلگەن وزگەرىستەر مەن تولىقتىرۋلاردى قۇلشىنىسپەن قابىل الدى. قابىلدانعان شارالار مەملەكەتتىك قىزمەتشىلەر كادرلارىن ىرىكتەۋ جۇيەسىنە, قوعامعا قىزمەت ەتۋگە بارىنشا لايىقتى جانداردى جيناقتاۋ مۇمكىندىگىن قامتاماسىز ەتە وتىرىپ, جەكە جەتىستىكتەرىن تانۋ نەگىزىندە قىزمەت بابىمەن وسۋىنە جۇرتشىلىقتىڭ سەنىمىن ارتتىرادى.“تۋىستىق”, “جەكە باسىنا بەرىلگەندىك”, “جەرلەستىك”, تاعى باسقا دا ۇعىمدار جويىلىپ, وتانىمىزدىڭ بارلىق ازاماتتارىنىڭ ەڭبەك ەتۋگە كونستيتۋتسيالىق قۇقىقتارىن ءىس جۇزىندە جۇزەگە اسىرۋ, مەملەكەتتىك قىزمەتكە تەڭ دارەجەدە قول جەتكىزۋ ءمۇمكىندىگىنە يە بولۋ تەتىكتەرى ويلاستىرىلعان. زاڭعا تۇڭعىش رەت قىزمەت ادەبى تۋرالى جەكە تاراۋدى ەنگىزۋ قاراستىرىلعان. وندا مەملەكەتتىك قىزمەتشىلەردىڭ ار-نامىس جانە سىبايلاس جەمقورلىققا قارسى كۇرەس ءتارتىبى كودەكسىنىڭ نورمالارى ەنگىزىلگەن. وسىعان سايكەس مەملەكەتتىك قىزمەتشىلەر مەملەكەتتىك رامىزدەرگە قۇرمەتپەن قاراۋ ۇلگىسىن كورسەتۋگە, ازاماتتاردىڭ جۇگىنىستەرىنە سىپايىلىق پەن ادەپتىلىك تانىتۋعا مىندەتتى.
ەندىگى نازار ەلباسى ايقىنداپ بەرگەن مەملەكەتتىك قىزمەتتىڭ جاڭا مودەلى تۇجىرىمداماسىن ءجۇزەگە اسىرۋعا اۋدارىلىپ وتىر. قولعا الىناتىن شارالار تىزبەسى جاسالىپ, الدىمىزعا ءىرگەلى ءمىندەتتەر قويدىق. جاڭا تالاپتارعا ءسايكەس اكىمشىلىك رەفورماسىنىڭ ەكىنشى كەزەڭى تىڭ سەرپىلىستەر اكەلەرى كۇمانسىز. وعان ءبارىمىز تاس-ءتۇيىن دايىن بولۋىمىز كەرەك. ەڭ الدىمەن, جولداۋدا اتاپ كورسەتىلگەندەي, مەملەكەتتىك اپپارات رەفورمالاناتىن بولادى. وسىلايشا مەملەكەتتىك قىزمەتتىڭ جاڭا جۇيەسى ورنىعىپ, سىبايلاس جەمقورلىققا قارسى شارالار, مەملەكەتتىك قىزمەتشىلەردى ىرىكتەۋدە اشىقتىق, مەريتوكراتيا قاعيدالارى كۇشەيتىلەدى. بۇدان بىلاي مەملەكەتتىك قىزمەتشىنى لاۋازىمدىق ساتىمەن كەزەڭ-كەزەڭمەن ءوسىرۋ ءتاسىلى قولدانىلىپ, كاسىبي دەڭگەيى ءبىرىنشى كەزەكتە ەسكەرىلەدى.
مەملەكەتتىك قىزمەت ىستەرى جونىندەگى اگەنتتىككە مەملەكەتتىك قىزمەتشىلەردىڭ لاۋازىمدى ءوسۋىنىڭ مۇلدە جاڭا تەتىگىن ەنگىزۋگە تاپسىرما بەرىلدى. مۇنىڭ ءبارى بىلىكتى دە ءبىلىمدى كادرلار كورپۋسىن نىعايتارى ءسوزسىز. سونداي-اق مەملەكەتتىك قىزمەتتەر كورسەتۋدىڭ ساپاسىن ارتتىرۋ باستى ماقساتتاردىڭ ءبىرى سانالادى. مەملەكەتتىك اپپاراتتىڭ حالىقپەن ءوزارا قارىم-قاتىناستارىندا بىرجاقتى-وكتەم كوزقاراستاردان ارىلىپ, ازاماتتارعا مەملەكەتتىك قىزمەتتەردى ءتيىمدى ءارى جەدەل تۇردە كورسەتۋگە كوشۋ باسقارۋ ينستيتۋتتارىنىڭ جاۋاپكەرشىلىگىن نىعايتارى ءسوزسىز. سونداي-اق, پارلامەنتكە «مەملەكەتتىك قىزمەت تۋرالى» زاڭ جوباسىنىڭ ەنگىزىلۋى مەملەكەتتىك قىزمەتشىلەردىڭ كاسىبي شەبەرلىگىن ارتتىرۋ, ماشىعىن جەتىلدىرۋ مۇددەلەرىنەن تۋعانى انىق.
مەملەكەتتىك قىزمەتشىلەردىڭ باستى مىندەتتەرىنىڭ ءبىرى – سىبايلاس جەمقورلىق كورىنىستەرىنە قارسى تۇرۋ, سىبايلاس جەمقورلىققا جاعداي تۋعىزاتىن ارەكەتتەرگە جول بەرمەۋ, باسقا مەملەكەتتىك قىزمەتشىلەر تاراپىنان جىبەرىلگەن قۇقىق بۇزۋشىلىق فاكتىلەرىنىڭ جولىن كەسۋ. جولداۋدا جەمقورلىق جاي قۇقىق بۇزۋشىلىق ەمەس, ۇلتتىق قاۋىپسىزدىككە تىكەلەي تونگەن قاتەر رەتىندە باعالانىپ, زاڭنامالاردى جەتىلدىرۋ ارقىلى سوققى بەرۋ مىندەتى قويىلدى. بۇل شارالار سىبايلاس جەمقورلىقتىڭ دەڭگەيىن ايتارلىقتاي تومەندەتۋگە مۇمكىندىك بەرەدى.
سوڭعى جىلدارى قازاقستان رەسپۋبليكاسىنىڭ مەملەكەتتىك قىزمەتىنە قاتىستى بىرقاتار ماڭىزدى قادامدار جاسالدى. اتاپ ايتقاندا, زاڭنامالاردا مەملەكەتتىك ورگانداردىڭ تارتىپتىك كوميسسيالارىنىڭ, كادرلىق قىزمەتتەرىنىڭ جاۋاپكەرشىلىگىن ارتتىرۋ, لاۋازىمدى ورىندارعا تۇلعالاردى زاڭسىز تاعايىنداعانى نەمەسە ولاردى جۇمىستان بوساتقانى, زاڭسىز كادرلىق شەشىمدەرى ءۇشىن لاۋازىمدى ادامداردىڭ جاۋاپكەرشىلىگىن ارتتىرۋ تەتىكتەرى بەلگىلەندى. مەملەكەتتىك قىزمەتكە ازاماتتاردى ىرىكتەۋدىڭ, كونكۋرستىق ءتارتىبىنىڭ تيىمدىلىگىن, شىنايىلىعىن جانە جاريالىلىعىن ارتتىرۋعا ايتارلىقتاي وزگەرىستەر ەنگىزىلدى. ەندى تەستىلەۋ ناقتى مەملەكەتتىك ورگانداعى كونكۋرستىق ىرىكتەۋگە قاتىسسىز وتكىزىلەتىن بولادى. ونىڭ ناتيجەلەرى ءجونىندە جيناعان ۇپايدىڭ قورىتىندىسى بويىنشا ازاماتتارعا كونكۋرستىق ىرىكتەۋگە قاتىسۋعا قۇقىق بەرەتىن سەرتيفيكات بەرىلەدى. وسىلايشا كونكۋرستىق پروتسەدۋرالاردى وتكىزۋ ۋاقىتى ءۇش ەسە قىسقاردى.
مەملەكەتتىك قىزمەتكە ورنالاسقاندا اركەز “ۇلتقا قىزمەت ەتۋ” تۇسىنىگىن قاستەرلەيتىن ماماندار كەلە بەرمەيتىنىن ءتاجىريبە انىق بايقاتىپ وتىر. ال كونكۋرستىق ىرىكتەۋ شارالارىنىڭ جاريالىلىعى ونداي كەزدەيسوقتىقتىڭ سانىن مەيلىنشە ازايتۋعا مۇمكىندىك بەرەتىن بولادى. وبلىستا تۇجىرىمدامانى قابىلداعان ساتتەن باستاپ مەملەكەتتىك قىزمەتكە 1519 ادام كەلدى, ونىڭ ىشىندە كونكۋرستىق نەگىزدە 334 ادام قابىلداندى. كونكۋرستىق ىرىكتەۋ كەزىندە جاريالىلىقتى قامتاماسىز ەتۋ ماقساتىمەن تاۋەلسىز باقىلاۋشىلار, ۇكىمەتتىك ەمەس ۇيىم, باق وكىلدەرى ۇدايى شاقىرىلىپ وتىرادى. بۇگىندە ادامي رەسۋرستار مەملەكەت دامۋىنىڭ باستى باسىمدىقتارىنىڭ ءبىرى بولىپ تابىلادى. كادرلىق رەزەرۆتى پايدالانۋ مەن قالىپتاستىرۋدا ايتارلىقتاي وزگەرىستەردىڭ قاراستىرىلىپ وتىرعانى قۋانتادى. ەندى كونكۋرستىق كوميسسيالار كادرلىق رەزەرۆتى تەك بەلگىلى مەملەكەتتىك ورگانعا ۇسىنا الادى. باسقا مەملەكەتتىك ورگاندار ۇسىنعان رەزەرۆتەگىلەر تاعايىندالمايتىن بولادى.
قازىرگى تاڭدا مەملەكەتتىڭ جانە مەملەكەتتىك قىزمەتتىڭ الدىندا تۇبەگەيلى جاڭا مىندەتتەر تۇر. ونىڭ باسىم قاعيداتتارىن ەلباسى حالىققا ارناعان جولداۋىندا بەلگىلەپ بەردى. بۇل مىندەتتەردى شەشۋ كوبىنەسە مەملەكەتتىك قىزمەتتىڭ باسقارۋشى قۇرامىنىڭ كاسىپتىك دەڭگەيىنە بايلانىستى. وسىعان وراي مەملەكەتتىك ساياساتتىڭ ناقتى باعىتتارىن ءجۇزەگە اسىرۋعا جاۋاپتى كاسىپقوي باسقارۋشىلاردىڭ مۇلدەم جاڭا ساناتى – «ا» كورپۋسىن قۇرۋعا تاپسىرمالار بەرىلدى. ونىڭ ساپالىق قۇرامى بارىنشا نىعايتىلىپ, بىلىكتىلىك تالاپتارى وتە-موتە كۇشەيتىلدى. مەملەكەتتىك ورگانداردى تەكسەرۋ, قۇقىق بۇزۋشىلىقتى تالداۋ بارىسى جەرگىلىكتى جەرلەردە كونكۋرستىق, اتتەستاتتاۋ جانە تارتىپتىك كوميسسيالاردىڭ بىرىڭعاي كادرلىق قىزمەتتەرىن قۇرۋ قاجەتتىگىن كورسەتتى. بۇل ءماسەلە, اسىرەسە, اۋداندىق دەڭگەيدە وزەكتى.
كادرلىق جۇمىستى نەگىزگى قىزمەتى باسقا قىزمەتشىلەرگە قوسىمشا جۇكتەمە رەتىندە تاپسىرۋ داعدىلارى كەزدەسەدى. ەندى جوعارىداي تالاپتاردى جۇزەگە اسىرۋ مەملەكەتتىك قىزمەتشىلەردىڭ جۇمىس تيىمدىلىگى مەن كاسىبيلىگىن ايتارلىقتاي جاقسارتۋعا ءمۇمكىندىك بەرەدى. مەملەكەتتىك قىزمەتشىلەردىڭ جۇمىس ساپاسى مەن تيىمدىلىگىن انىقتاۋ ماقساتىندا جىل سايىن باعالاۋ ەنگىزۋ كوزدەلگەن. مەملەكەتتىك قىزمەتشىلەردىڭ, ونىڭ ىشىندە كادرلىق رەزەرۆكە الىنعانداردىڭ كاسىبي بىلىكتىلىگىن شىڭداۋ ءۇشىن تاجىريبەلەردەن ءوتۋ, قىسقا كۋرستاردا وقىتۋ ءمۇمكىندىكتەرى قاراستىرىلعان.
مەملەكەتتىك قىزمەت كورسەتۋ ساپاسىن ارتتىرۋ – جولداۋ ماقسات ەتكەن باستى ستراتەگيالىق تالاپتاردىڭ ءبىرى. مۇندا مەملەكەتتىك قىزمەتشىلەردىڭ كاسىبي دايارلىعى, مەملەكەتتىك قىزمەتتى تۇتىنۋشىلارمەن قارىم-قاتىناس مادەنيەتى باستى ورىن الارى داۋسىز. مەملەكەتتىك قىزمەت كورسەتۋدى باعالاۋدا جۇرتشىلىققا قولجەتىمدىگى مەن تۇرعىنداردىڭ ونىڭ ساپاسىنا قانشالىقتى قاناعاتتاناتىندىعى بارىنشا ەسكەرىلەدى. تۇتاستاي العاندا, مەملەكەتتىك قىزمەتكە تالاپ بارىنشا ارتتىرىلادى. بۇل تۇرعىدان العاندا, جولداۋداعى مەملەكەتتىك قىزمەتتىڭ جاڭا مودەلى يننوۆاتسيالىق ۇتقىر شەشىم بولماق.
تىلەگەن كاسكين,
مەملەكەتتىك قىزمەت ىستەرى جونىندەگى اگەنتتىكتىڭ سولتۇستىك قازاقستان وبلىسى بويىنشا باسقارما باستىعى –
تارتىپتىك كەڭەس توراعاسى.

سولتۇستىك قازاقستان وبلىسى.