بالالاردى ءسابي كەزىنەن رۋحاني قۇندىلىقتارعا باۋلىپ ءوسىرۋ قاجەت ەكەنىن ايتقان قالا باسشىسى وقۋشىلاردىڭ رۋحاني دامۋىن جەتىلدىرۋ, ۇلتجاندىلىققا, مادەنيەتكە تاربيەلەۋ ماقساتىندا ۇشجىلدىق «ۇلتتىق تاربيە تۇجىرىمداماسىن» جاساۋدى ايتتى.
سونىمەن قوسا, ۇستازدىڭ مارتەبەسى مەن ءبىلىمنىڭ ساپاسىن كوتەرۋ جايىن قوزعاعان اكىم ەڭ الدىمەن مەكتەپ اينالاسىن پايداكۇنەم بيزنەسمەندەردەن ارىلتۋدى اتاپ ءوتتى.
«جاسىراتىنى جوق, مەكتەپ فورماسى جىلدا جاڭا وقۋ ماۋسىمى باستالعاندا, ۇلكەن شۋدىڭ باسى بولىپ كەلەدى. سەبەبى, ءبىزدىڭ تۇرمىسىمىزدا الەۋمەتتىك شيەلەنىستەر, جاعدايى تومەن وتباسىلار بار ەكەنىن جاقسى بىلەسىزدەر. مەكتەپ وقۋشىلارىنىڭ فورماسى ءار مەكتەپتە ءار بولەك. مەكتەپتەردىڭ ارقايسىسى ءوز فورماسىن بەكىتىپ العان. ماسەلەن, اتا-انا ءۇيىنىڭ جانىنداعى ليتسەيگە بالاسىن وقىتقىسى كەلسە, ول ليتسەيدىڭ وقۋشى فورماسى تىم قىمبات تۇرادى. الەۋمەتتىك نارازىلىق وسىندايدان تۋىندايدى. بۇل جەردە مەكتەپ وقۋشىلارىنىڭ دا فورماسىن بىرىڭعاي جۇيەگە كوشىرۋ كەرەك. مەكتەپ فورماسىن بيزنەسكە اينالدىرىپ, اقشا تابۋدىڭ كوزى قىلۋدى دوعارۋ كەرەك»,-دەدى ە.ايتاحانوۆ.
كونفەرەنتسيا بارىسىندا جاڭا وقۋ جىلىنا قويىلعان مىندەتتەر مەن ماقساتتار باياندالدى. شىمكەنت قالاسى بيىلعى 2019-2020 وقۋ جىلىن 253 مەملەكەتتىك, 445 جەكەمەنشىك ءبىلىم بەرۋ ۇيىمدارىنداعى 294 مىڭنان استام ءبىلىم الۋشىلارمەن باستاماق. سونىمەن قاتار, ءبىلىم سالاسىندا ۇزدىك جەتىستىكتەرگە جەتىپ, بىلىكتىلىگىمەن ەرەكشەلەنگەن بىرقاتار ۇستازدار مينيسترلىكتىڭ جانە قالا اكىمىنىڭ العىس حاتىمەن ماراپاتتالدى.
